މަގުމަތީގައި ހެދޭ ފެން ބޭރު ކުރަން ހިތަދޫގެ ބައެއް ސަރަހައްދުތަކުގައި ބަހައްޓާފައި ހުރި ކާނުތަކުން ރަށުތެރެއަށް ލޮނު އަރައި، މަގުމަތީގައި ފެންބޮޑުވާތީ އާންމުންގެ ޝަކުވާތައް ބޮޑުވެއްޖެ އެވެ.
ހިތަދޫގެ އިތުރުން ފޭދުއަކީ ވެސް ދިޔަވަރު ބޮޑުވާ ވަގުތުތަކުގައި މި މައްސަލަ ދިމާވާ އަވަށެެކެވެ.
މިއަދު ކާނުތަކުން މަގު މައްޗަށް އަރައި، ބައެއް ސަރަހައްދުތަކުގައި ވަނީ ފެންގަނޑު ހެދިފަ އެވެ. މި މައްސަލަ އަށް އެންމެ ބޮޑަށް ހިތަދޫގައި ދިމާވަނީ ލިންކް ރޯޑްގައި ހުންނަ އައިސް ޑިލައިޓް ރެސްޓޯރަންޓާ ދިމާލުންނެވެ.
ހިތަދޫން ވާހަކަ ދެއްކި ބައެއް މީހުން ބުނީ ލޮނުކަން ނޭނގި މަގުމަތީގައި ހުރި ފެންގަނޑުތަަކަށް ސައިކަލާއި ކާރާ އެކު ވެސް އެރިފައިވާ ކަމަށެެވެ.
"މި ދުވަސްކޮޅު ކުޑަކޮށް ވާރޭ ވެސް އެބަވެހޭތާ. ވާރޭ ފެން ކަމަށް ހީކޮށް އެހާ ވަރަށް ނުބަލައި ފެންގަނޑަށް އެރުނު ފަހުން އެހެން މީހެއްގެ ފަރާތުން އެނގުނީ ލޮނުގެ ތެރެއަށްކަން އެރުނީ ސައިކަލާ އެއްކޮށް،" ހިތަދޫ މީހަކު ބުންޏެެވެ.
އައްޑޫގެ މަގުތައް މަރާމާތުކޮށް، ބަލަހައްޓާ މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަން (އެމްއާރްޑީސީ) ގެ އޮފިޝަލަކު ބުނީ، ކާނުތަކުން ދިޔަވަރު ބޮޑު ވަގުތުތަކުގައި ލޮނު އަރާ މައްސަލަ ފާހަގަ ކުރެވިފައިވާ ކަމަށެވެ.
އޭނާ ބުނީ އެގޮތަށް ދިމާވަނީ ބައެއް ކާނުތައް ހުރި ސަރަހައްދުތަކުގެ ބިންގަނޑާއި މޫދާ ލެވެލް އެއްވަރުވުމުން ކަމަށެވެ.
އެހެންވެ ކާނުތައް ފުންކޮށްގެން އެ މައްސަލަ އަށް ހައްލެއް ހޯދަން މަސައްކަތް ކުރަމުން އަންނަ ކަމަށް އެމްއާރްޑީސީން ބުންޏެވެ.