ކައުންސިލްތަކުގެ އުމުރު ގާނޫނޫ އަސާސީން އުނި ކުރެވޭ ގޮތަށް ހުށަހެޅި އިސްލާހް މިއަދު ފާސްކޮށްފި އެވެ.
ކުޑަހުވަދޫ ދާއިރާގެ މެމްބަރު އަހުމަދު އާމިރު މިދިޔަ މަހުގެ 18 ވަނަ ދުވަހު ހުށަހެޅި އިސްލާހު މިއަދު މަޖިލީހުގެ ގައުމީ ސަލާމަތު ކޮމެޓީން ފާސްކޮށްފައި ވަނީ އެއްވެސް ބަދަލު ގެނައުމެއް ނެތި ކޮމެޓީއަށް ހާޒިރުވެވަޑައިގެންނެވި މެމްބަރުންގެ އަގުލަބިއްޔަތުންނެވެ.
އާމިރުގެ އިސްލާހުގައިވާ ގޮތުން، އިންތިހާބު ކުރަން ޖެހޭ ކައުންސިލްތަކަށް ރައީސާއި ނައިބު ރައީސް އިންތިހާބު ކުރާނެ ގޮތް ގާނޫނުގައި ކަނޑައެޅިފައި އޮންނަން ވާނެ އެވެ. އަދި އިދާރީ ދާއިރާތައް ހިންގުމަށްޓަކައި އިންތިހާބު ކުރެވޭ ކައުންސިލްތަކުގެ އުމުރު ގާނޫނުގައި ކަނޑައެޅިފައި އޮންނަން ޖެހެ އެވެ.
މިހާރު ގާނޫނު އަސާސީގައިވާ ގޮތުން، ކައުންސިލްތަކުގެ ރައީސް އަދި ނައިބު ރައީސް އިންތިހާބު ކުރާނީ އެ ކައުންސިލެއްގެ މެންބަރުންގެ ތެރޭގައި ނަގާ ސިއްރު ވޯޓަކުންނެވެ. އަދި އިދާރީ ދާއިރާތައް ހިންގުމަށްޓަކައި އިންތިހާބު ކުރެވޭ ކައުންސިލްތަކުގެ އުމުރަކީ ތިން އަހަރު އެވެ.
މި އިސްލާހު މަޖިލީހުގެ ތަޅުމުން ފާސްކޮށްފި ނަމަ، ކައުންސިލްތަކުގެ ރައީސް އަދި ނައިބު ރައީސުން އިންތިހާބު ކުރާނީ މެންބަރުންގެ ސިއްރު ވޯޓެއްގެ ބަދަލުގައި ރައްޔިތުންނެވެ.
އާމިރު ވިދާޅުވީ އޭނާ ހުށަހެޅުއްވި އިސްލާހުގެ މައިގަނޑު މަގުސަދަކީ ލާމަރުކަޒީ ނިޒާމް ރައްޔިތުންނާ ވީހާ ވެސް ގާތުން ހިންގަން ފުރުސަތު ތަނަވަސްްކޮށް ދިނުން ކަމަށެވެ.