ކޮމަންވެލްތު މިނިސްޓްރީއަލް އެކްޝަން ގްރޫޕް (ސީމެގް) ގެ އެޖެންޑާގައި ރާއްޖެ ނުހިމަނާ ގޮތަށް ފާއިތުވި ފެބްރުއަރީ މަހު ނިންމާފައި ވަނީ، ދިވެހިރާއްޖޭގެ ސަރުކާރުން އިސްލާޙުކުރަން ޖެހޭ ގިނަ ކަންތައް ތަކެއް ފާހަގަ ކުރުމަށް ފަހުއެވެ.
އެގޮތުން މާނަވީ ގޮތެއްގައި ހުރިހާ ފަރާތެއްގެ ބައިވެރިވުމާ އެކު، ސަރުކާރުން އިސްނަގައިގެން މަޝްވަރާތައް ފެށުމަށް ގޮވާލި އެވެ. މީގެ އިތުރުން ޖަލުގައި ނުވަތަ އެނޫން ވެސް ގޮތަކުން ބަންދުކޮށްފައިވާ ސިޔާސީ މީހުންތައް މިނިވަންކޮށް ބޭރުގައި ތިބި ސިޔާސީ މީހުންތައް ރާއްޖެ އާދެވޭނެ މަގު ފަހިކޮށް ދިނުމާއި އެ ހުރިހާ ފަރާތްތަކަށް ވެސް ސިޔާސީ ޕާޓީތަކުގެ މަޝްވަރާތަކުގަ އާއި ސިޔާސީ ހަރަކާތްތަކުގައި ބައިވެރިވެވޭނެ ޖާގަ ދިނުމަށް ސީމެގުން ގޮވައިލި އެވެ.
ސީމެެގް އިން ފެބްރުއަރީ މަހު ބޭއްވި ބައްދަލުވުމުގައި ވަނީ ރާއްޖެއިން ކުރަން ކަނޑައަޅާފައިވާ ކަންތައް އެގޮތަށް ކުރިޔަށް ގެންދާތޯ ސީމެގުން ބަލަން ޖެހޭނެ ކަމަށާއި އަދި އޭޕްރިލް މަހު ބާއްވާ ބައްދަލުވުމުގައި، ރާއްޖެއިން އިސްލާޙް ކުރުމަށް އެންގި ކަންތައް ފުރިހަމަ ކުރިތޯ ބަލާ ގޮތަށް ވަނީ ހަމަޖެހިފައެވެ.
ބަހާއި ޢަމަލުން ސިޔާސީ ކުށްވެރިންގެ މައްސަލައިގައި އެއްވެސް ދުލެއް ނުދޭނެ ކަން ދޭހަވާ ފަދަ މޭރުމަކުން ރައީސް އަބްދުﷲ ޔާމީން ވާހަކަ ދައްކަވަމުން ގެންދަވަނިކޮށް، ކުއްލި ގޮތަކަށް، ޖަލުގައި ބަންދުކޮށްފައި ތިބި އަަދާލަތު ޕާޓީގެ ރައީސް ޝެއިޚް އިމްރާން އަބްދުﷲ އާއި ކުރީގެ ޑިފެންސް މިނިސްޓަރ ތޮލްހަތް އިބްރާހިމް ކިލެގެފާނު ވަނީ ގޭ ބަންދަށް ބަދަލުކޮށްފައެވެ.
ހޯމް މިނިސްޓަރ އުމަރު ނަސީރު ވިދާޅުވެފައިވާ ގޮތުގައި، އިމްރާން އަބްދުﷲ އާއި ތޮލްހަތު ގޭ ބަންދަށް ބަދަލު ކުރީ، ހިންމަފުށީ އައްސޭރި ޖަލުގައި ޤާއިމްކޮށްފައިވާ، ސްޕެޝަލް ޕްރޮޓެކްޝަން ޔުނިޓް (އެސްޕީޔޫ) މަރާމާތަށް ބަންދު ކުރުމަށް ނިންމާފައިވުމުންނެވެ.
އެހެން ނަމަވެސް ދިވެހިރާއްޖޭގެ ޚާރިޖިއްޔާގެ ރަސްމީ ޓްވިޓާ އެކައުންޓުން ކޮށްފައިވާ، ޓްވީޓެއްގައި ބުނެފައި ވަނީ، "ސަރުކާރުން ޝެއިޚް އިމްރާން އަބްދުﷲ އާއި ތޮލްހަތު ގޭ ބަންދަށް ބަދަލު ކުރުމަށް ނިންމާފައިވާ" ކަމަށެވެ.
ތަންކޮޅެއް ފަހަތަށް ޖެހިލާއިރު ތަފާތު ބަހަނާތައް ދެއްކުމަށް ފަހު ސަރުކާރުން ވަނީ މީގެ ކުރިން ޖަލުގައި ބަންދުކޮށްފައިވަ ސިޔާސީ ކުށްވެރިން މާފުށީ ޖަލަށް ވެސް ބަދަލުކޮށްފައެވެ. މިފަހަރު އެ ގޮތް އިޚްތިޔާރު ނުކޮށް، ސިޔާސީ ކުށްވެރިންގެ ތެރެއިން މިވަގުތު ޖަލުގައި ތިއްބެވި ބޭފުޅުން ކުއްލިގޮތަކަށް ގޭ ބަންދަށް ބަދަލުކުރީ ކޮން ބޭނުމަކު ހެއްޔެވެ؟
ސީމެގުން ފެބްރުއަރީ މަހު ބޭއްވި ބައްދަލުވުމަގައި ރާއްޖެއިން ކުރުމަށް އެންގި ކަންތަކުގެ ތެރެއިން އެއް ކަމަކީ، ސިޔާސީ ފަރާތްތަކާއި އެކު މަޝްވަރާތައް ބޭއްވުމެވެ. ސީމެގަށް އިޖާބަ ދޭކަން ދެއްކުމުގެ ގޮތުން ސަރުކާރުން ވަނީ އަމާ ބުނީތީ ފަރަށް ދާ އުސޫލުން "މަޝްވަރާތަކެއް" ކުރިއަށް ގެންގޮސްފައެވެ.
އެހެން ނަމަވެސް އެ މަޝްވަރާތަކުގައި ބައިވެރިވެފައިވަނީ މުޅިން ވެސް ސަރުކާރަށް ތާޢީދު ކުރާ ޕާޓީތަކުންނެވެ. ސަރުކާރުން މަސައްކަތް ކުރަމުން ގޮސްފައި ވަނީ، މަޝްވަރާއަކަށް ވުރެ ބޮޑަށް އިދިކޮޅު ފަރާތްތައް ބައިބައި ކޮށްލުމަށެވެ. އެކަން ކާމިޔާބު ނުވީ، ސަރުކާރާޢި އެކު ވަކިން މަޝްވަރާކުރުމަށް އެމްޑީޕީ އިން އެއްބަސް ނުވުމުންނެވެ.
ސިޔާސީ ކުށްވެރިން މިނިވަން ކުރުމަށް ސީމެގުގެ އިތުރުން ބައިނަލްއަޤްވާމީ ޖަމިއްޔާތަކުން ގޮވާލުން އިތުރުވެފައިވާއިރު، ސަރުކާރުގެ ފަރާތުން ކުއްލިގޮތަކަށް އިމްރާން އަބްދުﷲ އާއި ތޮލްހަތް އިބްރާހިމް ކިލެގެފާނު ގޭ ބަންދަށް ބަދަލުކުރުމަކީ، ވެސް ސީމެގެ އެޖެންޑާގައި ހިމަނާފާނެތީ ކުރި ކަމެކެވެ.
ކުރީގެ ރައީސް މުޙައްމަދު ނަޝީދަށް ބޭސްފަރުވާއަށް ރާއްޖެއިން ބޭރަށް ދިއުމުގެ ޙުއްދަ ދީފައިވާއިރު، ކާނަލް ނާޒިމް އާއި ކުރީގެ މެންބަރު އަހްމަދް ނާޒިމް ވެސް ތިއްބެވީ ބޭސްފަރުވާއަށް ރާއްޖެއިން ބޭރުގައެވެ. އެހެންވީމާ، ރާއްޖޭގެ ޖަލުގައި ސިޔާސީ ކުށްވެރިޔަކު ނެތީ ތާއެވެ.
ސަރުކާރުން ޤަބޫލުކުރާ ގޮތުގައި، އިމްރާން އާއި ތޮލްހަތު ގޭ ބަންދަށް ބަދަލުކުރުމުން ސަރުކާރުގެ ހެޔޮފުޅުކަން ފެނި ސީމެގް ވެސް އާޝޯޚްވެދާނެއެވެ. މިއީ ރައީސް އަބްދުﷲ ޔާމީން ޑައިރެކްޓް ކުރައްވައި ދުންޔާ މައުމޫން އާއި އުމަރު ނަސީރު ކުޅުއްވާ "ކަސޯޓީ" ގެ ބޭނުމެވެ.
ސީމެގަށް ދެއްކުމަށް ސަރުކާރުން "ކަސޯޓީ" ކުޅުނެއް ކަމަކު، މިދިޔަ ހޯމަ ދުވަހު ރާއްޖޭގެ ގިނަ އަދަދެއްގެ ނޫސްވެރިންގެ ލޮލަށް އަސޭމިރުސް ސްޕްރޭ ޖަހައި، ރޯމާ ދުވާލު ފުލުހުން ލައްވައި ނޫސްވެރިންނަށް ކުރިވި އަނިޔާތައް ވެސް ބައިނަލްއަޤްވާމީ މުޖުތަމަޢް އަށް ވަރަށް ރަގަޅަށް ވަނީ ފެނިފައެވެ.
ދިވެހިރާއްޖޭގެ ޝަރުޢީ ނިޒާމް އިސްލާޙް ކުރުމުގެ ބަދަލުގައި، އެ ނިޒާމު 40 އަހަރު ފަހަތަށް ގެންގޮސް ފުލުސް ކޯޓު އުފެއްދުމަށް ނިންމުން ފަދަ ކަންތަކާއި، މިނިވަން މުއައްސަސާތައް ހިސާރުކުރުމަށް ރައީސް ޔާމީންގެ ސަރުކާރުން ކުރިއަށް ގެންދާ މަސައްކަތް ވެސް ބައިނަލްއަޤްވާމީ މުޖްތަމަޢް އިން ގެންދަނީ ވަރަށް ގާތުން ބަލަމުންނެވެ.
އެހެން ކަމުން ރައީސް ޔާމީންގެ "ޙިކްމަތް ޢަމަލީ" ބޭނުން ކުރައްވައިގެން ޑައިރެކްޓް ކޮށްފައިވާ "ކަސޯޓީ" އަކީ މިފަހަރު ސުޕަހިޓެއް ކަން ނުވަތަ ފްލޮޕެއްކަން ކުރިއަށް އޮތް މަދު ދުވަސްކޮޅެއްގެ ތެރޭގައި ހާމަވެގެންދާނެ އެވެ.