މުލިއްސެއް ލުއްސައިލުމަށްޓަކައި ހައްދުންމަތީ ހަސްފަތާލެއްގައި ހޭނެއްތި އަންހެންމީހާ ހޭނާރައިއޮވެ ތިން ހަފުތާ ފަހުން މާލޭގައި ނިޔާވުމާއި ގުޅިގެން ސިއްހަތާއިބެހޭ ވަޒީރު ވިދާޅުވީ މިހެންނެވެ. ދައުލަތުގެ ބަޖެޓުން ވެކްސިން ގަންނަ ހަމައެކަނި ގައުމަކީ ދިވެހިރާއްޖެ ކަމުގައެވެ.
އަޖައިބެއް ފަހެ ނުވާނެ ހެއްޔެވެ. ދައުލަތުގެ ބަޖެޓުން ވެކްސިން ގަތީމާ އެވެކްސިނުން ހޭނައްތާ މީހަކު ހޭނޭރިޔަސް ވަރިހަމައެވެ. ވަޒީރު ކަމަނާގެ ހަމައަކީ އެއީއެވެ. ފަހަރުގައި އެކަމަނާގެ މުރާދަކީ ސިއްހީ ފަރުވާގެ އަލިފުން ޔާއަށް ހުރިހާ ޚަރަދެއް ކުރަނީ ސަރުކާރުންނޭ ބުނުން ކަމަށް ވެދާނެއެވެ. އެހެންވިއްޔާ އެންމެ ރަގަޅެވެ. ދުނިޔޭގެ ގައުމުތަކުގެ ސިއްހީ ނިޒާމުގެ މޮޅުދެރަމިނާއި އެގައުމެއްގެ ކެރިފޯރުންތެރިކަމުގެ ނިސްބަތުން ސިއްހީ ދާއިރާއަށް ކުރާ ހޭދައަށް ވެސް ބަލައިގެން ދުނިޔޭގެ ސިއްހަތު ޖަމިއްޔާއިން ގައުމުތައް ތަރުތީބު ކުރިއިރު ދިވެހިރާއްޖެ 147 ވަނާގައި ލައްވާލާ ސަބަބު ބުނެދޭށެވެ. ސީޝެލްސްއާއި ސޮލަމަން އައިލެންޑްސް އާއި ޓުވާލޫ އާއި ނައުރޫ އަދި މޮރިޝަސް އާއި ބޫޓާނު ފަދަ ތަންތަންވެސް މި ލިސްޓުގެ މާކުރީގައި އުޅޭ ސަބަބު ބުނެދޭށެވެ. ދައުލަތުގެ ބަޖެޓުން ވެކްސިން ގަންނަ ހަމައެކަނި ގައުމަކީ ރާއްޖެއޭ ބުނީ ކޮން ދިރާސާއެއްކޮށްފައި ކޮން އެއްޗަކާއި ހަވާލާދީ ބާވައެވެ. ހަމަހުރެފައި ރަޑޭރަޑޭއޭ ކިޔަކަސް ޒިންމާ އަދާކުރެވުނީ ކަމަށް ހީނުކުރާށެވެ.
ނޫސްވެރިޔަކު ގެއްލިގެން އެކަމާ ކަންބޮޑުވެގެން ނޫސްވެރިން އުޅެން ފެށީމާ ހޯމް މިނިސްޓަރު ވިދާޅުވީ މިހެންނެވެ. އެއީ މާގިނަބަޔަކު ދަންނަ ނޫސްވެރިއެއްވެސް ނޫނެވެ. މިކަން ނޫސްވެރިން އުޅެނީ ސިޔާސީކޮށްލައިގެންނެވެ.
އަޖައިބެއް ފަހެ ނުވާނެ ހެއްޔެވެ. ގިނަބަޔަކު ނުދަތީމާ އެވީ ނިޒާމުން ގެއްލުވައިލަން ބާވައެވެ. މާގިނަބަޔަކަށް ނޭގުމަކީ އެމީހަކު ވަގަށްނަގައި ހިތުހުރިހާ ކަމެއް ކުރަން ދެވޭ ލައިސަނެއް ބާވައެވެ. ބަލަގަ މީހަކު ވަގަށް ނެގުމަކީ މައްސަލައެކެވެ. ވަގަށް ނެގިތާ ދެ އަހަރުވީ އިރު އެމީހަކު ދުނިޔޭގައި ހުރިކަންވެސް މަރުވީކަންވެސް ސަލާމަތީ ބާރުތަކަށް ޔަގީން ނުވުމަކީ މައްސަލައެކެވެ. މުޅިގައުމުގައި ދެ އަހަރުވަންދެން އަތްފުނާއަޅައިފީމޭ ހަމަ ނުފެނުނޭ ފެނުނުހާވެސް އެއްޗަކީ ލުހިފައި އޮތް އިސްތައްޓެކޭ ބުނީމާ ތިޔަބައިމީހުންގެ ގާބިލުކަމާއި ދޭތެރޭ ރައްޔިތުން ކަންބޮޑުވާނެއެވެ. ތިޔަބައިމީހުންނަށް މުސާރަ ދެނީ ރައްޔިތުންގެ ޖީބުންނެވެ.
ކަންކަން ސިޔާސީ ކުރާގޮތް އަޅެ ބުނެދީބަލާށެވެ. އާއިލާގެ ތެރެއިން މީހަކު ގެއްލުނީމާ ދެންތިބީން ނުކުމެ ކަންބޮޑުވުން ފާޅުކުރީމާ އެކަން އެވީ ސިޔާސީ ކަމަކަށެވެ. ކަންބޮޑުވުން ފާޅުކުރި ބަޔަކު އެވީ މުޖުރިމުންނަށެވެ. އަޅެ ފަހެ ތިޔަބައިމީހުންގެ ބުއްދިއާއި ފިކުރުވީ ކޮންތަނެއްގައި ބާވައެވެ. ތިޔަބައިމީހުން ހަގީގަތުގައިވެސް ހަމަ ބާވައެވެ. މަށަށް ޝައްކެވެ. ނޫސްވެރިޔާ ގެއްލިގެން ކަންބޮޑުވުން ފާޅުކުރި ތަނަށް އެއްވި އެންމެންނަކީ މުޖުރިމުންނޭ ބުނިއިރު ގެއްލުނު މީހާގެ މަންމަވެސް އޭގެ ތެރޭގައި ހިމެނުނެވެ. ދަރިޔަކު ގެއްލިގެން މަންމައެއްގެ ހިތުގައި އަޅާނެ ވޭނާއި އެއްދާއިރާއެއްގައި މަަސައްކަތްކުރާ މީހަކު ގެއްލުނީމާ ދެންތިބީންގެ ހިތުގައި އަޅާނެ ވޭން ނޭގިގެން ތިޔައުޅެނީ ތަސައްރަފު ފުދުން ކުޑަވީމައެވެ. އިންސާނިއްޔަތުގެ އަސަރު ކުޑަވީމައެވެ.
ދިފާއީ ވަޒީރު އިހަށް ދުވަހު ވިދާޅުވީ އަހަރެމެންގެ ރާއްޖެއަކީ މުސްލިމް ރާއްޖެއަކަށްވީމާ ބޭރު މީހުން އަހަރެމެންނާއި ޖައްސާލައިގެން އުޅެނީ ކަމުގައެވެ. ދީނުގެ ހުކުމްތައް ތަންފީޒުކުރާތީ އެކަމާ ހަސަދަވެރިވެގެން އުޅެނީކަމުގައެވެ.
އަޖައިބުހީވެއެވެ. ބޭރު މީހުން އެކިޔަނީ އަހަރެމެން ދީނުން ބޭރުވާށޭ ބާވައެވެ. ބަލަގަ އެމީހުން އެކިޔަނީ ވައްކަން ނުކުރާށޭ ހައްގުތައް އަދާކުރާށޭ އަނިޔާވެރި ނުވާށޭ ރީތިމަގުން ކަންތައް ކުރާށޭ އެވެ. މިއީ ދީނުގައިވެސް ބާރު އަޅާ ކަންކަމެވެ. އެހެންވީއިރު ދީނޭ ކިޔައިގެން މި އަމުނަނީ ކޮން ހާސަރުތަކެއް ބާވައެވެ. ދައްކާނެ ވާހަކައެއް ދެއްކޭނެ ވާހަކައެއް ނެތިއްޔާ ހިމޭނުން ހުރުންވެސް މާތާހިރެވެ. ބޭރު މީހުން އެގޮވާ ގޮވެލިތަކަށް ފުރުސަތު ނުލިބޭނީ ދީނުގައި އަންގަވާފައިވާ ކަންކަމަށް އިހުތިރާމްކޮށްގެންނެވެ.
ޚާރިޖީ ވަޒީރު އިހަށް ދުވަހު ވިދާޅުވީ މިތާގައި ސިޔާސީ ހައްޔަރީންނެއް ނެތް ކަމުގައެވެ. އަނެއްކާވެސް އަނެއް އަރަތެވެ. މިވެރިކަމުގެ ފުރަތަމަ ނާއިބު ރައީސް އެހުންނެވީ އަރުވާލެވިގެން ގައުމުން ބޭރުގައެވެ. ދެން ނާއިބު ރައީސްކަމަށް ގެނައި މީހާ އެއޮތީ ޖަލުގައެވެ. ކުރީގެ ރައީސުލް ޖުމްހޫރިއްޔާއަކަށް ތޭރަ އަހަރުގެ ހުކުމެއް އިއްވައިފިއެވެ. ދިފާއީ ވަޒީރުކަން ކުރިހާ ބަޔަކު އެތިބީ ޖަލުގައެވެ. ދިވެހީންގެ ތެރެއިން މިވެރިކަމަށް ބިރުން ފިލައިގެން ދިޔަމީހުންގެ ސަބަބުން އިނގިރޭސިވިލާތުގެ ވެރިރަށް ލަންޑަން ފުރިއްޖެއެވެ. ސިޔާސީ ޕާޓީއެއްގެ ލީޑަރު ދެއްކި ސިޔާސީ ވާހަކައަކާ ގުޅިގެން އޭނާވެސް އެއޮތީ ޖަލުގައެވެ. އެކަމަކު މިވަރުންވެސް މިކިޔަނީ ސިޔާސީ ކުށްވެރީންނެއް ނެތް ކަމުގައެވެ. ބަލަގަ ދުނިޔޭގައި ދެންވެސް ތިބީ ތިޔަކަހަލަ ގޮތެއްފޮތެއް ނެތް ގަޅީންނެއް ނޫނެވެ. މަންޒަރު ބަލައިލީމާ ތިޔަބައިމީހުންގެ ގޮތާއި ބާވަތް މިއޮތީ ދިމާކުރިމަތީން ހާމަވެ ފެންނާށެވެ.