"ހަވީރު" ނޫސް ހުއްޓުވާލުމާއި ނޫސްވެރިޔާ އަހުމަދު ރިލްވާން ގެއްލުވާލި މައްސަލާގައި މަގުމައްޗަށް އިހުތިޖާޖު ކުރަން ނިކުތީ ނޫސްވެރިން ނޫން ކަމަަށާއި އެއީ ކުށްވެރިންތަކެއް ކަމަށް ހޯމް މިނިސްޓަރުގެ ނައިބު އަހުމަދު ސިއްދީގް (އެމްވީއާރް ސިއްދީޤް) ވިދާޅުވެއްޖެ އެވެ.
އެމްވީއާރް ސިއްދީޤް ކުރެއްވި ޓްވީޓްތަކެއްގައި ވިދާޅުވީ ނޫސްވެރިން ނަމަ އިދިކޮޅު ސިޔާސީ މުޒާހަރާއެއް ނުކުރާނެ ކަމަށާއި އެއީ ފާސް އޮތަސް ނޫސްވެރިން ނޫން ކަމަށެވެ.
އޭނާ ކުރެއްވި އެހެން ޓްވީޓެއްގައި ވިދާޅުވީ ނޫސްވެރިއަކު ހައްޔަރު ނުކުރާ ކަމަށާއި ހައްޔަރު ކުރީ ގާނޫނާ ހިލާފު އަމަލުތަކެއް ހިންގަން އުޅުނު ބަޔަކު ކުށުގެ ވެށިން ކަމަށެވެ.
އެމްވީއާރް ސިއްދީޤް ވަނީ ނޫސްވެރިން ކަމަށް ބުނާ ބަޔަކު ނުލިބިގެން އުޅެނީ ކޮން ހައްގެއްތޯ ކަމަށް ވިދާޅުވެ ސުވާލު އުފައްދަވައިފަ އެވެ.
"ކުށް ގަބޫލްކޮށް، ދެން އެފަދަ ކުށް ނުކުރުން ބުއްދިވެރި،" އެމްވީއާރް ސިއްދީޤްގެ ޓްވީޓްގައި ވިދާޅުވި އެވެ.
އާދީއްތަ ދުވަހު ރައީސް އޮފީސް ކައިރިއަށް އެއްވެ އިހްތިޖާޖްކުރި ނޫސްވެރިންނަކީ "ނޫސްވެރިން ކަމަށް ބުނާ ބައެއް" ކަމަށް ހޯމް މިނިސްޓަރު އަމަރު ނަސީރު ވެސް ވިދާޅުވެފައިވެ އެވެ.
އެމްވީއާރް ސިއްދީޤް އަކީ، ހޯމް މިނިސްޓަރުގެ ނައިބު އަހުމަދު ސިއްދީގް އަށް ސޯޝަލް މީޑިޔާގައި މަޝްހޫރުވެފައިވާ ނަމެވެ. އެބޭފުޅާއަށް މުޚާތަބުކޮށް މިނަން ކިޔަމުން ދަނީ، ކުރެއްވި ޓްވީޓެއްގައި ރާއްޖޭގެ ނަން ކުރުކޮށް ލިޔުއްވަން ހައްދަވައިގެން "އެމްވީއާރް" ލިޔުމުންނެވެ. އެމްވީއާރް ރަމްޒުކޮށްދެނީ ދިވެހި ރުފިޔާއެވެ.