ގޭގައި ހުންނަ އިލެކްޓްރޯނިކް ސާމާނުތައް ފޯން މެދުވެރިކޮށް ކޮންޓްރޯލް ކުރެވޭ ހިދުމަތެއް ހަތަރު ޕެކޭޖަކާ "ސްމާޓް ހޯމް" ގެ ނަމުގައި ދިރާގުން ތައާރަފުކޮށްފި އެވެ.
ސްމާޓް ހޯމްގެ ހިދުމަތް ދިރާގުން މިއަދު ތައާރަފު ކުރި އިރު، މި ހިދުމަތަކީ ސްމާޓް ޑިވައިސްއެއް މެދުވެރިކޮށް، ގޭތެރޭގައި ބޭނުން ކުރާ އިލެކްޓްރޯނިކް ޑިވައިސްތަށް ކޮންޓްރޯލް ކުރެވޭ ހިދުމަތެކެވެ.
އެގޮތުން މޮބައިން ފޯނަށް އަޅާލެވޭ އެޕްލިކޭޝަން މެދުވެރިކޮށް ގޭގައި ހުންނަ އެއާކޮންޑިޝަން، ލައިޓް، އައިސްއަމަލާރި އަދި ޓީވީ ފަދަ އެއްޗެހި ކޮންޓްރޯލް ކުރެވޭނެ އެވެ.
މިއީ ކޮންމެ ތަނެއްގައި ހުރި ނަމަވެސް އިންޓަނެޓް މެދުވެރިކޮށް ގޭގައި ހުންނަ ކަރަންޓް ސާމާނު ކޮންޓްރޯލް ކުރެވޭނެ ހިދުމަތެއް ކަމަށް ދިރާގުން ބުންޏެވެ.
އެ ކުންފުނިން ބުނީ މި ހިދުމަތަށް ކަސްޓަމަރުން ދިރާގުގެ ބްރޯޑްބޭންޑް ކަނެކްޝަނެއް ހުރި ކޮންމެ ތަނެއްގައި އެ ކަސްޓަމަރަކު ނަގާ ޕެކޭޖްގައި އެކުލެވޭ ޑިވައިސްގެ ސެޓަޕް ހަދައި ދެވޭނެ ކަމަށެވެ.
ދިރާގުން ތައާރަފު ކިރި ސްމާޓް ހޯމް ޕެކޭޖްގައި ބްރައުންޒާއި، ސިލްވަ، ގޯލްޑް ޕްލެޓިނަމް އަދި ހޯމް ސެކިއުރިޓީ ކިޓް ހިމެނެ އެވެ.
މި ޕެކޭޖްތަކަށް ފައިސާ ދެއްކުމަށް ހަ މަހާއި 18 މަހާ ދެމެދުގެ މުއްދަތަކަށް ބަހާލައިގެން ވެސް ފައިސާ ދެއްކި ދާނެ އެވެ. އަދި ބޭނުން ނަމަ އެއްފަހަރާ ފައިސާ ދެއްކޭނެ ކަމަށް ވެސް ދިރާގުން ބުންޏެވެ.
އިންސްޓޯލްމެންޓް ޕެކޭޖްތަކަށް މަހަކު ދައްކަން ޖެހޭނީ 150-450ރ. އާ ދެމެދުގެ އަދަދެކެވެ.