އައްޑޫގައި ހުރި ތާރީހީ އާސާރީ ތަންތަން ބެލުމަށް ހެރިޓޭޖް ޑިޕާޓްމަންޓްގެ ޓީމެއް އައްޑު އަށް އަންނަ ގޮތަށް ހަމަޖެހިއްޖެ އެވެ.
ކައުންސިލުން ދާދި ފަހުން ވަނީ މާލެ އަށް ކުރި ދަތުރެއްގައި އެޑިކޭޝަން މިނިސްޓްރީގެ ދަށުން ހިންގާ ހެރިޓޭޖް ޑިޕާޓްމަންޓާ ބައްދަލުކޮށްފަ އެވެ.
ކައުންސިލުން ބުނީ އެ ބައްދަލުވުމުގައި އައްޑޫގެ އާސާރީ ތަންތަން ހިމާޔަތްކޮށް ރައްކާތެރި ކުރުމާ ބެހޭ ގޮތުން ވާހަކަ ދެއްކުމުން އައްޑޫގައި ހުރި އެފަދަ ތަންތަނުގެ ލިސްޓެއް ފޮނުވައި ދިނުމަށް އެދިފައި ކަމަށެވެ. އަދި ހެރިޓޭޖްގެ ޓީމެއް އައްޑު އަށް ވަރަށް އަވަހަށް ޒިޔާރަތް ކުރާނެ ކަމުގެ ޔަގީންކަން ވެސް ދީފައިވާ ކަމަށް ކައުންސިލުން ބުންޏެވެ.
"އަޅުގަނޑުމެން ފާހަގަ ކުރި ތަންތަނުގެ ތެރޭގައި ގަމުގެ ހުކުރު މިސްކިތާއި މާރަނގަ ފަދަ ތަންތަން ހިމެނޭ. އޭގެ އިތުރަށް ވެސް ހިމާޔަތް ކުރަން ޖެހޭ ވަަރށް ގިނަ ތަންތަން އައްޑޫގައި ހުރި ކަމަށް އަޅުގަނޑުމެން ގަބޫލު ކުރަނީ،" ކައުންސިލްގެ އޮފިޝަލަކު ވިދާޅުވި އެވެ. "އެހެންވެ އެފަދަ ތަންތަން ހިމާޔަތް ކުރުމަކީ ވަރަށް މުހިއްމު ކަމެއް."
އައްޑޫގައި ހުރި އާސާރީ ތަންތަނުގެ ތެރެއިން ދެވަނަ ބޮޑު ހަނގުރާމައިގެ ދުވަސްވަރު އިނގިރޭސީން މަރަދޫގައި ބިނާ ކުރި ބޮޑަގެ ވެސް މަރާމާތުކޮށް، ދާރުލްއާސާރީއެއް ހިމެނޭ ގޮތަށް ތަރައްގީ ކުރުމުގެ މަސައްކަތް ކައުންސިލުން ވަނީ ފަށާފަ އެވެ.
ކައުންސިލުން ބުނީ ހެރިޓޭޖްގެ ޓީމެއް އައްޑު އަށް އަންނާނެ ވާހަކަ ބުނި ނަމަވެސް އެ ޓީމް އަންނާނެ ސީދާ ދުވަހެއް ނުބުނާ ކަމަށެވެ.
"ވަރަށް އަވަހަށް ޓީމެއް ދާނެ ކަމުގެ ޔަގީންކަން ދިން،" އޮފިޝަލް ވިދާޅުވި އެވެ.