އައްޑު އަށް ސީ ޕްލޭންގެ ހިދުމަތް ދޭނެ ބަޔަކު ހޯދަން އައްޑޫ އިންޓަނެޝަނަލް އެއާޕޯޓް (އޭއައިއޭ) އިން ބީލަމަށް ހުޅުވާލައިފި އެވެ.
އެ ކުންފުނިން ބުނެފައިވާ ގޮތުގައި މިކަމަށް ޝައުގުވެރިވާ ރާއްޖެ އާއި ރާއްޖޭން ބޭރުގެ ފަރާތްތަކަށް ޕްރޮޕޯސަލް ހުށަހެޅޭނެ އެވެ.
ޕްރޮޕޯސަލް ހުށަހެޅުމުގެ ފުރުސަތު މި މަހުގެ 28 ވަނަ ދުވަހާ ހަމައަށް ވަނީ ހުޅުވާލައިފަ އެވެ.
އޭއައިއޭ އިން ބުނީ ގަމުގެ ސީ ޕްލޭން ބޭސް މެދުވެރިކޮށް، ސީ ޕްލޭން އޮޕަރޭޓް ކުރާ އިރު، ހިދުމަތް ދޭން ހަވާލު ކުރާ ކުންފުންޏަކުން ސީ ޕްލޭން ބޭސްގައި ޕްލެޓް ފޯމް އަޅަން ޖެހޭނެ ކަމަށެވެ.
ސީ ޕްލޭން ބޭސް ހަދާ ސަރަހައްދު މިދިޔަ އަހަރު ވަނީ ސާވޭކޮށް، އެ ސަރަހައްދު ފުންކޮށްފަ އެވެ.
އޭއައިއޭ އިން ބުނީ އަމާޒަކީ އަންނަ މަހުގެ ތެރޭގައި ހިދުމަތް ފެށުން ކަމަށެވެ.
އެ ކުންފުނިން ކުރިން ބުނެފައިވާ ގޮތުގައި ގަމަށް ސީ ޕްލޭންގެ ހިދުމަތް ދޭން ގައުމީ އެއާލައިން މޯލްޑިވިއަން އާ އެކު ވަނީ މަޝްވަރާތަކެއްކޮށްފަ އެވެ.
ގަމުގައި ސީ ޕްލޭންގެ ހިދުމަތް ފެށުމުން ގދ. އާއި ގއ. އަތޮޅުގެ ރިސޯޓްތަކަށް ގަމުން ޓޫރިސްޓުން އުފުލާނެ އެވެ.