ނަރުހުންގެ ދުވަސް ފާހަގަ ކުރަން ހިތަދޫ ރީޖަނަލް ހޮސްޕިޓަލް (އެޗްއާރްއެޗް) ގެ ނަރުހުން އިންތިޒާމުކޮށްގެން ބާއްވާ ފަންޑް ރައިޒިން ހަވީރެއް މާދަމާ ހިތަދޫގައި ބާއްވަން ނިންމައިފި އެވެ.
އެޗްއާރްއެޗްގެ ނަރުހުންނާއި ހިތަދޫ ޕަބްލިކް ހެލްތު ޔުނިޓް ގުޅިގެން ބާއްވާ ހަވީރު އޮންނާނީ މާދަމާ ހަވީރު ހިތަދޫ ކުޑަކުދިންގެ ޕާކްގަ އެވެ. އެއީ ހިތަދޫ އައިސް ޑިލައިޓް ރެސްޓޯރަންޓް ކައިރީ އޮންނަ ޕާކެވެ. ކުރިއަށް ދާނީ ހަވީރު 4:00-6:00 އަށެވެ.
މި އިވެންޓާ ބެހޭ ގޮތުން ޕަބްލިކް ހެލްތު ޔުނިޓުން ވާހަކަ ދެއްކެވި އައިޝަތު ސައީދު "އައްޑޫ ލައިވް" އަށް ވިދާޅުވީ ބޮޑެތި މީހުންގެ އިތުރަށް ކުޑަކުދިންނަށް ހާއްސަ ހަރަކާތްތައް ހަވީރުގެ ތެރޭގައި ހުންނާނެ ކަމަށެވެ.
އެގޮތުން ހާއްސަ ކެންޓީނަކުން ތަފާތު ބާވަތްތަކުގެ ހެދިކާ ގަންނަން ލިބޭނެ އެވެ. މީގެ އިތުރުން ޓީބީ އާ ބެހޭ މައުލޫމާތު ފޯރުކޮށް ދިނުމާއި ޓީބީ އަށް ހިލޭ ޓެސްޓްކޮށް ދިނުން ވެސް ހިމެނެ އެވެ.
މީގެ އިތުރުން ވެސް ސިއްހީ އެކިއެކި މައުލޫމާތު ފޯރުކޮށް ދޭނެ އެވެ.
"އެހެންވެ ވީހާ ވެސް ގިނަ ބަޔަކު މި ހަވީރަށް ޒިޔާރަތް ކުރުމަކީ އަޅުގަނޑުމެންގެ ވަރަށް ބޮޑު އެދުމެއް. މީގެ ބޭނުމަކީ މި އަހަރުގެ ނަރުހުންގެ ދުވަހުގެ ހަރަކާތްތަކަށް ފަންޑް ރައިޒް ކުރުން،" އައިޝަތު ވިދާޅުވި އެވެ. "މިއީ މިގޮތަށް ބާއްވާ ފުރަތަމަ އިވެންޓް."
މި ހަވީރުގެ ތެރޭގައި ފުލުހުންގެ ޔުނިފޯމްގައި ކުޑަކުދިންނަށް ފޮޓޯ ނެގުމާއި ފޭސް ޕެއިންޓިން ފަދަ ހަރަކާތްތައް ވެސް ކުރިއަށް ދާނެ އެވެ.
ބައިނަލްއަގްވާމީ ނަރުހުންގެ ދުވަހުގެ ގޮތުގައި ފާހަގަ ކުރަނީ މެއި މަހުގެ 12 ވަނަ ދުވަހެވެ.