ސިފައިންގެ 124 ވަނަ އަހަރީ ދުވަހާ ދިމާކޮށް އައްޑޫގައި ހަރަކާތްތަކެއް ބާއްވަން ނިންމައިފި އެެވެ.
އެގޮތުން މި މަހުގެ 15 އާއި 16 ގައި އާއިލީ ހަވީރެއް ބާއްވާނެ ކަމަށް އެމްއެންޑީއެފް ސަދަން އޭރިއާ އިން ބުންޏެވެ.
މި ހަރަކާތް ކުރިއަށް ދާނީ މަރަދޫ ކުޑަކުދިންގެ ޕާކާއި އެ އަވަށު ބަނދަރު ސަރަހައްދުގައި ކަމަށް ސަދަން އޭރިއާ އިން ބުންޏެވެ.
ދެ ދުވަހަށް ކުރިއަށް ގެންދާ އާއިލީ ހަވީރުގައި ތަފާތު އެކި ހަރަކާތްތައް ހިމެނެ އެވެ.
އޭގެ ތެރޭގައި ކޯސްޓްގާޑް ޝިޕަށް ޒިޔާރަތް ކުރުމާއި ބަރު ހަތިޔާރިތަކާ އެކި ފޮޓޯ ނެގުމާއި ފަޔާ ފައިޓަރުންނާ އެކު ފޮޓޯ ނެގުމާއި ޝޫޓިން ފަދަ ހަރަކާތްތައް ހިމެނެ އެެވެ.
އެމްއެންޑީއެފް ސަދަން އޭރިއާ ގަމުގައި ގާއިމު ކުރި ފަހުން ސިފައިންގެ އަހަރީ ދުވަހާ ގުޅިވައިގެން ކޮންމެ އަހަރަކު ވެސް އައްޑޫގައި ތަފާތު ހަރަކާތްތައް ހިންގަ އެވެ.
އަދި މި ހަރަކާތްތަކަށް އާންމުންގެ ފަރާތުން ވަރަށް ބޮޑު ތަރުހީބެއް ވެސް ލިބެ އެވެ.