މަސައްކަތްތެރި ކަނބަލުންގެ އަގު ވަޒަން ކުރުމުގެ ގޮތުން އައްޑޫގެ އަންހެނުންގެ ތަރައްގީ އަށް މަސައްކަތް ކުރާ ކޮމިޓީން ދޭން ނިންމާފައިވާ "އައްޑޫ ކަނބައިދި އެވޯޑް" ހަފުލާ މިރޭ އޮންނާނެ ކަމަށް ކޮމިޓިން ބުނެފި އެވެ.
އެވޯޑް ހަފުލާ އޮންނާނީ ހިތަދޫ ޝަރަފުއްދީން ސްކޫލްގަ އެވެ.
ޖުމްލަ 10 ދާއިރާއަކުން އެވޯޑް ދޭން ހުޅުވާލުމުން 50 ފަރާތަކުން ވަނީ އެވޯޑަށް ކުރިމަތިލައިފަ އެވެ.
ކުރިމަތިލި ފަރާތްތަކުގެ މަސައްކަތްތައް ދިރާސާ ކުރުމަށް ފަހު، އެވޯޑަށް ނޮމިނޭޓްވި ފަރާތްތަކުގެ ނަންތައް އާންމުކޮށް، ފޭސްބުކް މެދުވެރިކޮށް އާންމުންނަށް ވޯޓް ދިނުމުގެ ފުރުސަތު ވެސް ހުޅުވާލި އެވެ.
"އައްޑޫ ކަނބައިދި އެވޯޑް" އަށް އެވޯޑް ދޭ ދާއިރާތަަކަކީ އިޖުތިމާއީ ދާއިރާ، ކުޅިވަރުގެ ދާއިރާ، އުނގަންނައި ދިނުން، ދަނޑުވެރިކަން، ލިޔުންތެރިކަން، މަސްވެރިކަން، އަތްތެރި މަސައްކަތުގެ ދާއިރާ، ވިޔަފާރީގެ ދާއިރާ، ދަރުމަވެރިން އަދި ސިއްހީ ދާއިރާ އެވެ.
މި ދާއިރާތަކުން އެވޯޑަށް 27 ފަރާތެއް ނޮމިނޭޓްވެފައިވެ އެވެ.
އަންހެނުންގެ ކޮމިޓީން ބުނީ މި މަސައްކަތްތެރި އަންހެނުންގެ އަގު ވަޒަން ކުރުމުގެ ގޮތުން މި އަހަރުން ފެށިގެން ކޮންމެ އަހަރަކު ވެސް އެވޯޑް ދޭނެ ކަމަށެވެ.