ސާފު ބޯ ފެން ފޯރުކޮށް ދިނުމަށް އައްޑޫގައި ކުރިއަށްދާ މަޝްރޫއުގައި ފެނަކަ ކޯޕަރޭޝަން ގައި މަސައްކަތް ކުރާ އައްޑޫގެ އިސް ބައެއް މީހުންގެ ގެތަކަށް އެއް ފެން ހޮޅިއަށް ވުރެ ގިނަ އިން ވައްދާފައިވާ މައްސަލައެއް ފެންމަތިވެ، އެ މައްސަލަ ބަލަން ފަށައިފި އެވެ.
"އައްޑޫ ލައިވް" އަށް އެނގިފައިވާ ގޮތުގައި، ފެނަކަ ކޯޕަރޭޝަންގެ އިސް ބައެއް މީހުންގެ ފަޅު ގޯތިތަކަށާއި، ގޭގެ ތަކަށް އެއް ފެން ހޮޅިއަށް ވުރެ ގިނައިން ވައްދާފައި ވަނީ ފެނަކަ ކޯޕަރޭޝަންގެ ގަވާއިދާއި ހިލާފަށެވެ. އަދި މި މައްސަލަ ފެންމަތިވެ، ފެނަކަ މާލޭ އޮފީހުން ޓީމެއް އައްޑު އަށް އައިސް ވަނީ މައްސަލަ ބަލައިފަ އެވެ.
"އައްޑޫލައިވް" އާ ވާހަކަ ދެއްކި ފެނަކަ އިސް ބޭފުޅަކު ވިދާޅުވީ، އާންމު މީސް މީހުން އެދުމުން ވެސް ގެޔަކަށް އެއް ހޮޅި ފިޔަވައި އިތުރު ހޮޅިލައިނެއް ފެނަކައިން ވައްދާ ނުދޭ ކަމަށެވެ.
ނަމަވެސް ފެނަކަ ކޯޕަރޭޝަންގެ ބައެއް އިސްވެރިން ގަވާއިދާ ހިލާފަށް އަމިއްލަ ގެތަކަށް ދެތިން ހޮޅި ލައިން ވައްދާފައިވާ ކަމަށެވެ.
"މަކަރު ހެދުމުގެ ނިޔަތުގައި، ތަނުގެ ގަވާއިދާ ހިލާފަށް ފެން ހޮޅި އިތުރަށް ވައްދާފައި ވަނީ. މިހާރު އެކަން ބެލުމަށް ފަހު އެ ހޮޅިތައް ނަގަން އަންގައިފި،" އޮފިޝަލް ވިދާޅުވި އެވެ.
މި މައްސަލަ ފެނަކަ ހެޑް އޮފީހުން ބަލަމުން އަންނަ އިރު މިކަމާއި ގުޅިގެން ބައެއް ފަރާތްތަކާ މެދު ފިޔަވަޅު އެޅުމަށް ނިންމާފައިވާ ކަމަށް އެނގިފައިވެ އެވެ.