އެލެކްސް ފާގަސަންގެ ފަޚުރުވެރި 'ކްލާސް އޮފް 92' ގައި ހިމެނޭ އިނގިރޭސި ވިލާތުގެ ގެރީ ނެވިލް ކުޅުންތެރިއެއްގެ ގޮތުން ރިޓަޔާ ކުރިތާ 4 އަހަރު ފަހުން އޭނާގެ ކޯޗު ކަމުގެ ކެރިޔާ ފެށިއެވެ.
ސްޕެނިޝް ލަލީގާގައި ކުޅޭ ވެލެންސިއާގެ މެނޭޖަރު ކަމާއި ފާއިތުވެދިޔަ އަހަރުގެ ޑިސެމްބަރު މަހު ހަވާލުވުމަށް ފަހު ނެވިލްއަށް ލީގުގައި ކުޅުނު 16 މެޗުގެ ތެރެއިން މޮޅެއް ލިބިފައިވަނީ އެންމެ 3 މެޗުންނެވެ. ޖުމުލަ 28 މެޗުގެ ތެރެއިން 10 މެޗުންނެވެ.
މަގާމުން ވަކިކުރުމަށްފަހު ނެވިލް ބުނެފައިވަނީ، ވަކިކުރުމުން ދެރަވާ ކަމަށާއި އަދިވެސް މަގާމުގައި ހުންނަން ބޭނުންވާކަމަށެވެ. ނަމަވެސް ނަތީޖާތަކަށް ބަލާއިރު އޭނާ އަދި ކުލަބުވެސް އުއްމީދުކުރި ނަތީޖާ އާ ގާތަށްވެސް ނާދެވުނުކަމަށް ނެވިލް ވަނީ އެއްބަސްވެފައެވެ.
ކޯޗުކަން ކުރުމުގެ ކުރިން ސްކައި ސްޕޯޓްސްގައި ޕުންޑިޓް އެއްގެ ވަޒީފާ އަދާ ކުރަމުންދިޔަ ނެވިލްގެ މި ނާކާމިޔާބީއަށް ގިނަ ބަޔަކު ސޯޝަލް މީޑިޔާގައި ފާޑުކިޔައި މަލާމާތް ކޮށްފައިވާއިރު ކުރީގެ ވެލްޝް ކުޅުންތެރިޔާ އަދި މިހާރު ޕުންޑިޓެއް ކަމަށްވާ ރޮބީ ސެވެޖް ބުނެފައިވަނީ ނެވިލް އަށް އަދިވެސް ކުރިޔަށް ދެވޭނެ ކަމަށެވެ.
އަދި އޭނާ ދެކޭ ގޮތުގައި ނެވިލް އަކީ ކޯޗު ކަން ކުރުމުގެ ގާބިލިއްޔަތު ލިބިފައިވާ މޮޅު ކޯޗެއް ކަމަށާއި އެންމެ ނާކާމިޔާބީ އަކީ އޭނާގެ ކޯޗިން ކެރިއަރ ނިންމާލަން ޖެހޭނެ ކަމެއް ކަމަށް އޭނާ ނުދެކޭ ކަމަށެވެ.
ވެލެންސިއާގެ ކޯޗުކަމުން ވަކި ކުރުމުން ދެން ނެވިލް ދާނީ ކޮންދިމާލަކަށް ކަން އަދި އޭނާ ހާމަކޮށްފައެއް ނުވެއެވެ. ނަމަވެސް ބޮޑަށް ބެލެވެނީ ކެމެރާ ކުރިމައްޗަށް ދިއުމުގެ ބަދަލުގައި އަވަސް މުސްތަގުބަލެއްގައި ބެންޗުން ފެންނާނެކަމަށެވެ.