ޔުއެފާ ޗެމްޕިއަންސް ލީގުގެ ކުއާޓާ ފައިނަލުގައި ސްޕެއިންގެ ދެ ބާރު ކަމުގައިވާ ބާސެލޯނާ އަދި އެތުލެޓިކޯ މެޑްރިޑް މިރޭ ބައްދަލު ކުރާ އިރު، އެތްލެޓިކޯ އަކީ ސްޕެއިންގައި ބާސާގެ ފަހަތުން ދެން އޮތް އެންމެ ވަރުގަދަ ޓީމު ކަމުގައި ބާސާގެ ޑިފެންޑަރު ޖެރާޑް ޕީކޭ ބުނެފި އެވެ.
ޕީކޭ ގެ މިބަސް އަމާޒުވެފައިވަނީ ރިއަލް މެޑްރިޑަށެވެ. "އެލް ކްލެސިކޯ" ގައި ރިއަލް އަތުން ބަލިވުމަށް ފަހު ޕީކޭ ބުނެފައި ވަނީ ކްލެސިކޯ އަށް ވުރެ އެތްލެޓިކޯ މެޗު އުނދަގޫ ވާނެ ކަމަށެވެ.
ސްޕެނިޝް ލަލީގާގެ ޓޭބަލުގެ އެއްވަނައާއި ދެވަނައިގައި އޮތް ދެ ޓީމު މިރޭ ވާދަ ކުރާ އިރު ބާސާގެ ކޯޗު ލުއިސް އެންރީކޭ ބުނެފައި ވަނީ ކްލެސިކޯ ބަލިން ހިތްވަރު ލިބިފައިވާ ކަމަށާއި އެތުލެޓިކޯ އާ ދެކޮޅަށް ނިކުންނާނީ އާ ހިތްވަރަކާއި އާ ޖޯޝަކާ އެކު އެ މީހުން ބަލި ކުރުމަށެވެ.
ކެޕްޓަން އަންޑްރޭ އިނިއެސްޓާ ވެސް ވަނީ ޓީމަށް އެ ބަލި ހަނދާން ނައްތާލައި އެތުލެޓިކޯ މެޗަށް ސަމާލު ވާން ނަސޭހަތްތެރިވެފަ އެވެ.
ތިރީސް ނުވަ މެޗުން ބަލި ނުވެ ބާސާ އިން ގެންގޮސްފައިވާ ރިކޯޑަށް ރިއަލް އިން ހުއްޓުމެއްގެނެސްފައިވާއިރު ކުރީގެ ބާސާގެ ތަރި ތިއެރީ އޮންރީ ބުނެފައިވަނީ އޭގެ ސަބަބުން ބާސާގެ ހުރިހާ ކުޅުންތެރިންނަށް ވަނީ އަސަރުކޮށްފައި ކަމަށެވެ. އަދި އެތުލެޓިކޯ މެޗަކީ ބާސާއަށް އުނދަގޫ މެޗަކަށް ވާނެ ކަމަށްވެސް އޮންރީ ބުނެފައިވެ އެވެ.
މިދިޔަ ސީޒަނުގައި ބޮޑު ތިން މުބާރާތް ކާމިޔާބުކޮށް 'ޓްރެބްލް' ބާސާ އިން ހަދާފައިވާއިރު ރިއަލް އަދި އެތްލެޓިކޯއަށް ވެސް ވަނީ ބާސާ ހުއްޓުވޭނެ ގޮތެއް ނުވެފަ އެވެ.
ލަލީގާ ނަގައި، ކޮޕަ ޑެލްރޭގައި އެތްލެޓިކް ބިލްބާއޯ ބަލިކޮށް ތަށި ނެގި އިރު، އެ މުބާރާތުގައި އެތުލެޓިކޯ ވެސް ބަލިކޮށްފައިވެ އެވެ.