ރާއްޖޭގެ ކުޅިވަރާ ބެހޭ ވަޒީރު އަހްމަދު ޒުހޫރު ގަތަރުގެ ވިޔަފާރިވެރިންތަކަކާ ބައްދަލު ކުރުމަށް ހުޅުމާލޭ އެކްސްޕްރެސް ލޯންޗުގައި ވަޑައިގެންނެވުމުން މާލެ އާއި ހުޅުމާލެ އާ ދެމެދު ކުރަމުން އަންނަ އެކްސްޕްރެސް ދަތުރުތައް ދެ ގަޑި އިރަށް މެދުކެނޑިއްޖެ އެވެ.
މައުލޫމާތު ލިބިފައިވާ ގޮތުން އިއްޔެގެ ވަގުތެއްގައި މިނިސްޓަރު ޒުހޫރު ގަތަރުގެ އިންވެސްޓަރުންތަކަކާ ބައްދަލު ކުރުމަށް ފުރާވަޑައިގަތުމަށް އެމްޓީސީސީން ލޯންޗެއް ހޯދުމަށް މަސައްކަތް ކުރުމުން އެ ގަޑީގައި ލޯންޗް ހަމަޖެހޭ ގޮތެއް ނުވި އެެވެ.
އެމްޓީސީސީގެ ސްޓާފުން ހުރިހާ ލޯންޗުތައް ދަތުރުތަކުގައި ވުމުން އެގަޑިއަށް ލޯންޗެއް ހަމަޖެއްސެން ނެތް ކަމަށް ވަނީ ޒުހޫރަށް އަންގައިފަ އެވެ. މިނިސްޓަރު ޒުހޫރުގެ ދަތުރުފުޅަކީ އެނގިފައިވާ ގޮތުން އެމަނިކުފާނުގެ އަމިއްލަ ދަތުރުފުޅެކެވެ.
އެކަމާ ޒުހޫރު ކޯފާވެ އެމްޓީސީސީގެ އިސްވެރިންނަށް ގުޅުއްވާ ޝަކުވާ ކުރެއްވުމުން އެމްޓީސީސީގެ ވެރިން ވަނީ ހުޅުމާލެ އާއި މާލެ އާ ދެމެދު ދަތުރުކުރާ ލޯންޗުގެ ދަތުރުތައް މެދުކަނޑާލުމަށް ފަހު މިނިސްޓަރުގެ ދަތުރަށް ލޯންޗު ހަމަޖެއްސުމަށް އަންގައިފަ އެވެ.
އެމްޓީސީސީ ކީ ހުޅުމާލޭ-މާލޭ ދަތުރުތައް ކުރާ ހަމައެކަނި ކުންފުނި ކަމުން މިނިސްޓަރުގެ ދަތުރަށް ލޯންޗު ގެންދެވުމުން ވަރަށް ބޮޑަށް ދަތިވެގެން ދިޔަކަމަށް އެމްޓީސީސީގެ އޮފިޝަލަކު "އައްޑޫ ލައިވް" އަށް މައުލޫމާތު ހިއްސާ ކުރަމުން ވިދާޅުވި އެވެ.
މިނިސްޓަރު ޒުހޫރުގެ އަމިއްލަ ދަތުރަކަށް ޕަބްލިކް ޓްރާންސްޕޯޓް މެދުކަނޑާލުމަށްފަހު ލޯންޗު ގެންގޮސްފައި މި ވަނީ ސަރުކާރުގެ އިސްވެރިން ދައުލަތުގެ ވަސީލަތްތައް އަމިއްލަ ބޭނުމަށް ބޭނުން ރަމުން ދާކަމުގެ އަޑުތައް ވަރަށް ބޮޑަށް ގަދަވެފައިވާ ދަނޑިވަޅެއްގަ އެވެ.