"މި މަސައްކަތް ކުރާކަށް އަޅުގަނޑަކަސް ހަޑިއެއް ނޫން. ލަދެއް ވެސް ނުގަނޭ،" މަސްވެރިކަމުގެ ދާއިރާއިން "އައްޑޫ ކަނބައިދި އެވޯޑް" ހާސިލް ކުރި މަރަދޫ މަރީނާ އިސްމާއީލް، 52، ބުންޏެވެ. "އަޅުގަނޑަކީ އަބަދު ވެސް މަސައްކަތުގައި ވަރަށް ބިޒީކޮށް އުޅެން ބޭނުންވާ މީހެއް. އެހެންވީމަ އެގޮތަށް މި އުޅެނީ."
އޭނާއަކީ ފިސާރަ މަސައްކަތްތެރި، ހަރަކާތްތެރި އަންހެނެކެވެ. މަސްވެރިމުގެ ދާއިރާ އަށް މަރީނާ ނިކުތްތާ މިއީ 14 ވަނަ އަހަރެވެ. ދޯނިފަހަރުގައި ކަނޑަށް ނިކުމެ ދޮށިން މަސް ނުބޭނިޔަސް، މަރީނާއަކީ ކެޔޮޅުންނަށް ވަކި ދޫކުރާނެ "މަސްވެރިއެއް" ނޫނެވެ.
ފިރިހެން މަސްވެރިން ކުރާ ހިތްވަރު އޭނާ އެބަ ކުރެ އެވެ. މަސްވެރިކަމުން ރަނގަޅު އާމްދަނީއެއް ހޯދަ އެވެ.
ފިރިމީހާ އާއި ދެ މީހުން ފެށި މަސްވެރިކަމުގެ މަސައްކަތަކީ މިހާރު ހަމައެކަނި މަރީނާ ބަލަހައްޓައި ހުރިހާ ޒިންމާއެއް ނަގަމުން އަންނަ މަސައްކަތެކެވެ.
ދަނޑުވެރިކަމަށް އޮތް ލޯތްބެއްގެ ބޮޑުކަމުން މަރީނާގެ ފިރީމީހާގެ މަސައްކަތަކީ ދަނޑު ހެއްދުމުވެ. ލ. އަތޮޅުން ކުއްޔަަށް ރަށެއް ނަގައިގެން އޭނާ އަންނަނީ ދަނޑުވެރިކަން ފައްކާ ކުރަމުންނެވެ.
"ފިރީމީހާ ކުރިން ރިސޯޓެއްގައި ވަރަށް ގިނަ ދުވަހު އުޅެފައި ރަށަށް ބަދަލުވީމަ، ކުރާނެ މަސައްކަތެއް ފަށަން ކުރި ހިޔާލެއްގެ ތެެރެއިން މަސްވެރިކަމުގެ ތެރެއަށް ދާން ނިންމީ،" 2004 ވަނަ އަހަރު "ތޯފާ އިންވެސްޓްމަންޓް" ގެ ނަމުގައި ފެށި މަސައްކަތާ ބެހޭ ގޮތުން މަރީނާ ބުންޏެވެ. "އެކަމަކު ދުވަސްކޮޅެއްވީ ފަހުން ފިރިމީހާ ބުނެފި ތިއީ މަރީނާގެ ޝައުގޭ. ތިިކަމާއިގެ މަރީނާ ކުރިއަށް ދާށޭ. ތިމަންނަ ދާނީ ދަނޑުވެރި ކަމަށޭ. އެހެންވީމާ ދެ މީހުން ވެސް މި އުޅެނީ އެންމެ ކުރާ ހިތްވާ މަސައްކަތް ކުރުމުގައި."
މަރީނާގެ މައިގަނޑު މަސައްކަަތަކީ މަސްވެރިންގެ އަތުން މަސް ގަނެގެން މަސް ކައްކައި އެެއަށް ތަފާތު "ވައްތަރު" ޖައްސައިގެން ބާޒާރަށް ނެރުމެވެ. މަހޭ ބުނެފި ނަމަ، މަހުން ހަދާފައި ހުރި ކިތަންމެ ބާވަތެއް މަރީނާގެ އަތުން ލިބޭނެ އެވެ.
ވަޅޯ މަސް، ހިކި މަސް، ކޮށި މަސް، ވެކިއުމް ކުރި މަސް މިހެން ގޮސް ކިޔާނެ ކަމެއް ނެތެވެ. މަހަށް ގެނެވޭ ތަފާތު ބަދަލުތަކާ އެކު އެތައް ބައެއްގެ އިތުބާރާއި ޔަގީންކަން އޭނާ ހޯދައިފި އެވެ. އޭނާގެ މަސް ބޭނުންކޮށްގެން މާލޭގެ ޔޫއެޗްޕީން އުފައްދާ ސަމްބޯލަކީ ވެސް އާންމުންގެ ތެރޭގައި އެހާމެ މަގުބޫލް އުފެއްދުމެކެވެ.
މަހުގެ ބާވަތްތައް މަރީނާ ގެއިން ލިބުމުގެ އިތުރަށް ހިތަދޫގެ 17 ފިހާރައަކުންނާއި ފޭދު އާއި ހުޅުދޫގެ ބައެއް ފިހާރަތަކުން މަރީނާގެ އުފެއްދުންތައް ލިބޭނެ އެވެ. އަދި ބައެއް ރިސޯޓްތަކަށް އޭނާ މަހުގެ ބާވަތްތައް ސަޕްލައި ވެސް ކޮށްދެ އެވެ.
"ޑިމާންޑާއި މާކެޓް އޮންނަ ވަރަށް އަޅުގަނޑަށް މިހާރު މިކަން އެބަ ކުރެވޭ،" އަތް ދަށަށް މިހާރު ދެ ބިދޭސީންލައިގެން މުޅި މަސައްކަތް އެކަނި މެނެޖް ކުރަމުން އަންނަ ފަސް ކުދިންގެ މަންމަ ބުންޏެވެ.
މަސައްކަތަށް ބޭނުންވާ ސާމާނު ވެސް މަރީނާ ވަނީ ހޯދައިފަ އެވެ، މަސް ކޮށާ މެށިނާއި މަސް ބަންދު ކުރާ މެޝިން ވެސް މިހާރު އޭނާގެ އަތުގައި އެބަ ހުއްޓެވެ.
މަސައްކަތުގެ ފޯރި އާއި ޖޯޝް އޭނާގެ ކިބައިގައި ވަރަށް ގަދައަށް އެބަ ހުއްޓެވެ. މަަސައްކަތް ކުރަނީ ނުހަނު ހިތްވަރާއި ހަރަކާތްތެރިކަމާ އެކުގަ އެވެ.
"މަރަދޫގެ ހުރިހާ މަސްވެރިންނާ އަޅުގަނޑާ މިހާރު ގުޅިފައި އޮންނާނީ. އެހެންވީމާ މަސް ހޯދާކަށް އުނދަގުލެއް ނޫން. ބޭނުންވާ ވަރަށް އަބަދު ވެސް ލިބޭ،" ބަނދަރު މައްޗަށް ގޮސް މަސް ގަތުމުގެ ޒިންމާ ވެސް ނަގަމުން އަންނަ މަރީނާ ބުންޏެވެ. "އަޅުގަނޑު ވަރަށް އުފާވޭ، ވަރަށް ހިތްހަމަޖެހޭ މި މަަސައްކަތް މިގޮތަށް ކުރެވޭތީ. ދެން އާއިލާ އާއި ރައްޓެހިންގެ ފަރާތުން ވެސް ވަރަށް ބޮޑު ހިތްވަރެއް ލިބޭ."
މަސްވެރިކަމުގެ ދާއިރާއަކީ މަރީނާ ހަމައެކަނި އުޅުނު ދާއިރާއެއް ނޫނެވެ. އޭނާ ވަނީ މާލޭގެ އީޕީއެސް ސްކޫލްގައި ވެސް ގިނަ ދުވަސްތަކެއް ވަންދެން މަސައްކަތްކޮށްފަ އެެވެ. އެއީ އިދާރީ މަަސައްކަތްތަކުގަ އެވެ.
މީގެ އިތުރުން އޭނާއަކީ އިޖުތިމާއީ ގޮތުން ކުރެވޭ ވަރަށް ގިނަ ކަންކަމުގައި އިސް ނަގައިގެން މިހާރު ވެސް މަސައްކަތް ކުރާ އަންހެނެކެވެ. އެގޮތުން މަރަދޫ އަންހެނުންގެ ތަރައްގީ މަސައްކަތް ކުރާ ކޮމިޓީގައި ވެސް އޭނާ ވަަރަށް ގިނަ ދުވަހު ސެކްރެޓަރީއެއްގެ ގޮތުގައި އުޅުނެވެ.
"އަސްލު ކުރިން ގިނަ ބަޔަކާ އެކުގައި އެއްކޮށް މަސައްކަތް ކުރަން ފުރުސަތު ލިބުނީމަ ވަރަށް ހަލަބޮލިކޮށް، ކަންކަމުގައި އިސް ނަގައިގެން އުޅެން ޖެހުނު މީހަކަށްވީ. އަޅުގަނޑަށް މާ ރަނގަޅު އޮފީހެއްގައި އިށީނދެ އިނދެގެން ކުރާ މަސައްކަތްތަކަށް ވުރެ ބޮޑަށް އަބަދު ވެސް ހަރަކާތްތެރިކޮށް އުޅެވޭ ގޮތަށް މަސައްކަތް ކުރަން ޖެހުން،" މަރީނާ ބުންޏެވެ.
މަސްވެރިކަމުގެ ދާއިރާގައި އޭނާ ފަސްއެނބުރި ބެލުމެއް ނެތެވެ. މަސައްކަތް ފުޅާ ކުރަން އޮތް ވަރަކަށް އެކަން ކުރަން މަރީނާ ހުރީ އަޒުމް ކަނޑައަޅައިގެންނެވެ. މަސައްކަތް ހުއްޓާލުމުގެ އެއްވެސް ހިޔާލެއް އޭނާގެ ނެތެވެ.
"މަސައްކަތް ކުރެވޭ ހާލަތުގައި ހުރިހާ ދުވަހަކު މިކަން ކުރާނަން،" ގައުމީ އެވޯޑަކަށް ވެސްް އުންމީދު ކުރާ މަރީނާ ބުންޏެވެ.
އޭނާ އަންހެން ކަނބަލުންނަށް ދޭން އޮތް މެސެޖަކީ ކަމެއް ނެތިފައި ނުތިބޭށޭ އެވެ. އަންހެނަކަށްވީތީ ވަކި މީހަށް ނުވަތަ ވަކި ބައެއްގެ މައްޗަށް ބަރޯސާވާކަށް ނުޖެހެ އެވެ.
"ހަލާލު ކޮންމެ މަސައްކަތެއްކޮށްގެން އާމްދަނީ ހޯދަންވީ އަންހެނުން. އަންހެނަކަށްވީތީއޭ ކިޔާފައި ނުކުރެވޭނެ ކަމެއް ނެތް،" މަރީނާ ބުންޏެވެ. "މިހާރަކަށް އައިސް ފެނޭ ބައެއް އަންހެނުން އެއްވެސް ކަމެއް ނެތިފައި އުޅޭ ތަން. އަޅުގަނޑު ބުނާނީ އެހެން ނުޅޭށޭ. ކޮންމެވެސް މަސައްކަތެއްކޮށްގެން ދިރިއުޅުން ފާގަތި ކުރަން މަސައްކަތް ކުރާށޭ."