އެންޓި ކޮރަޕްޝަން ކޮމިޝަން (އޭސީސީ) ގެ ރައީސްގެ މަގާމުގައި ހަސަން ލުތުފީ ދެމި ހުރިހާ ދުވަހަކު ފެނަކަ ކޯޕަރޭޝަންގެ މެނެޖިން ޑިރެކްޓަރު މުހައްމަދު ނިމާލްގެ މައްސަލަ ނުބެލޭނެ ކަމަށް އޭނާ ވިދާޅުވެއްޖެ އެވެ.
ނިމާލް މިހެން ވިދާޅުވެފައި ވަނީ ފެނަކައިގެ މެނޭޖަރުން ފެންވަރު ބޭފުޅުންނާ އެކު ބޭއްވި ބައްދަލުވުމެއް ނިންމަވާލެއްވުމަށް ފަހު ދެކެވުނު ނުރަސްމީ ވާހަކައިގެ ތެރޭގަ އެވެ.
މި ބައްދަލުވުމުގައި ބައިވެރިވި މެނޭޖަރަކު ނަން ހާމަ ނުކުރުމަށް ޝަރުޠުކޮށް އައްޑޫ ލައިވް އަށް މައުލޫމާތުދެމުން ވިދާޅުވީ ހަސަން ލުތުފީ މަގާމުގައި ހުއްޓާ ނިމާލް އަދި ފެނަކައިގެ ކޮރަޕްޝަނުގެ އެއްވެސް މައްސަލައެއް އޭސީސީން ނުބެލޭނެ ކަމުގެ ޔަގީންކަން އޮތް ކަމަށް ނިމާލް ވިދާޅުވި ކަމަށެވެ.
އެފަރާތުން އިތުރަށް މައުލޫމާތު ދެމުން ވިދާޅުވީ ލުތުފީ ނިމާލްގެ މައްސަލަތައް ބެލިޔަނުދީ ހިފަހައްޓަންޖެހޭ ސަބަބަކީ ލުތުފީ އެދިގެން ވަރަށްގިނަ ކަންކަން ނިމާލްވެސް މިހާތަނަށް ނުގަވާއިދުން ކޮށްދީފައިވާތިކަމަށެވެ.
މިގޮތުން ލުތުފީގެ އެދިލެއްވުމަށް މަގާމުތައް އުފެއްދެވުމަށްފަހު އެތައް ބަޔަކަށް ވަޒީފާ އެކުންފުނިން ހަމަޖެއްސިކަމަށް ނިމާލް އެދުވަހު ވިދާޅުވެފައިވެއެވެ. އަދި އެގޮަތަށް އުފެއްދި ބައެއް މަގާމުތަކުގައި މިއަދާއި ހަމައަށްވެސް އެއްވެސް މަސައްކަތެއް ނެތި ތިބި މީހުން ތިބޭނެކަމަށްވެސް ނިމާލް ވިދާޅުވެފައިވެއެވެ.
އެގޮތަށް ލުތުފީ އެދިގެން ވަޒީފާ ހަމަޖެއްސި މީހުންގެ މިސާލު ދައްކަވަމުން ފެނަކަ އައްޑޫ ސިޓީ އިންޖީނުގޭގެ ޑެޕިއުޓީ ޑިރެކްޓަރުގެ ގޮތުގައި 21 ސެޕްޓެމްބަރ 2014 ވަނަ ދުވަހު އައްޔަންކުރި އަލީ ޚާލިދު (Fenaka ID : FNK 2379) އަކީ މިއަދާއި ހަމައަށްވެސް އެއްވެސް މަގާމުގެ މަސްއޫލިއްޔަތެއް ހަވާލުނުކޮށް ހުރި މީހެއްކަމަށް ނިމާލް ވިދާޅުވިކަމަށް އެފަރާތުން މައުލޫމާތުދިނެވެ.
މި ބައްދަލުވުމުގައި ބައިވެރިވި އިތުރު މެނޭޖަރަކު ވިދާޅުވީ ނިމާލް އަކީ ރައީސް ޔާމީންގެ އަނބިކަނބަލުންނާ ވަރަށް ގާތް ބޭފުޅެއް ކަމަށް ވިދާޅުވެ ނިމާލް އަބަދުވެސް ވާހަކަ ދައްކަވާ ކަމަށެވެ. މިގޮތުން ސަރުކާރު ހިންގާ މައި ޕާޓީ ޕީޕީއެމް އަށް މަހަކު ތިން ލައްކަ ރުފިޔާގެ އެހީއެއް ނިމާލް ދެއްވާ ކަމަށް ހަމަ އެދުވަހު ވިދާޅުވިކަމަށް އެފަރާތުން މައުލުމާތު ދިނެވެ.
މީގެއިތުރުން ނިމާލް އަށް އެޗްޑީސީ ގެ ޗެއާމަން ކަމުގެ މަގާމުވެސް ސަރުކާރުން ހުށަހެޅުއްވި ކަމަށާއި ، ނަމަވެސް އޭނާ އެ މަގާމު ގަބޫލުނުކުރުމުން މިހާރު އެމަގާމުގައި ހުރި ފުއާދު ގާސިމް އަށް މަގާމު ދެއްވި ކަމަށް ނިމާލް ވިދާޅުވި ކަމަށް އެފަރާތުން މައުލޫމާތުދިނެވެ.