މިއަދަކީ ގައުމީ އެއާލައިން މޯލްޑިއަންގެ 16 ވަނަ އަހަރީ ދުވަހެވެ. މިއީ މުޅި ރާއްޖެ އަށް މިހާރު ހަމައެކަނި ހިދުމަތް ދޭ އެއާލައިން ވެސް މެ އެވެ. އެހެންވެ މޯލްޑިވިއަނަށް އޮންނަ ޑިމާންޑަށް ވިސްނައިލާށެވެ.
ރާއްޖޭގެ އެންމެ އުތުރާއި ދެކުނަށް އަދި ރާއްޖޭގައި އެއާޕޯޓެއް އޮތް ތަނެއް ނަމަ، މޯލްޑިވިއަންގެ ބޯޓްފަހަރު އެއާޕޯޓަކަށް ޖައްސައި އުދުހޭނެ އެވެ.
ވަަރަށް އާދައިގެ ގޮތަކަށް މޯލްޑިވިއަންގެ ހިދުމަތް ފެށި ނަމަވެސް، ފާއިތުވި 16 އަހަރުގެ ތެރޭގައި މޯލްޑިވިއަންގެ ހިދުމަތައް ފުޅާ ކުރަން އެ އެއާލައިން އޮޕަރޭޓް ކުރާ ކުންފުނި އައިލެންޑް އޭވިއޭޝަން (އައިއޭއެސް) އިން މިހާތަނަށް ވަނީކޮށްފަ އެވެ.
އެގޮތުން މަތިންދާ ބޯޓްތަކުގެ ފްލީޓަށް ގެނެވޭ ތަނަވަސްކަމާ އެކު، ވައިގެ މަގުން ދަތުރު ކުރާ ފަރާތްތަކަށް ލިބެމުން އަންނަ ހިތްހަމަޖެހުން ވެސްް ބޮޑެވެ. މޯލްޑިވިއަނުން މިހާރު އަންނަނީ ބައެއް ސަރަހައްދުތަކަށް ސީ ޕްލޭންގެ ހިދުމަތް ވެސް ދެމުންނެވެ.
އެ ކުންފުނިން ސީ ޕްލޭންގެ ހިދުމަތް ފެށީ 2014 ގަ އެވެ. ކާމިޔާބުކަމާ އެކު އެ ހިދުމަތް ވެސް ފުޅާވަމުން އަންނަ އިރު، ރާއްޖޭގެ އެންމެ ދެކުން އައްޑު އަށް ވެސް ސީ ޕްލޭންގެ ހިދުމަތް ފެށުމުގެ ތައްޔާރީތައް މިހާރު އަންނަނީ ވަމުންނެވެ.
މި އަހަރު ނިމޭ އިރު މޯލްޑިވިއަންގެ ސީ ޕްލޭން ޕްލީޓް 10 އަށް އަރާނެ ކަމަށް އައިއޭއެސް އިން ބުންޏެވެ.
ފާއިތުވި 16 އަހަރުގެ ތެރޭގައި އައިއޭއެސް ކުރިއަރައި، މޯލްޑިވިއަންގެ ހިދުމަތަށް ގެެނެވުނު ބަދަލާ އެކު އެ އެއާލައިނަކީ ދިވެހި ދިދައާ އެކު މިހާރު ރާއްޖޭން ބޭރުގެ ބައެއް ގައުމުތަަކަށް ވެސް އުދުހެމުން އަންނަ އެއާލައިނެކެވެ. އެއީ ދިވެހިން ފަހުރުވެރިވާން ޖެހޭ ކަމެކެވެ.
މޯލްޑިވިއަން އާ ދޭތެރޭ "މޯލްޑިވިއަނުން" ކުރާ އުންމީދުތައް ވެސް ބޮޑެވެ. ހިދުމަތް ފުޅާ ކުރަންވީ އެވެ. މުޅި ރާއްޖެ އާއި ރާއްޖޭން ބޭރުގައި ވެސް އުދުހެންވީ އެެވެ.
އެކަމަކު މޯލްޑިވިއަންގެ ފަރާތުން ރައްޔިތުން އެދޭ ވަރަށް ބޮޑު އެދުމެއް އެބަ އޮތެވެ. އެއީ ކޮންމެ "މޯލްޑިވިއަނަކަށް" ވެސް މޯލްޑިވިއަންގެ ބޯޓެއްގައި އުދުހޭ ވަރަށް އަގުތައް ހިފަހެއްޓި އޮތުމެވެ.
ޓިކެޓް ވިއްކާ އަގާ ދޭތެރޭ ހިތްހަމަނުޖެހިގެން ފާއިތުވި 16 އަހަރުގެ ތެރޭގައި ރައްޔިތުން ކުންފުންޏާ ހަމައަށް ގެންދިޔަ ޝަކުވާތައް މަދެއް ނުވާނެކަން ޔަގީނެވެ.
އެހެންވެ 17 ވަނަ އަހަރާ ހަމައިން ނަމަވެސް، ރައްޔިތުންގެ އެ އުދާހަށް މޯލްޑިވިއަނުން ހައްލެއް ހޯދައި ދޭނެ ކަމަށް އުންމީދު ކުރަމާ ހިނގާށެވެ.
ކާމިޔާބު އަދި ކުރިއެރުން ގެނެސްދޭ 16 ވަނަ އަހަރަަކަށް އަދިވެސް މަރުހަބާ އެވެ. މޯލްޑިވިއަންގެ ފިޔަގަނޑު އަދިވެސް ފުޅާ ކުރަންވީ އެވެ. އެއީ ގައުމަށް ލިބޭނެ ފަހުރެެކެވެ.