ނޫސްވެރިންގެ ހައްގުތައް ހިމާޔަތްކޮށް ދިނުމަށް ގޮވާލައި "ހަމަ ހިމޭން ހިނގާލުން" ގެ ނަމުގައި މިއަދު ހަވީރު ބާއްވާ ހިނގާލުން ކުރިއަށް ގެންދިއުމުގެ ފުރުސަތު ނުދޭނެ ކަމަށް ފުލުހުން ބުނި ނަމަވެސް، ކުރިން ވެސް ރޭވިފައިވާ ގޮތަށް ހިނގާލުން ކުރިއަށް ގެންދާނެ ކަމަށް ނޫސްވެރިން ބުނެފި އެވެ.
މިއަދުގެ ހިނގާލުން ފެށުމަށް ހަމަޖެހިފައިވަނީ، ހަވީރު 4:30 ގައި އާޓިފިޝަލް ބީޗް ސަރަހައްދުންނެވެ. އާޓިފިޝަލް ބީޗް ސަރަހައްދުން ފެށިގެން ރަސްފަންނާއި ހަމައަށް ހިނގާލުމަށް ނިންމާފައިވާކަމަށް މި ހަރަކާތް އިންތިޒާމް ކުރާ ނޫސްވެރިން ބުނެ އެވެ.
މި ހިނގާލުމުގައި އަޑުގަދަ ކުރުމާއި ވާހަކަދެއްކުން ވެސް ނޯންނާނެ ކަމަށާއި ހިނގާލުމުގައި ނޫސްވެރިން ކުރިއަށްދާނީ ނޫސްވެރިންގެ ކަންބޮޑުވުންތައް ލިޔެފައިވާ ލިޔުންތަކާ އެކުގަ އެވެ،
ރާއްޖޭގެ އެންމެ ދުވަސްވީ އަދި އެންމެ ބޮޑު ނޫސް، "ހަވީރު" ހުއްޓާލުމާއި ނޫސްވެރިޔާ އަހުމަދު ރިލްވާން ގެއްލުވާލި މައްސަލާގައި ނޫސްވެރިން މިދިޔަ އާދީއްތަ ދުވަހު އިހްތިޖާޖު ކުރުމުން 16 ނޫސްވެރިއަކު ވެސް ހައްޔަރު ވެސް ކުރި އެވެ.
ނޫސްވެރިންގެ ހިނގާލުން ބޭއްވުމަށް ފުރުސަތު ނުދޭނެ ކަމަށް ފުލުހުން ބުނެފައިވާއިރު ދާދިފަހުން އޯޓިޒަމް އެސޯސިއޭޝަނުން ވެސް މަޖީދީމަގުގައި ހިނގާލުމެއް ބާއްވާފައިވެއެވެ. އެ ހިނގާލުން ބޭއްވުމަށް ހުއްދައެއް ނަގާފައި ނުވާކަމަށް ވެއެވެ.