ސިފައިންގެ 124 ވަނަ އަހަރީ ދުވަސް ފާހަގަ ކުރުމުގެ ގޮތުން އެމްއެންޑީއެފް ސަދަން އޭރިއާ އިން އިއްޔެ އައްޑޫގައި އާއިލީ ހަވީރެއް ފަށައިފި އެވެ.
މަރަދޫ ބަނދަރު ސަރަހައްދުގައި އާއިލީ ހަވީރު ހުޅުވުމަށް އިއްޔެ ހަވީރު ބޭއްވި ރަސްމިއްޔާތު ޝަރަފުވެރިކޮށް ދެއްވީ ގަން އިންޓަނޭޝަނަލް އެއަޕޯޓްގެ ޑެޕިއުޓީ ޖެނެރަލް މެނޭޖަރު އިބްތިޝާމާ އަހުމަދު ސައީދެެވެ.
މި ހަވޫރު މިއަދު ވެސް ކުރިއަށް ދާނެ ކަމަށް ސަދަން އޭރިއާ އިން ބުންޏެެވެ.
ސިފައިންގެ އާއިލާތަކަށާއި އާންމުންނަށް ހުޅުވާލައިގެން ދެ ދުވަހަށް ކުރިއަށް ގެންދާ މި އާއިލީ ހަވީރުގައި ތަފާތު އެކި ހަރަކާތްތައް ކުރިއަށް ގެންދެ އެވެ.
އެގޮތުން ކޯސްޓްގާޑް ޝިޕް ޝަހީދު ޢަލީއަށް ޒިޔާރަތް ކުރުމާއި ސިފައިން ބޭނުން ކުރާ ބައެއް އެއްގަމު އުޅަނދުތަކާއި ސިފައިންގެ ޔުނީފޯމްތަކުގައި ފޮޓޯ ނެގުމުގެ ފުރުސަތު ވަނީ ހުޅުވާލައިފަ އެވެ. މީގެ އިތުރުން ކުޑަކުދިންނަށް ހާއްސަކޮށްފައިވާ ތަފާތު ކުޅިވަރުތައް ހިމެނެ އެވެ.
ސަދަން އޭރިއާ އިން ބުނީ އިއްޔެ ވެސް ބޮޑު ތަރުހީބެއް ލިބުނު އާއިލީ ހަވީރު ކުރިއަށް ދާނީ ހަވީރު 4:00-6:00 އަށް ކަމަށެވެ.