އައްޑޫގެ ތަރައްގީ އަދި ކިރިޔާ ފެށުނީ ކަމަށާއި ކުރިއަށް އޮތް ދުވަސްތަކުގައި ތަރައްގީވެ ފުރިހަމަ ސިޓީއަކަށްވެގެންދާ ތަން ރައްޔިތުންނަށް ފެނިގެން ދާނެ ކަމަށް ހައުސިން މިނިސްްޓަރު ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.
"އައްޑޫ ތަރައްގީ ޔަގީން" ގެ ނަމުގައި ފޭދޫގައި ރޭ ބޭއްވި ޖަލްސާގައި މިނިސްޓަރު ވިދާޅުވީ ރައީސް އަބްދުﷲ ޔާމީނަކީ އައްޑޫގެ ތަރައްގީ އަށް ވަރަށް ބޮޑު އިސްކަމެއް ދެއްވާ ބޭފުޅެއް ކަމަށެވެ.
މުުއިއްޒު ވިދާޅުވީ އައްޑޫގެ ތަރައްގީގެ އެކިއެކި މަޝްރޫއުތައް މިހާރު ވެސް އައްޑޫގައި ފެށިގެންދާ ކަމަށެވެ.
އެގޮތުން ފެނުގެ ނިޒާމް ގާއިމު ކުރުމާއި އެއާޕޯޓް ތަރައްގީ ކުރުމާއި ފިޝަރީޒް ކޮމްޕްލެކްސް ގާއިމު ކުރުން ފަދަ މަޝްރޫއުތައް ކުރިއަށްދާ ކަމަށް ވިދާޅުވި އެވެ.
އައްޑޫގެ ހުރިހާ އަވަށަކުން ގިނަ އަދަދެއްގެ ބަޔަކު ބައިވެރިވާ ޖަލްސާގައި މިނިސްޓަރު ވިދާޅުވީ އައްޑޫގެ ހުރިހާ އަވަށެއްގެ ބޮޑެތި މުހިއްމު މަގުތަކުގައި ތާރު އަޅައިގެން ހަދައި، މި ދައުރުގެ ތެރޭގައި ނިންމައި ރައްޔިތުންނާ ހަވާލު ކުރާނެ ކަމަށެވެ.
އެގޮތުން ހަދާނެ މަގުތައް މިހާރު ކަނޑައަޅައި، ޑިޒައިން ނިމި އެކަމަށް ބަޖެޓް ވެސް ހަމަޖެހިފައިވާ ކަމަށް ވިދާޅުވި އެވެ.
މުއިއްޒު ވިދާޅުވީ މަގުތައް މި އަހަރުގެ ތެރޭގައި ހަދަން ފަށާނެ ކަމަށެވެ. އަދި އެ މަސައްކަތް ކުރިއަށް ދާނީ އެންވަޔަރަމަންޓް މިނިސްޓްރީގެ ދަށުން ކުރިއަށް ގެންދާ ފެނާއި ނަރުދަމާ ނިޒާމް ނިމޭ މިންވަރަކުން ކަމަށް ވިދާޅުވި އެވެ.
"މިހާރު މި ވަނީ މަގުތައް ހެދުމުގެ ކުރިން އީއައިއޭ ހަދާނެ ބަޔަކު ހޯދަން އިއުލާންކޮށްފައި. ދެން މަގު ހަދާނެ ކޮންޓްރެކްޓަރަކު ހޮވައި އެކަމަށް ތައްޔާރުވެގެން އަޅުގަނޑުމެން ތިބޭނީ،" މިނިސްޓަރު ވިދާޅުވި އެވެ.
މުއިއްޒު ވިދާޅުވީ ފޭދޫ ބިން ހިއްކުމުގެ މަސައްކަތް ވެސް މިހާރު މިއޮތީ ފެށިފައި ކަމަށާއި ބިން ހިއްކާ ބޯޓް އައިސް މަސައްކަތް ފަށާތާ 20 ވަރަކަށް ދުވަހުގެ ތެރޭގައި ބިން ހިއްކައި ނިންމާނެ ކަމަށެެވެ.
"ބިން ހިއްކާ ބޯޓް މާލޭގެ އިންޑަސްޓްރިއަލް ވިލެޖް ގާއިމު ކުރާ ސަރަހައްދުގައި ހިއްކަން ޖެހޭ ތަންކޮޅު ހިއްކާފައި، ސީދާ ފޭދު އަށް އަންނާނީ މި ރަށުގެ ބިން ހިއްކަން،" މިނިސްޓަރު ވިދާޅުވި އެވެ.
އޭނާ އަދި ވިދާޅުވީ ބިން ހިއްކައި ނިމުމަމާ އެކު ރިވެޓްމަންޓް ޖެހުމުގެ މަސައްކަތް ވެސް އެ މަަސައްކަތް ކުރާ ކުންފުނިން ކުރިއަށް ގެންދާނެ ކަމަށެވެ.
މިނިސްޓަރު ވިދާޅުވީ އައްޑޫ ތަރައްގީވެ، ކުރިއަރަމުންދާ މަންޒަރު ރައީސް ޔާމީންގެ ދައުރު ތެރޭގައި ފެންނާނެ ކަމަށާއި މި ސަރުކާރަކީ ފަނާ ކުރުމުގެ ބަދަލުގައި ބިނާ ކުރާ ސަރުކާރަށް ކަަމަށް ވިދާޅުވި އެވެ.