ދާދި ފަހުން އިނގިރޭސިވިލާތުގެ ބޮޑު ވަޒީރު ޑޭވިޑް ކެމަރަން އޮންލައިންކޮށް "ވިއްކާލަން" އިއުލާންކޮށްފައި ވަނިކޮށް ޕާކިސްތާންގެ ބޮޑުވަޒީރު މުހައްމަދު ނަވާޒު ޝަރީފް ވެސް އީބޭގައި "ވިއްކާލަން" އިއުލާންކޮށްފި އެވެ.
އީބޭގައި ބޮޑުވަޒީރު ވިއްކާލަން ކޮށްފައިވާ އިޝްތިހާރުގައި ބުނެފައި ވަނީ "ބޭނުން ނެތް ޕާކިސްތާނުގެ ބޮޑުވަޒީރު ވިއްކާލަނީ" ކަމަށެވެ.
އެހެން ނަމަވެސް ނަވާޒު ޝަރީފް ވިއްކާލަން އީބޭއަށް ލީ ކާކު ކަމެއް ނޭނގެ އެވެ.
ޓެރަރިޒަމްގެ ހާލިތެރޭގައި ވެސް އޮތް ޕާކިސްތާންގެ ބޮޑުވަޒީރު "ވިއްކާލަން" ހުޅުވާލުމާ އެކު އެ މަނިކުފާނުގެ އަގު މިހާރު ވަނީ 66،200 ޕައުންޑަށް އަރައިފަ އެވެ. ބޮޑުވަޒީރު "ގަންނަން" މިހާތަނަށް 100 ފަރާތަކުން ވަނީ ބިޑްވެސްކޮށްފަ އެވެ.
އިޝްތިހާރުގައި އަދި ބުނެފައި ވަނީ ނަވާޒް ޝަރީފް އާންމުކޮށް ފެންނާނީ ޕާކިސްތާނާއި ތުރުކީ އާއި އެމެރިކާ އަދި އިނގިރޭސިވިލާތުން ކަަމަށެވެ.
އަދި އާއިލާ ދިރިއުޅެނީ ލަންޑަނުގައި ކަމަށާއި އެެ ތަނުގައި ނަވާޒްގެ އެތައް މިލިއަން ޕައުންޑްގެ މިލްކިއްޔާތު ވެސް ވާ ކަމަށް ބުނެފައިވެ އެވެ.