"ހަވީރު" ނޫސް ފުނޑާލަން ސަރުކާރުން ފަށާފައިވާ މަސައްކަތުގައި ސިވިލް ކޯޓުގެ ގާޒީ މުހައްމަދު ހަލީމްގެ މައްޗަށް އެކި ފަރާތްތަކުން ފޯރުވަމުންދާ ނުފޫޒުތަކާ ގުޅިގެން އެ ގާޒީ ކަންބޮޑުވުން ފާޅު ކުރައްވައި އެކި މީހުން ގާތު އެ ވާހަކަ ދައްކަންވަން ފައްޓަވައިފި އެވެ.
ކުރީގެ ނައިބު ރައީސް އަހްމަދު އަދީބުގެ ކޮރަޕްޝަނުގެ އަމަލުތަކުގެ ތެރެއިން ކޯޓުތަކަށް ގެނައި ކަމަށް ތުހުމަތު ކުރެވޭ ފަނޑިޔާރުންގެ ތެރޭގައި ހިމެނޭ ހަލީމަކީ ރައީސް އަބްދުﷲ ޔާމީން ގަޔާވާ އަދި އިތުބާރުކުރައްވާ ބޭފުޅެއް ނޫނެވެ.
އެހެންވެ ޔާމީންގެ ރުހުން ދީ، ފަނޑިޔާރު ކަމުގައި ހުރެވޭނެ ކަމުގެ ޔަގީންކަން ހަލީމަށް ލިބެން އަންނަނީ ސަރުކާރާއި މުޅި ޖުޑީޝަރީ ބައިވެރިވެގެން ހަވީރު ނޫހާ ދެކޮޅަށް ހިންގާ ޖަރީމާ ފުރިހަމަކޮށް ދިނުމުން ކަމަށް ވަނީ އެނގިފަ އެވެ.
ހަލީމް ގާޒީއާ ހަވާލާދީ އޭނާގެ ގާތް އެކުވެރި ޔަކު ބުނީ ހައި ކޯޓުންކޮށްފައިވާ ހުކުމާ ހިލާފަށް ހަވީރު ނޫހުގެ މައްސަލާގައި އެންމެ ދެ ގަޑިއިރު ތެރޭ ވަގުތީ އަމުރެއް ނެރެ އަދި ބަންދު ދުވަހެއްގައި ކޯޓު ހުޅުވައިގެން އަމިއްލައަށް “އެންގުމެއް” ތައްޔާރުކޮށްގެން، ރާއްޖޭގެ އެންމެ އިތުބާރު ބޮޑު ނޫސް ހުއްޓުވާލީ “މަތިން” އެގޮތަށް އެންގުމުންނެވެ.
"އައްޑޫ ލައިވް" އަށް އެނގިފައިވާ ގޮތުގައި ހަވީރު ނޫހުގެ މައްސަލާގައި، ޣަދަރު ގެއްލިފައިވާ، ސުޕްރީމް ކޯޓުގެ ފަނޑިޔާރު އަލީ ހަމީދުގެ އިތުރުން، ޖުޑީޝަލް ސާވިސް ކޮމިޝަން (ޖޭއެސްސީ) ގައި ރައީސްގެ މެންބަރުގެ ގޮތުގައި އިންނަވާ މުހައްމަދު ފައިސަލް އާ ހަވީރާ ދެކޮޅަށް ދައުވާ ކުރާ ފަރާތްތަކުގެ ވަކީލެއް ކަމަށްވާ ހަސަން ފަލާހް އާއި ޖޭއެސްސީގެ މެންބަރު ލަތީފާ ގާސިމް އަދި ރައްޔިތުންގެ މަޖިލީހުގެ މެންބަރު އަދި ޖޭއެސްސީގެ ވެސް މެންބަރު އިބްރާހިމް ރިޒާ އަމަލީ ގޮތުން ބައިވެރިވެ އެވެ.
ރިޒާއަކީ ހަވީރާ ދެކޮޅަށް ފުރަތަމަ ދައުވާކުރި އިރު، ހަވީރު ފޭރިގަންނަން މަސައްކަތްކުރާ ފަރާތްތައް ކޯޓުގައި ތަމްސީލުކުރި ވަކީލެވެ.
މި އެންމެން ގާޒީ ހަލީމަށް ނުފޫޒު ފޯރުވަނީ ސީދާ ރައީސް ޔާމީން އެ ގޮތަށް ބޭނުންވާތީ އެވެ.
ޖުޑީޝަރީގެ އިސް ބޭފުޅަކު "އައްޑޫ ލައިވް" އަށް ވިދާޅުވީ ދައުވާ ކުރާ އެންމެން ބައިވެރިވެގެން ހަވީރު ހިންގަން ހައި ކޯޓުން އަމުރުކޮށްފައި ނުވާ އިރު އަދި ހައި ކޯޓުގެ ހުކުމަށް ސުޕްރީމް ކޯޓުން ތާއީދުކޮށްފައި ވާއިރު ވެސް އެއާ ހިލާފުވާ ގޮތަށް ގާޒީ ހަލީމް ލައްވާ އަމުރެއް ނެރުވާފައި ވަނީ ހަލީމް ގާޒީކަމުން ވަކި ކުރުމަށް މަޅިއެއްގައި ބެއްދުމަށެވެ.
"ހައި ކޯޓުގެ ހުކުމުގައި އޮތީ އެ ބުނާ އެއްބަސްވުމަކާ ގުޅިގެން ސިވިލް ކޯޓުގައި ދައުވާކޮށް އެ މީހަކަށް ހައްގުވާ މިންވަރެއް ހޯދަން މަސައްކަތް ކުރުމުގެ ހައްގު އޮތް ކަމަށް. އެންމެން ބައިވެރިވެގެން ނޫސް ހިންގާށޭ އެންގޭނީ ސިވިލް ކޯޓުން މައްސަލަ ނިމި އެ މީހަކަށް ހައްގުވާ އެއްޗެއް އެނގިގެންތާ،" އޭނާ ވިދާޅުވި އެވެ. "ދައުވާކުރާ މީހުން ކޯޓުގައި ވެސް އެއްބަސްވެފައި ވަނީ ހަވީރު ތަރައްގީކުރީ ޑރ. ޒާހިރު އަމިއްލަ ގެދޮރު މޯގޭޖުކޮށްގެން ލޯނު ނަގައިގެން ކަމަށް. އެހެންވެ ސިވިލް ކޯޓުން ނިންމަން ޖެހޭނީ އެ މީހަކަށް ހައްގުވާ ވަރަކީ ކޮބައިތޯ. ކޮންމެ މީހަކަށް 25 އިންސައްތަ އެބަ އޮތޭ އެހެންވެ އެންމެވެގެން ނޫސް ހިންގާށޭ އަމުރެއް ނުކުރެވޭނެ. އެހެން ވިއްޔާ އެއީ އަމުރެއް ނޫން. ޝަރީއަތް ނުނިމެނީސް އެ ކުރީ ހުކުމެއް."
އޭނާ ވިދާޅުވީ ހަވީރުގެ މައްސަލަ ކުރިއަށް ދާއިރު އުސޫލުތަކާއި ގާނޫނުތަކާ ހިލާފަށް ގާޒީ ހަލީމަށް ކިތަންމެ ކަމެއް ނިންމަން މަޖުބޫރުކުރުވާނެ ކަމަށާއި އެހެން ނޫނީ ހަލީމަށް މަގާމުގައި ނުހުރެވޭނެ ކަމަށެވެ. އެއީ މިހާރުވެސް އޭނާގެ މައްސަލައެއް ޖޭއެސްސީއަށް ވެސް ހުށަހެޅިފައި ވެސް އޮތުމާ އެކުގައެވެ.
މީގެ ކުރިން ވެސް އެނގިފައިވާ ގޮތުގައި ހަވީރާ ދެކޮޅަށް ދައުވާކުރާ އެކަކު ކަމަށްވާ އިބްރާހިމް ރަޝީދު މޫސާ ގެންދަވަނީ މި މައްސަލާގައި ފަނޑިޔާރު އަލީ ހަމީދާ ތަކުރާރުކޮށް ބައްދަލުކުރައްވަމުންނެވެ. ބައެއް ބައްދަލުވުންތައް ސުޕްރީމް ކޯޓުތެރޭގައި ވެސް ކުރިއަށް ގެންދެއެވެ.
ހަލީމް ގާޒީ ނިންމަން ޖެހޭ ކަންކަން ސުޕްރީމް ކޯޓުން އަންގަމުން ދިއުމާއި ނާއިންސާފުން އެތައް ކަމެއް ކުރަމުން ދާތީ ކޯޓު ތެރޭގައި ވެސް ބައެއް މީހުން ޝަކުވާކޮށްފައިވެ އެވެ.
އެކަމަކު އަބުރު ގެއްލިފައިވާ އަލީ ހަމީދާއި އިތުބާރެއް ނެތް ޖޭއެސްސީ އާއި ވެރިކަން ދިފާއުކުރަން ބާރުގެ ބޭނުންކުރުން ނޫން ގޮތެއް ނެތް ޔާމީނަށް ހަވީރު ނޫސް ނައްތާލުން ނުވަތަ ބުނާހާ ގޮތެއް ހަދާނެ ކަހަލަ ބަޔަކާ އެ ނޫސް ހަވާލުކޮށްގެން ނޫނީ ހިތްހަމަޖެހުމެއް ނެތެވެ.
ހަވީރަށް ރައްޔިތުން ކުރާ އިތުބާރު މި ގައުމުގައި އެހެން މުއައްސަސާއަކަށް ނެތުމަކީ ހަވީރު ނައްތާލަށް އަތުކުރި އޮޅައިގެން އުޅޭ ސަބަބެވެ.