ކުރީގެ ހެލްތު މިނިސްޓަރު ޑރ. މަރިޔަމް ޝަކީލާ އިނގިރޭސި ބަހުން ލިޔުއްވާފައިވާ ޕޮއެމްތަކެއް ހިމެނޭ ފޮތެއް ނެރުއްވައިފި އެވެ.
ފަސްދޮޅަސް ސޮފްހާގެ މި ފޮތުގެ ނަމަކީ "ހޯޕް ބިޔޯންޑް ޝެޑޯސް އޮފް ޕެއިން" އެވެ.
މި ފޮތް މިހާރު އޮންލައިންކޮށް ވެސް ގަންނަން ލިބެން ހުއްޓެވެ. އެމޭޒަން އިން ފޮތް މިހާރު ގަންނަން ލިބޭނެ އެވެ. ހާޑްކަވާގައު ފޮތް ވިއްކަނީ 24.99 ޑޮލަރަށެވެ. އަދި ޕޭޕަބެކްގައި 15.99 އަށް ލިބޭނެ އެވެ.
އައްޑޫ ހިތަދު އަށް އުފަން ޑރ. ޝަކީލާގެ ޕޮއެމް ފޮތުގައި ހިމަނާފައި ވަނީ ދިރިއުޅުމުގެ އެކި މަރުހަލާތަކުގައި ތަޖުރިބާ ކުރަން ޖެހުނު ކަންތައްތަކުގެ މައްޗަށް ބިނާކޮށް އޭނާ ލިޔެފައިވާ އަސަރު ގަދަ ޕޮއެމްތަކެވެ.
އޭގެ ތެރޭގައި އުފާވެރިކަމާއި ހިތާމަ އާއި ވޭނާއި ކެކުޅުމުގެ އިހުސާސްތައް ގެނުވައިދޭ ޕޮއެމްތައް ހިމެނެ އެވެ.
"ހޯޕް ބިޔޯންޑް ޝެޑޯސް އޮފް ޕެއިން" އާ ބެހޭ ގޮތުން ފޮތުގެ ފަހަތު ކަވަރުގައި ޑރ. ޝަކީލާ ވިދާޅުވީ އޭނާގެ މި ޕޮއެމް ފޮތް އެހެން ބަޔަކަށް އެހީތެރިއަކަށް ވާނެ ކަމަށް އުންމީދު ކުރައްވަ އެވެ.
އަދި ތިމާއަކީ އެކަނިވެރިއެއް ކަަމަށް އިހުސާސް ކުރެވޭ ނަމަ، އެ ފަދަ ފަރާތްތަކަށް ފޮތުން ތަސައްލީއެއް ގެނެސް ދޭނެ އެވެ. އުންމީދުތަކެއ ގެނެސް ދޭނެ އެވެ.
ޑރ. ޝަކީލާއަކީ އާންމުކޮށް އޮސްޓްރޭލިއާ ދިރިއުޅުއްވާ ކަނބަލެކެވެ. އޭނާ ވަނީ ޑރ. މުހައްމަދު ވަހީދު ހަސަން މަނިކުގެ ވެރިކަމުގައި އެންވަޔަރަމަންޓް މިނިސްޓަރުކަން ކުރައްވައު، މިހާރުގެ ސަރުކާރުގައި ދުވަސްކޮޅަކަށް ހެލްތު މިނިސްޓަރުކަން ވެސް ކުރައްވައިފަ އެވެ.
އަދި ޝަކީލާގެ އާއިލީ ކުންފުންޏަކުން ރިސޯޓް ހިންގުމާއި ހޮސްޕިޓަލް ހިންގުން ފަދަ ވިޔަފާރި ކުރެ އެވެ. ހިތަދޫގައި ހުންނަ އައިއެމްޑީސީ ހޮސްޕިޓަލަކީ ޝަކިލާގެ ހިއްސާ އޮންނަ ސިމްޑީން ހިންގާ ހޮސްޕިޓަލެކެވެ.