ރައީސް އަބްދުﷲ ޔާމީން ވެރިކަމަށް ވަޑައިގެންނެވި ގޮތާ މެދު، އިދިކޮޅު ފަރާތްތަކުން ވަރަށް ބޮޑަށް ސުވާލު އުފައްދަމުން ދިޔަ ނަމަވެސް، ބަލި ގަބޫލްކޮށް، އިދިކޮޅު ފަރާތްތަކުން މައިތިރިވި އެވެ. ބޭނުމަކީ ރާއްޖޭގެ ސިޔާސީ މަސްރަހު ހަމައަަކަށް އެޅުމަށް ފުރުސަތުދީ ހަމަޖެހިލައިގެން ރައްޔިތުންނަށް އުޅެވޭނެ ފުރުސަތު ފަހިކޮށް ދިނުމެވެ.
ވެރިކަން ކުރައްވަން ރައީސް ޔާމީނަށް އިދިކޮޅު ފަރާތްތަކުން ވަރަށް ބޮޑަށް މަގުތައް ތަނަވަސްކޮށް ދެމުން ގެންދިޔަ އެވެ. މައްސަލަތައް ބޮޑު 2013 ގެ އިންތިހާބަށް ފަހު، ހަގީގަތުގައި ރާއްޖޭގެ ސިޔާސީ މަސްރަހަށް ވަަރަށް ބޮޑު ފިނި ކަމެއް ލިބުނެވެ.
މަގުމަތީގައި އޭރު އޮތް އިދިކޮޅު އެންމެ ބޮޑު ޕާޓީ އެމްޑީޕީން މަގުމަތި ދޫކޮށް އެތެރަ އަށް ވަނެވެ. ބޭނުމަކަށްވީ ސުލްހަވެރި އަމާން މާހައުލެއްގައި ގާއިމުވެފައި އޮތުމަށް އެ ޕާޓީން ބޭނުންވުމެވެ.
ގިނަ ބަޔަކު ކުރިން އުންމީދުކޮށްގެން ތިބީ ރައީސް ޔާމީން ވަަރަށް އިހުލާސްތެރިކަމާއި އަމާނާތެރިކަމާ އެކު ވެރިކަން ކުރައްވާނެ ކަމަށެެވެ.
އެހެން ނަމަވެސް ކަންތައްތައް ދާން ފެށީ ދިމާ އިދިކޮޅަށެވެ. ސަރުކާރާ ކޯލިޝަން ހެދި ޖުމްހޫރީ ޕާޓީ އާއި އެ ޕާޓީގެ ލީޑަރަށް އެތައް ގޯނާއެއްކޮށް އެ ޕާޓީ ކޯލިޝަނުން ފައްސާލި އެވެ.
ކުރިއަށް ހުރި އިންތިހާބުތަކުގައި ވާދަކޮށްފާނެހެން ހީވާ ސިޔާސީ ލީޑަރުންގެ މައްޗަށް ތަފާތު ތުހުމަތުކޮށް، އެ މީހުން ހައްޔަރުކޮށް، ޖަލުގެ ކުޑަގޮޅި ދައްކަން ފެށި އެވެ. އެމްޑީޕީގެ ރައީސް މުހައްމަދު ނަޝީދުގެ މައްޗަށް ޕަޓާސް ބަރިއެއްހަން ޝަރީއަތްކޮށް 13 އަހަށް ޖަލަށްލި އެވެ.
މިފަދަ މައްސަލަތައް ފެންމަތިވާން ފެށުމުގެ ނަތީޖާއަކަށްވީ ސިޔާސީ މަސްރަހު އަނެއްކާ ވެސް ހޫނުވެ، އެމްޑީޕީ މަގުމައްޗަށް ނިކުންނަން މަޖުބޫރުވެ ގައުމުގެ ހާލަތު ހަލަބޮލިވުމެވެ.
ރައީސް އަބްދުﷲ ޔާމީންގެ ވެރިކަމުގައި ނޫނީ ތިން ޑިފެންސް މިނިސްޓަރެއްގެ މައްޗަށް ދައުވާކޮށް، ދެ ބޭފުޅުން ޖަލެއް ލެއްވި ދައުރެއް ނާދެ އެވެ. ވެރިކަމަށް ދެ އަހަރު ނުވަނީސް ދެ ނައިބް ރައީސުންނަށް ގޮންޖައްސަވައި އެ ބޭފުޅުން އެއްލަވާލެއްވި އެވެ.
ރައީސް ޔާމީންގެ މި ވެރިކަމަކީ ރާއްޖޭގެ ތާރީހުގައި މިހާތަނަށް ހިންގާފައިވާ އެންމެ ބޮޑު ކޮރަޕްޝަނާއި ފަސާދަ އާއި ވައްކަމާއި ޓެކުމުގެ މުއާމަލާތްތައް ހިންގާފައިވާ ވެރިކަމެވެ. ސަހަރޯ އެވެ. ދެން ވަގަށް ބަޔަކު ގޮވިޔަސް، އެކަމާ ކޮން ކަމެއްތޯ އެވެ؟ ދައުލަތުގެ މާލިއްޔާ އިން އެތައް ބިލިއަން ރުފިޔާއެއް "ބަނޑުއަޅައިފި" އެވެ.
ސީދާ ރައީސް އަޑީގައި ހުންނަވައިގެން ނޫނީ މިކަން ނުކުރެވޭނެ ކަމަށް ބަޔަކު ބުނުމުން ހައިރާން ވާނެ ބަޔަކު މިހާރަކު މި ގައުމަކު ނެތެވެ.
މުޅި މަޖިލިސް ތިމާމެން ބޭނުންހާ ކުޅިއެއް ކުޅެން އޮތް ތަނަކަށް ހަދައިގެން މެމްބަރުން ލައްވައި ރިޝްވަތު ފައިސާ ގޯނި ހިފައިގެން ދުވި މެމްބަރުން މި ސަރުކާރުގައި ނޫނީ ރާއްޖެ ނުދެކެ އެވެ.
އަދި އެއީ ގައުމީ ޖިހާދެއް ކަމަށް ބުނެ މެމްބަރުން މޭ ފުއްޕާފައި އެ ވާހަކަ ފަހުވެރިކަމާ އެކު ދައްކަން ކެރުނު ޒަމާނެއް މި ވެރިކަމުގައި ނޫނީ ރާއްޖޭގެ ތާރީހުގައި ވެސް ނުދެކެ އެވެ.
ހަމަ މި ސަރުކާރުގެ މަޖިލިސް މެމްބަރުން ނޫނީ، އިދިކޮޅު މެމްބަރުންގެ މޫނަށް އަނގަ ދޮވި ފެނާއި "ކުޅު ޖެއްސެވި" ސަރުކާރެއް އައިތޯ އެވެ؟
މަޖިލީހުގެ އިދާރާ އަށް ވަޑައިގެން، މެމްބަރުންނާ ދިމާއަށް "އިނގިލި އެރުއްވި" ރައީސެއް މީގެ ކުރިން ރާއްޖޭގެ ވެރިކަމުގެ ތާރީހުން ފެންނަން އެބަ އޮތް ހެއްޔެވެ؟
ކަނޑި އާއި ބަޑި އާއި ބޮން ފަޅުތެރެއިންނާއި ކަނޑު އަނޑިންނާއި އެއްގަމުން ފެނުން އާންމުވި ވެރިކަމެއް މި ނޫނީ ރާއްޖެ ނުދެކެ އެވެ.
ގައުމުގެ އަމާންކަން މިހާވަރަށް ގެއްލުނު ޒަމާނެއް ދިވެހިން ހަނދާނެއް ނެތެވެ.
ދިވެހި ގައުމާއި ރައްޔިތުންގެ ހިމާޔަތުގައި ތިބި ދިވެހި ސިފައިންނާއި ފުލުހުންނަކީ ކޮޕަރްޓްވެފައިވާ އަދި އިތުބާރު ގެއްލިފައިވާ ބައެއްް ކަމަށް ބުނެ ވާހަކަ ދެއްކީ ކޮން ސަރުކާރެއްގައިކަން ރައްޔިތުން ހަނދާން އެބަ ހުއްޓެވެ.
މީޑިއާ ނައްތާލުމާއި ހިޔާލުފާޅު ކުރުމުގެ މިނިވަންކަން ނިގުޅައިގަންނަން މިހާ ފާޅުކަން ބޮޑުކޮށް، ސަރުކާރަކުން މަަސައްކަތް ކުރަމުން ދިޔަ ދައުރެއް، މި ރައީސް ޔާމީންގެ ވެރިކަމުގައި ނޫނީ ނުހިނގަ އެވެ. މުށުތެރޭގައި ކޮންޓްރޯލް ކުރާ ޝަރުއީ ދާއިރާގެ ތެރެއިން ރާއްޖޭގެ އެންމެ ދުވަސްވީ ނޫސް ހުއްޓުވާލައި، މީޑިއާ އަނގަ ބަންދު ކުރަން މިހާ ފޯރީގައި މަސައްކަތް ކުރީ ކޮން ވެރިކަމެއްގައިތޯ އެވެ؟
މީޑިއާ ރެގިއުލޭޓް ކުރާ ބްރޯކްޑްކާސްޓިން ކޮމިޝަނަށް ވެރިކަން ކުރާ ޕާޓީގެ އެކްޓިވިސްޓުންތަކެއް އައްޔަން ކުރީ ކޮން ސަރުކާރެއްގައިތޯ އެވެ؟
ނޫސްވެރިން އެ މީހުންގެ ހައްގުތައް ހޯދަން މަގުމައްޗަށް ނިކުމެ ސުލްހަވެރިކަމާ އެކު އިހުތިޖާޖު ކުރުމުން 16 ނޫސްވެރިއަކު އެއްފަހަރާ ހައްޔަރުކޮށް، ފުލުހުންގެ އީދާރާ އަށް ހާޒިރުކޮށް ޖިނާއީ ދައުވާ އުފުލަން މަސައްކަތް ކުރަނީ ވެސް ހަމަ މި ސަރުކާރުންނެވެ. ދައްކާފައި ނުދައްކާނެ ވާހަކައެއް ނެެތެވެ.
މި ސަރުކާރުގެ މިހިރަ ދޯހަޅިކަމަކާ ހުރެ ބޭރު ދުނިޔޭގައި ވެސް މުޅި ރާއްގެ ބަދުނާމް، ނަން ހަޑި ވަނީ އެވެ. ދިވެހިންނަށް ފާކުރައްވާފައި މި އޮތީ ވާ ވެރިކަމެކެވެ. ސަރުކާރެކެވެ. ރައީސެކެވެ. ރައްޔިތުން ތިބީ ހޭލަ އެވެ.
އަބަދު އެޅިހާ ބަތަކަށް ރިހަވެެގެން ރައްޔިތުން ނުތިބޭނެކަން ހަނދާން ކުރާށެވެ. ވެރިކަން ކުރެވޭނީ ފަސް އަހަރުގެ ދައުރަކަށެވެ. ދެން އަންނަ ދައުރެއްއި ރައްޔިތުން ފިސާރަ ރަނގަޅު ފިލާވަޅެއް ދީފާނެ ތޯއްޗެކެވެ!
ވަކި ތަނެއްގައި ބްރިޖް އަޅާފައި ކުލަކުލަ އިން ތަންތަން ދިއްލައިގެން ރައްޔިތުން ހައްލާލަން އުުުޅުނަސް އެކަމެއް ނުވާނެ އެވެ.