ސްކޫލުގައި ހިނގައިފާނެ އަލިފާނުގެ ހާދިސާތަކުގައި އަމަލު ކުރުމަށް އެޑިއުކޭޝަން މިނިސްޓްރީން އެކުލަވާލާފައިވާ "ފަޔަ އިވެކުއޭޝަން ޕްލޭން" އަށް ފަރިތަކުރުމުގެ ގޮތުން އެމްއެންޑީއެފް ސަދަން އޭރިއާ އިން ހުޅުދޫ ސްކޫލްގައި ފަޔާ އިވެކުއޭޝަން ޑްރިލްއެއް ބާއްވައިފި އެވެ.
އިއްޔެ ބޭއްވި މި އިވެކުއޭޝަން ޑްރިލްގައި އަލިފާނުގެ ހާދިސާއެއް ހިނގައިފި ނަމަ، ސްކޫލުން ނުކުމެގެން ސަލާމަތްތެރި ހިސާބަކަށް ދާނެ މަގުތައް ދެނެގަތުމުގެ އިތުރުން، އެފަދަ ހާދިސާއެއް ދިމާވެގެން އުޅޭ މާހައުލެއްގައި މީހުން އުފުލުމާއި، މީހުންނަށް އެހީތެރިވުމުގައި ކަންތައް ކުރަން ޖެހޭނެ ގޮތްތައް ވަނީ ފަރިތަކޮށްފަ އެވެ.
މި އިވެކުއޭޝަން ޑްރިލްގައި އެ ސްކޫލުގެ ހުރިހާ ގުރޭޑްތަކެއްގެ ދަރިވަރުންނާއި ޓީޗަރުން އަދި އިދާރީ މުވައްޒަފުން ބައިވެރިވި އެވެ.
އެމްއެންޑީއެފް ސަދަން އޭރިއާ އިން ވަނީ މިދިޔަ ބުދަ ދުވަހު ހުޅުދޫ ސްކޫލްގައި ޓީޗަރުންނަށް މިފަދަ ހާދިސާތަކުގައި ކަންކުރަންވީ ގޮތުގެ މަޢުލޫމާތު ދިނުމަށް ހާއްސަ ކުލާހެއް ވެސް ކުރިއަށް ގެންގޮސްފަ އެވެ.