ހުޅުމީދޫގައި ގާއިމުކޮށްފައިވާ ހައި ކޯޓު ދެކުނު ގޮފީގެ މަސައްކަތްތައް ހަރުދަނާ ކުރާނެ އުސޫލުތަކާ ބެހޭ ގޮތުން ޕްރޮސެކިއުޓަ ޖެނެރަލް (ޕީޖީ) އޮފީހާ އާ އެކު މަޝްވަރާކޮށްފި އެވެ.
މި މަޝްވަރާކޮށްފައި ވަނީ ޕީޖީ އާއިޝަތު ބިޝާމް އައްޑު އަށް ކުރައްވަމުން ގެންދަވާ ދަތުރުފުޅުގައި ހައި ކޯޓުގެ ދެކުނު ގޮތްޕަށް ޒިޔާރާތް ކުރެއްވުމަށް ފަހު އެވެ.
ދިވެހި ރާއްޖޭގެ ހައިކޯޓުގެ ދެކުނު ގޮފީގައި އޮތް މި ބައްދަލުވުމުގައި، ޕީޖީ އޮފީހުން އެ ގޮތްޕަށް ހުށަހަޅާ މައްސަލަތައް ހިންގުމުގައި ދިމާވާ ދަތިތައް ހައްލު ކުރާނޭ ގޮތުގެ މައްޗަށާއި، މަސައްކަތްތައް އިތުރަށް ހަރުދަނާ ކުރެވޭނޭ އުސޫލުތަކާ ބެހޭ ގޮތުން ވާހަކަ ދެއްކި އެވެ.
އެގޮތުން އެ ގޮތްޕަށް ހުށަހެޅޭ މައްސަލަތަކުގެ ތެރެއިން ބަންދު އަމުރު އިސްތިއުނާފްގެ މައްސަލަތަކުގައި ތުހުމަތު ކުރެވޭ ފަރާތް ނުވަތަ ފަރާތްތައް ބަންދުގެ އަމުރު އިސްތިއުނާފްގެ އަޑު އެހުންތަކަށް ހާޒިރު ކުރުމުގައި ދިމާވާ މައްސަލަތައް ދެނެގަނެ، މޯލްޑިވްސް ކަރެކްޝަނަލް ސާވިސަސް އާއި ދިވެހިރާއްޖޭގެ ސުޕްރީމް ކޯޓު މެދުވެރިކޮށް އެކަމަށް ހައްލެއް ހޯދުމާ ގުޅޭ ގޮތުން މަޝްވަރާކޮށްފައިވެ އެވެ.