އައްޑޫގެ އަވަށްތަކުގެ ގިނަ މަގުތައް ރަނގަޅު ފެންވަރަަކަށް ހަދައި 2018 ގެ އަހަރުގެ ތެރޭގައި ނިންމާނެ ކަމަށް ހައުސިން މިނިސްޓަރު ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މިނިސްޓަރު ވިދާޅުވީ އައްޑޫގެ މަގުތަކުގެ އީއައިއޭ ހަދަން ބަޔަކު ހޯދަން އިއުލާންކޮށްފައިވާ ކަމަށާއި ޑިޒައިން ކުރުމުގެ މަސައްކަތްތައް ވެސް ކުރަމުންދާ ކަމަށެވެ.
"އަޅުގަނޑުމެންގެ އަމާޒަކީ އައްޑޫ ސިޓީގެ ފެނައި ނަރުދަމާގެ މަސައްކަތްތައް ކަމާ ގުޅޭ މުއައްސަސާއިން ނިންމަވާ ދެއްވާ އިރަށް މަގުތަކުގެ އަމަލީ މަސައްކަތަށް ކޮންޓްރެކްޓަރަކު ހޯދާ ފަށަން ތައްޔާރުވެގެން ތިބުން،" މިނިސްޓަރު ވިދާޅުވި އެވެ. "މި މަސައްކަތްތައް ނިމި އިރާދަކުރެއްވިއްޔާ 2018 ގެ ތެރޭގައި އައްޑޫ ސިޓީގެ ހުރިހާ ރަށެއްގެ ހުރިހާ މަސައްކަތެއް ރައީސް ޔާމީންގެ މިސަރުކާރުން ހަދާ ނިންމައި ދޭނަން."