ކުރީގެ ރައީސް މުހައްމަދު ނަޝީދަަކީ ރައްޔިތުންގެ ތާއީދާއި ލޯބި ވަރަށް ބޮޑަށް ހޯއްދަވާފައިވާ ބޭފުޅެއް ކަމަށާއި ރައީސް ޔާމީނަކީ ރައްޔިތުންގެ އެއްވެސް ތާއީދެއް އިހުތިރާމެއް ނެތް ބޭފުޅެއް ކަމަށް އެމްޑީޕީގެ ނައިބް ރައީް މުހައްމަދު ޝިފާޒް ރޭ ވިދާޅުވެއްޖެ އެވެ.
"ވަގު ޔަގީން" ގެ ނަމުގައި ފޭދޫގައި ރޭ އޮތް ޖަލްސާގައި އޭނާ ވިދާޅުވީ ނަޝީދުގެ މައްޗަށް ބޭއިންސާފު ހުކުމެއްކޮށް އެ މަނިކުފާނަށް އެކި ހުރަސްތައް ކުރަމަތި ކުރަމުން ގެންދާނީ ޒާތީވެގެން ކަމަށެވެ.
"ހަގީގަތުގައިވެސް ޔާމީނަށް ރައީސް ނަޝީދާ ހަމަޔަށް އާދެވޭނެ އެއްވެސް ހަމައެއް އެއްވެސް ގޮތެއް ފެންނާކަށް ނެތް. ތެދު ތެދަށް ދަންނަވާނަމަ، ފަތިގަނޑުވެސް ފިރުކާ ނުލެވޭނެ،" ޝިފާޒް ވިދާޅުވި އެވެ. "އެހެންވީމަ ރައީސް ނަޝީދާއި ލެނޑިގަނެގެން ނޫޅުއްވައްޗޭ،"
އޭނާ އަދި ވިދާޅުވީ ރައީސް ނަޝީދަކީ މި ރާއްޖޭގެ ރައްޔިތުން ތާއިދު އޮތް ބޭފުޅެއް ކަމަށާއި އެ މަނިކުފާނަކީ މި ރާއްޖޭގެ އުއްމީދު ކަމަށެވެ.
"ރައީސް ނަޝީދު ދުނިޔޭގެ މަގްބޫލް ލީޑަރަކަށްވެ، އެ މަނިކުފާނުގެ ބަސް ދުނިޔޭގެ ކަންކޮޅުތަކުގައި ހިނގުމަކީ، އެކަމާ ހަސަދަވެރިވެގެން، އަނެއްކާ ވެސް އެމަނިކުފާނުގެ ގައިން ނެއްޓެން ނޭނގިގެން އުޅެންވީ ސަބަބެއް ނޫން. މެކުނު ފުމުނަކަސް ގާހަކަޔަކަށް ނުފުމެވޭނެ،" ޝިފާޒް ވިދާޅުވި އެވެ.
އޭނާ ވިދާޅުވީ ރައީސް ޔާމީނަކީ ބޮޑެތި ޖަރީމާތަކެއް ހިންގަވާފައިވާ ބޭފުޅެއް ކަމަށެވެ.
"އެމްޑީޕީން މަސައްކަތް ކުރަމުން ގެންދަނީ މާދަމާ ވެސް މި ވެރިކަން ބަދަލު ކުރެވޭތޯ އަދި މާދަމާ އަށް އަލިވިލޭ އިރު ވެސް، ސަލާމަތީ ބާރުތަކުން ޔާމީން ހައްޔަރު ކުރުމަކީ ވެސް އަޅުގަނޑުމެންގެ އުންމީދެއް،" ޝިފާޒް ވިދާޅުވި އެވެ.