އިނގިރޭސި ޕްރިމިއާ ލީގުގައި މެންޗެސްޓާ ޔުނައިޓެޑް އަދި އެވަޓަން ބައްދަލު ކުރި މެޗުގައި އެންތޮނީ މާޝަލް ޖެހި ގޯލާ އެކު ޕްރިމިއާ ލީގުގައި ހޯމް ޓީމަކުން 1،000 ގޯލު ޖެހި ފުރަތަމަ ޓީމަށް މެންޗެސްޓާ ޔުނައިޓެޑް ވެއްޖެ އެވެ.
މި ފަހުރުވެރި ލަގަބު ލިބުނު ފުރަތަމަ ޓީމުގެ ގޮތުގައި ޔުނައިޓެޑު ވެފައިވާ އިރު ދެވަނައިގައި 916 ގޯލު ހޯމްގައި ޖަހައިގެން އާސެނަލް އޮތް އިރު 896 ގޯލާއެކު ތިންވަނައިގައި އޮތީ ޗެލްސީ އެވެ.
ތޭވީސް އަހަރު ކުރިން ޕްރިމިއާ ލީގު ނަމުގައި ލީގު ބަދަލު ކުރުމަށްފަހު ޔުނައިޓެޑްގެ ފުރަތަމަ ގޯލު ޖަހާފައި ވަނީ މާކް ހިއުގްސް އެވެ.
ނަމަވެސް އޯލްޑް ޓްރެފޮޑްގައި ފުރަތަމަ ގޯލު ޖަހާފައިވަނީ ޑެނިސް އަރްވިންއެވެ. ޔުނައިޓެޑްގެ އަމިއްލަ ދަނޑުގައި އެންމެ ގިނަ ގޯލު ޖަހާފައިވާ ކުޅުންތެރިއަކީ މިހާރުގެ ކެޕްޓަން ވޭން ރޫނީ އެވެ.
ނުވަދިހަ ނުވަ ގޯލު އޯލްޑް ޓްރެފޯޑްގައި ރޫނީ ޖަހާފައިވާއިރު، ރޫނީގެ ފަހަތުގައި މިލިސްޓުގައި އޮތީ 59 ގޯލާއެކު ޕައުލް ސްކޯލްސް އެވެ.
ޔުނައިޓެޑްގެ ކުރީގެ ތަރި ސާ ބޮބީ ޗާލްޓަންގެ ނަމުގައި އޯލްޑް ޓްރެފޯޑްގެ ދެކުނު ސްޓޭންޑް މިރޭ ބަދަލު ކޮށްފައިވާއިރު ހުރިހާ ގޮތަކުންވެސް އެންތޮނީ މާޝިއަލްގެ ގޯލު ހާއްސަވެގެންގޮސްފައިވެ އެވެ.
މިމެޗު ނިމިފައި ވަނީ މެންޗެސްޓާ ޔުނައިޓެޑް 0-1 ގެ ނަތީޖާ އަކުން މޮޅުވެގެންނެވެ.