ސިއްހީ ގޮތުން ދުޅަހެޔޮ ބަޔަކަށް ހަދައި ފުލުހުންނާއި ރައްޔިތުންނާ ދެމެދު އޮންނަ ގުޅުން އިތުރަށް ރަނގަޅު ކުރުމަށް ކުރިއަށް ގެންދާ ޕްރޮގްރާމްތަކުގެ ތެރެއިން އައްޑޫގައި ކަސްރަތު ޕްރޮގްރާމެއް ފަށައިފި އެވެ.
އާދީއްތަ ދުވަހު މަރަދޫ ފޭދޫ ޒުވާނުންގެ މަރުކަޒުގައި ފެށި މި ކަސްރަތު ޕްރޮގްރާމަކީ އައްޑޫގެ ރައްޔިތުންނަކީ ދުޅަހެޔޮ ސިއްޙަތެއްގައި ތިބޭ ބަޔަކަށް ހެދުމުގެ ގޮތުން ކުރިއަށް ގެންދާ ކަސްރަތު ޕްރޮގްރާމެެއް ކަމަށް ފުލުހުން ބުންޏެވެ.
މި ޕްރޮގްރާމުގައި ދުޅަހެޔޮ ސިއްޙަތެއްގައި ހުރުމަށް ކަސްރަތުގެ މުހިންމުކަމާއި ކަސްރަތު ކުރާނެ ގޮތާއި ފައިދާ ހުރި ކާނާ ބޭނުން ކުރުމުގެ މުހިއްމު ކަމާއި، ގޭގައި އަމިއްލައަށް ކުރެވޭނެ ކަސްރަތުތަކާއި އަދި ކަސްރަތާ ގުޅޭ މުހިންމު މައުލޫމާތު ދެެ އެވެ.
މީގެ އިތުރުން މި ޕްރޮގްރާމުގައި ޓީމް ބިލްޑިންގް އެކްސަސައިޒްތަކާއި ކަސްރަތު ޕްރޮގްރާމުގެ ބައިވެރިން ޤާނޫނަށް އަހުލުވެރި ކުރުމުގެ ގޮތުން، މައުލޫމާތު ދިނުމުގެ ކުލާސްތަކެއް ކުރިއަށް ގެންދާ ގޮތަށް ވެސް ހަމަޖެހިފައިވާ ކަމަށް ފުލުހުން ބުނެ އެވެ.
މި ކަސްރަތު ޕްރޮގްރާމުގައި އައްޑޫގެ 18 އަހަރުން މަތީގެ 35 މީހުން ބައިވެރިވެފައިވެ އެވެ.
މި ޕްރޮގްރާމުގައި މުދައްރިބުންގެ ގޮތުގައި ހަރަކާތްތެރި ވަނީ އައްޑޫ ސިޓީ ޕޮލިސްގައި މަސައްކަތް ކުރާ ކަސްރަތު ދާއިރާގެ ތަޖުރިބާ ހުރި ފުލުހުންނެވެ.
ފުލުހުން ބުނީ އައްޑޫގެ އެކި އަވަށްތަކުގައި ސިލްސިލާކޮށް ކުރިއަށް ގެންދާ ކަސްރަތު ޕްރޮގްރާމުގެ ތެރެއިން ފެށި ފުރަތަމަ ޕްރޮގްރާމު ދެ މަސް ދުވަހުގެ މުއްދަތަށް ކުރިއަށް ގެންދާނެ ކަމަށެވެ.