"އައްޑޫ ލައިވް" އިން މިމަހު 7 ވަނަ ދުވަހު ޖެހި ޚަބަރަކާއި ގުޅިގެން ހޯމް މިނިސްޓަރ އުމަރު ނަސީރު ވަނީ އެކަން ދޮގު ކުރައްވައި ރާއްޖޭގެ ބައެއް މީޑިއާ ތަކަށް އިންޓަވިއު ދެއްވާފައެވެ. އެހެން ނަމަވެސް އެ ޚަބަރަކީ ސައްހަ ޚަބަރެއްކަން ސާބިތު ކޮށްދިނުމަށް ބޭނުންވާވަރަށް ހެކިތައް "އައްޑޫ ލައިވް" އަށް ލިބުމުން ޖަހާފައިވާ ޚަބަރެކެވެ.
ހޯމް މިނިސްޓަރ އުމަރު ނަސީރުގެ އެންގުމަށް ފުލުހުން ތަހުގީގުކުރިކަމަށް އެ ޚަބަރުގައި ބުނެފައިވާ މައްސަލައަކީ އެމްއެމްޕީއާރސީ ޚިޔާނާތުގެ ފައިސާ ޖަމާކުރެވުނު އެސްއޯއެފް ގެ އެކައުންޓުން ރާއްޖޭގައި ރަޖިސްޓްރީކޮށްފައިވާ ލިއޯ ޓްރޭޑިންގް ޕްރައިވެޓް ލިމިޓެޑް ގެ އެކައުންޓަށް ޖަމާކޮށްފައިވާ 1 މިލިއަން ޑޮލަރުގެ މައްސަލައެވެ.
މި 1 މިލިއަން ޑޮލަރު ލިއޯ އެކައުންޓަށް ޖަމާވުމާއިއެކު މިފައިސާ ދައުރުވެގެން ދިޔަގޮތް ފުލުހުންގެ ތަހުގީގަށް ވަނީ ހޯދާފައެވެ. އަދި އެފާއިސާ އެންމެ ފަހު މީހަކަށް ލިބިފައިވާ ފަރާތަކީ ރާއްޖޭގެ ފަނޑިޔާރެއްކަންވެސް ފުލުހުންގެ ތަހުގީގުން އެނގުނެވެ. މި ކަން ކަނޑައެޅިގެން ހޯމް މިނިސްޓަރަށް އެގިވަޑައިގަންނަވާނެ އެވެ. މި ތަހުގީގު ކުރިއަށް ދިޔައީ ސީދާ އުމަރުގެ އިރުޝާދުގެ ދަށުންކަން ތަހުގީގު ޓީމުގައި އިސްކޮށް ހަރަކާތްތެރިވި ފަރާތަކުންވެސް ވަނީ އައްޑޫލައިވް އަށް ކަށަވަރުކޮށްދީފައެވެ.
"އައްޑޫ ލައިވް" ގައި ޖެހި ޚަބަރު ދޮގުކުރެއްވިޔަސް ފާއިސާ ލިބުނު އެންމެ ފަހު ފަރާތަކީ ފަނޑިޔާރެއްކަން އެނގުމުން ، އެފަނޑިޔާރުގެ ގެއާއި އެފަނޑިޔާރާއި ގުޅުން ހުރި ތަންތަން ބަލާ ފާސްކުރުމަށް މޯލްޑިވްސް ޕޮލިސް ސާވިސް އިން އުޅުމުން ކަންހިނގާ ދިޔަގޮތް ހޯމް މިނިސްޓަރ އުމަރު އަށް އޮޅިވަޑައިގެންފަ އޮންނާނެހެން ހީއެއްނުވެއެވެ.
މި ތަހުގީގާގުޅޭ ތަފްޞީލުތައް "އައްޑޫ ލައިވް" އަށް ލިބިފައިވަނީ މިނިސްޓަރ އުމަރުގެ އުދާސްތައް އެފަރާތެއްގެ އަރިހުގައި ބޭރުކޮށްލި އަރިސް ބޭފުޅެއްގެ ފަރާތުންކަންވެސް ހޯމް މިނިސްޓަރަށް ކަނޑައެޅިގެން އެގިވަޑައިގަންނަވާނެ އެވެ.
ހޯމް މިނިސްޓަރ އުމަރު އަކީ މަޤާމްގެ ދަހިވެތިކަމުގައި އޭނާ ޤަބޫލްކުރާ ހަރުދަނާ އުސޫލުތަކާއި ހަމަތައް އެއްފަރާތް ކުރައްވާފައިވާ ބޭފުޅެއްކަމަށް ގިނަ ބަޔަކު ބުނަމުން ދެއެވެ.
އެއީ ކުރީގެ ނާއިބުރައީސް އަހްމަދު އަދީބު އާ ގުޅުންހުރި މައްސަލަތަކެއްގެ ތަހުގީގު އުމަރުގެ ބެލުމުގެދަށުން ކުރުމުން ، ރައީސުލް ޖުމުހޫރިއްޔާ އަބްދުﷲ ޔާމިން މިނިސްޓަރުގެ ބާރުތައް ބަރަށްބޮޑަށް ހަނިކުރުމުން ވެސް މަޤާމުގައި ދެމީހުރީތީއެވެ.
މީގެއިތުރުން ޕީޕީއެމްގެ ރިޔާސީ ޕްރައިމަރީގައި ރައީސް ޔާމީން އާއި ދެކޮޅަށް ވަރުގަދަ ބަހުގެ ހަމަލާތަކެއްދީ، ރައީސް ޔާމީން ގެ އިސްތަށިފުޅުގައި ބޮޑެތި އިލްޒާމްތައް އެޅުވުމަށްފަހު ، އެ ވާހަކަތަކަކީ ސިޔާސީ ދުލަކުން ދެއްކި ވާހަކަތަކެއް ކަމަށް އުމަރު ފަހުން ވިދާޅުވެފައިވާތީވެސް ގިނަބަޔަކު އެހެން ބުނަމުންދެއެވެ.
އެހެންކަމުން ފަނޑިޔާރުންގެ މައްސަލަ ނުބައްލަވާ ކަމަށް މީޑިއާތަކުގައި މިނިސްޓަރު އުމަރު ވިދާޅުވާ ވިދާޅުވުމަކީވެސް ސިޔާސީ ދުލުން ދައްކަވާ ވާހަކަފުޅު ތަކެއް ކަމަށްވެސް ވެދާނެއެވެ.
އެސްއޯއެފް ގެ އެކައުންޓް ތަކުން ފައިސާ ލިބުނުފަރާތްތައް ހާމަ ކުރާނެ ކަމަށް އޭސީސީ އިންވެސް ކުރިން ބުނެފައިވެއެވެ. ނަމަވެސް ފުލުހުންގެ އަތުގައި މިމައުލޫމާތުތައް ހުންނަތާ ހަ ހަމަސްދުވަސް ވެފައިވާއިރު މީ ކޮންބަޔަކަށް ކޮންބޭނުމެއްގައި ދިން ފައިސާއެއް ކަން ފުލުހުން މިހާތަނަށް ހާމަކޮށްފައިނުވެއެވެ.