ހިތަދޫގެ ފަޅު ހިއްކައިގެން ފުލުހުންގެ ބޭނުމަށް ހިތަދޫގައި ޕޮލިސް އެކަޑަމީއެއް އެޅުމަށް ނިންމައިފި އެވެ.
އެގޮތުން ފަޅު ހިއްކުމުގެ ކުރިން ހަދަން ޖެހޭ އެންވަޔަރަންމަންޓް އިމްޕެކްޓް އެސެސްމަންޓް (އީއައިއޭ) ރިޕޯޓް ހަދައި ދޭނެ ފަރާތެއް ހޯދަން ފުލުހުންގެ މިހާރު ވަނީ އިއުލާންކޮށްފަ އެވެ.
ފުލުހުންގެ އިދާާރާ އިން ނެރުނު އިއުލާނުގައި ބުނެފައި ވަނީ އީއައިއޭ ހެދުމަށް ޝައުގުވެރިކަން ފާޅުކޮށް ހުށަހަޅާ ބީލަންތަކަށް ފައިސާ ބަލައިގަތުން ކުރިއަށް ދާނީ މިއަދުން ފެށިގެން މި މަހުގެ 17 ވަނަ ދުވަހާ ހަމައަށް ކަމަށެވެ.
ބީލަން ފޮތެއްގެ އަގަކީ 200ރ އެވެ.
މިމަޝްރޫއާ މައުލޫމާތު ދިނުމަށް ބާއްވާ ޕްރީ ބޮޑް މީޓިން މިމަހުގެ 18 ވަނަ ދުވަހު އިސްކަންދަރު ބިލްޑިންގައި އޮންނާނެ އެވެ. އަދި ޕްރޮޕޯސަލް ހުށަހަޅަން ޖެހެނީ މި މަހުގެ 25 ވަނަ ދުވަހު އެެވެ.
ހިތަދޫގައި ޕޮލިސް އެކެޑެމީއެއް އަޅަން ނިންމާފައި މި ވަނީ ފެބްރުއަރީ 8، 2012 ގައި ހިތަދޫގައި ހުރި ފުލުހުންގެ ޓްރޭނިން ސްކޫލް އަންދާލައިވާތީ އެވެ.