މާލެ ފިޔަވައި ރާއްޖޭގެ އެންމެ ބޮޑު އާބަދީ އޮތް އެއ ްތަނަކީ އައްޑު އަތޮޅު ކަމާ މެދު ދެބަސް ވާނެ އެއްވެސް ދިވެހި ރައްޔިތެއް ނުހުންނާނެކަން ކަށަވަރެވެ. މީގެ ގާތްގަނޑަކަށް 25 އަހަރު ކުރިން ސ. ހިތަދޫގައި ބިނާކޮށްފައިވާ ހިތަދޫ ރީޖަނަލް ހޮސްޕިޓަލުން ގިނަ ޢަދަދެއްގެ އައްޑޫ ރައްޔިތުންގެ އިތުރުން މި ސަރަހައްދުގެ ގިނަ ރަށްތަކުން ދިޔައީ ދާދި ފަހަކާ ޖެހެންދެން ވެސް ފަރުވާ ހޯދަމުންނެވެ.
ސިއްހީ ޚިދުމަތަކީ ވަރަށް އަސާސީ އަދި ދުވަހުން ދުވަހަށް ގިނަ އަދަދެއްގެ ރައްޔިތުނަށް އެހީވުމަށް ބޭނުން ކުރަމުންދާ ޚިދުމަތެކެވެ. ނަމަވެސް ހިތާމައަކީ މި އަތޮޅުގައި ސަރުކާރުން ބިނާކޮށްފައިވާ ރީޖަނަލް ހޮސްޕިޓަލްގެ ޚިދުމަތް ދުވަހުން ދުވަހަށް ދަށްވެ، ގިނަ ޢަދަދެއްގެ ރައްޔިތުން ތަހައްމަލު ކުރަނީ ދުލުން ބުނަން ވެސް ނޭނގޭހާ ހިތްދަތި އިހްސާސް ތަކެއްކަން ކަށަވަރެވެ.
ހުރިހާ ވެސް މައްސަލައަކީ ސިޔާސީ ކުރަން ނުޖެހޭ ތަންތަން ސިޔާސީ ބޭނުމަށް، ހާއްސަކޮށް ސިއްހީ ކިދުމަތް ދޭ ތަންތަން ސިޔާސީ ކުރެވުމެވެ. މިފަދަ ތަންތަނަކީ ސިޔާސީ ބޭނުމަށް ވުރެ އިންސާނިއްޔަތަށް ޚިދުމަތް ކުރުމަށް ބިނާކޮށްފައިވާ ތަންތަނެވެ. މިފަދަ ތަންތަނުން ދެވޭ ޚިދުމަތް ވާން ޖެހޭނީ ވެސް ވަރަށް ހަމަހަމަ ކަމާއިއެކުކަން ވެސް ކަށަވަރުވާން ޖެހެ އެވެ.
އެންމެ ފުރަތަމަ ވެސް ހޮސްޕިޓަލް ހިންގާނެ ރަނގަޅު،ޒިންމާރު މެނޭޖްމަންޓް ޓީމެއް ނެތެވެ. ކަމަށް ގާބިލް ތަޢުލީމީ ބޭފުޅުން ވެސް މަދުކަން ފާހަގަ ކުރެވެ އެވެ. އައްޑު އަށް ވުރެ އާބާދީގެ ގޮތުން މާ ކުޑަ އަތޮޅުތަކުގައި ވެސް ސިއްޙީ ޚިދުމަތް މާ ރަނގަޅަށް ލިބެމުންދެއެވެ. އަދި މާ ފެންވަރު ރަނގަޅު ޑޮކްޓަރުން ވެސް އެތަންތަނުގައި މަސައްކަތްކުރެ އެވެ. ޑޮކްޓަރުން ހޯދުމަކީ އެހާ ފަސޭހަކަމެއް ނޫނެވެ. ނަމަވެސް ޑޮކްޓަރުން ނުލިބެއޭ ކިޔާފައި ޑޮކްޓަރުން ހޯދުމަށް ވެސް އެކަށީގެންވާ މަސައްކަތްތަކެއް ކުރެވެމުން ނުދާކަން ފާހަގަ ކޮށްލެވެ އެވެ.
ރާއްޖޭގެ އެންމެ އާބާދީ ބޮޑު އެއް އަތޮޅުގައި ގާއިމުކޮށްފައިވާ ހޮސްޕިޓަލުން ދެވޭ ކިދުމަތްތަކާއި އެތަނުގައި ހުރި މައްސަލަތަކާ މެދު ސަރުކާރުން ފަރުވާ ކުޑަކޮށްފައިވާ މިންވަރު އެހޮސްޕިޓަލުން ޚިދުމަތް ލިބި ގަންނަ އެންމެހާ ރައްޔިތުންނަށް ވަރަށް ރަނގަޅަށް ތަޖުރިބާ ކުރެވެމުން ދާނެ ކަމާމެދު އެއްވެސް ޝައްކެއް ނެތެވެ. މިތަން ތަނުގެ ޚިދުމަތުގެ ފެންވަރާއި ތަނުން ލިބެން ހުރި ވަސީލަތްތަކާއި، މުވައްޒަފުން ހިދުމަތް ލިބި ގަންނަ މީހުންނާ ކުރާ މުޢާމަލާތުންވެސް ވަރަށް ރަނގަޅަށް ދޭހަވާކަން ކަށަވަރެވެ.
މިހާރު މުޅި ހޮސްޕިޓަލްގައި މަސައްކަތް ކުރަމުންދާ ޑޮކްޓަރުންގެ އެންމެ ސީނިއަ ޑޮކްޓަރަކީ ވަރަށް އާދައިގެ ޑޮކްޓަރެކެވެ،. މުޅި ހޮސްޕިޓަލުން ފަރުވާ ހޯދާ ގިނަ ބަލި މީހުންނަށް ފަރުވާ ދެމުން ދަނީ އެންމެ ޑޮކްޓަރެކެވެ. އޭނާއަކީ އެއްވެސް ދާއިރާއަކުން ސްޕެޝަލައިޒްވެފައިވާ މީހެއް ނޫނެވެ. ނަމަވެސް ހޮސްޕިޓަލްގެ ސީނިއަ މެނޭޖަމަންޓުން މި ޑޮކްޓަރަކީ މާ މޮޅު މީހެއްކަން ދައްކަން ގިނަގުނަ މަސައްކަތްތަކެއް ކުރަމުން ދާކަން ވެސް ފާހަގަކޮށްލެވެ އެވެ.
ހޮސްޕިޓަލަކީ ވަކި ހާއްސަ ގަނޑިތަކެއްގައި ނޫނީ ބަލި މީހުން ކައިރި އަށް ޒިޔާރަތް ކުރެވޭ ތަންތަނެއް ނޫނެވެ. ނަމަވެސް ހިތަދޫ ރީޖަނަލް ހޮސްޕިޓަލަކީ މިފަދަ ގޮތަކަށް އިންތިޒާމު ކުރެވިގެން ހިނގާ ތަނެއް ނޫނެވެ. ގިނަ އަދަދެއްގެ މީހުން އަބަދުވެސް ހޮސްޕިޓަލް ތެރެއަށް ވަދެ ބަލި މީހުންނަށް އުނދަގޫވާ ގޮތަށް އުޅުމުން ހޮސްޕިޓަލުން އެކަމާ އަޅާލާ ތަނެެއް އަމުދަކުން ނުފެނެ އެވެ. މިއީ ކަންބޮޑުވާ މައްސަލައެެކެވެ. އަދި އެ ޝަކުވާ ބަލި މީހުންގެ އެހީތެރިން ކުރިޔަސް އެކަމަށް މާ ބޮޑު ސަމާލުކަމެއް ނުދޭކަންވެސް ފާހަގަ ކޮށްލެވެ އެވެ.
ތަނުގެ ސިކިއުރިޓީ، ޚާއްސަކޮށް ރޭގަނޑު ގަޑީގައި ހޮސްޕިޓަލްގެ ކަންތައްތައް ބެލެހެއްޓުމުގައި ޒިންމާދާރު ވެރިއެއް ނެތުމަކީ ވެސް ވަރަށް ހިތާމަ ކުރަންޖެހޭ ކަމެކެވެ. ސަރުކާރުން މި ހޮސްޕިޓަލް ހިންގުމުގައި އިހުމާލުވެފައިވާ މިންވަރާ މެދު ފުންކޮށް ވިސްނަން ޖެހެ އެވެ. އަދި ހޮސްޕިޓަލުން ދެވެމުންދާ ސިއްޙީ ޚިދުމަތްތަކާއި މެދު ފުންކޮށް ވިސްނަން ވެއްޖެކަން ކަށަވަރެވެ.
ފެންވަރު ރަނގަޅު ޑޮކްޓަރުން ނުލިބެންވީ އެއްވެސް ސަބަބެއް ނެތެވެ. ޑޮކްޓަރުން ވެސް ލިބޭނީ އެކަމަށް އިޚްލާސްތެރިކަމާ އެކު މަސައްކަތް ކޮށްގެންނެވެ.