މިދިޔަ އަހަރުގެ ތެރޭގައި ފަރަކަށް އަރައި ބޮޑެތި ގެއްލުންތަކެއް ލިބުނު ހުޅުދޫ "ސްޕީޑް" ބޯޓް މަރާމާތުކޮށް މީގެ ދެ މަހެއްހާ ދުވަސް ކުރިން އަލުން ދަތުރުތަކަށް ނިކުމެ އުޅެނިކޮށް މިއަދު އަނެއްކާ ވެސް ނެރަކަށް އަރައި ބޮޑެތި ގެއްލުންތަކެއްވެއްޖެ އެވެ.
އެ ބޯޓް މާލޭން ފުރައިގެން އައްޑު އަށް ކުރަމުން އަންނަ ދަތުރުގެ ތެރެއިން ގއ. ގެމަނަފުއްޓަށް ވަންނަން އުޅެނިކޮށް މިއަދު އެރީ އެ ރަށު ނެރުމައްޗަށެވެ.
މި ހާދިސާ ހިނގާފައި ވަނީ ހެނދުނު 7:30 އެހާކަށްހާ އިރު އެވެ.
ސްޕީޑް ބޯޓްގެ ވެރިޔާ ހުސައިން މުހައްމަދު މާލޭގައި ހުރެ "އައްޑޫ ލަައިވް" އަށް ބުނީ ބޯޓް ނެރުމައްޗަށް އަރައި ބޯޓްގެ ބަނޑު ފިލާގަނޑެއް ފަޅައިގެން ގޮސް، ބޯޓް ދިޔަވަމުންދާ ކަމަށް ބޯޓްގެ ފަޅުވެރިން މައުލޫމާތު ދީފައިވާ ކަމަށެވެ.
އޭނާ ބުނީ ބޯޓްގެ އިންޖީނު ހުރި ބަޔަށް ވެސް ލޮނު އަރާފައިވާ ކަމަށެވެ.
ހުސައިން ބުނީ ބޯޓް ސަލާމަތް ކުރެވޭތޯ ގެމަފުށިން ބަޔަކު ނިކުމެ މިހާރު މަސައްކަތް ކުރަމުން އަންނަ ކަމަށެވެ.
"އެހެން ނަމަވެސް ބޯޓްގެ އަޑީގައި ހުރި ވަރަށް ގިނަ މުދަލަށް ވަނީ ގެއްލުން ލިބިފައި،" އޭނާ ބުންޏެވެ.
ހުސައިން ބުނީ ބޯޓްގައި މި ފަހަރު މައިގަނޑު ގޮތެއްގައި ހުރި މުދަލުގެ ތެރޭގައި ހުންނާނީ ހިކި މުދާ ކަމަށެވެ. އަދި ބޯޓްގައި ހުރި މުދަލުގެ ތެރޭގައި ދާންދޫގެ މީހެއްގެ ގިނަ އަދަދެއްގެ މުދާ ވެސް ހުރި ކަމަށް އޭނާ ބުންޏެވެ.
ސްޕީޑް ބޯޓް މިދިޔަ އަހަރު އެރީ ގއ. ދާންދު އާއި ހަނޑަހާ ދެމެދު އޮންނަ ފަރަކަށެވެ. އެ ހާދިސާގައި ބޯޓަށް ލިބުނު ބޮޑެތި ގެއްލުންތައް މަރާމާރުކޮށް 70 ފޫޓްގެ ބޯޓް އަލުން ދަތުރުތައް ފެށީ މި އަހަރުގެ ފެބްރުއަރީ މަހުގެ ތެރޭގަ އެވެ.
ސްޕީޑް ބޯޓަކީ މާލެ އާއި އައްޑު އާ ދޭތެރޭ ދަތުރު ކުރާތާ މިހާރު 30 އަހަރަށް ވުރެ ގިނަ ދުވަސްވެފައިވާ ބޯޓެކެެވެ.