އަލިފާން ނިއްވަން ބޭނުން ކުރާ ވަސީލަތްތައް ސިފައިންނަށް ހޯދައި ދެއްވުމަށް ރައްޔިތުންގެ މަޖިލީހުގެ ހިތަދޫ މެދު ދާއިރާގެ މެމްބަރު ރިޓަޔާޑް ބްރިގޭޑިއާ ޖެނެރަލް އިބްރާހިމް މުހައްމަދުދީދީ (އިބްރާހީމްދީ) މިއަދު ގޮވައިލައްވައިފި އެވެ.
މާލޭގައި އިއްޔެ ކޯސްޓް ލައިން ފިހާރަ އަނދައި ހުލިވި ހާދިސާ އަށް އިޝާރާތް ކުރައްވައި ޕެންޝަނާ ބެހޭ ގާނޫނަށް ގެނައި އިސްލާހާ ބެހޭ ގޮތުން ރައްޔިތުންގެ މަޖިލީހުގެ މިއަދުގެ ޖަލްސާގައި އިބްރާހީމްދީ ވިދާޅުވީ މިއަދު ޕެންޝަން ފައިސާ ބޭނުންކޮށްގެން ގެދޮރު އެޅޭނީ އެމީހެއްގެ މުދާތައް ސަލާމަތް ކުރެވޭނެ ކަން ޔަގީންވެފައި އޮވެގެން ކަމަށެވެ.
އޭނާ ވިދާޅުވީ އަލިފާނުގެ ބޮޑެތި ހާދިސާތައް ތަކުރާރުވަމުންދާ އިރު އެފަދަ ހާދިސާތަކުން ސަލާމަތްވުމަށް ސިފައިންނަށް ބޭނުންވާ ފުރިހަމަ ތަކެއްޗާއި ވަސީލަތް ހޯދައިދޭން ޖެހިފައިވާ ކަމަށެވެ.
އިބްރާހީމްދީ ވިދާޅުވީ އިއްޔެ އަލިފާން ނިއްވި އިރު ފޯމް ޖަހަން އިތުރު ފަޔާ ޓްރަކެއް ވެސް ގެންނަން ޖެހުނީ އެއާޕޯޓުން ކަމަށެވެ.
މިއީ މީގެ 15 އަހަރު ކުރީގެ ވެސް ހާލަތު ކަމަށް އޭނާ ވިދާޅުވިއެވެ.
"އެހެންވީމަ އަޅުގަނޑު މި ގޮވާލަނީ ކުރިޔަށް އޮތް ސަޕްލިމަންޓަރީ ބަޖެޓުގައި ދިވެހި ސިފައިންނަށް، ހާއްސަ ގޮތެއް މާލޭގެ ސަލާމަތާއި ރައްކާތެރި ކަމަށް އަލިފާނުން ސަލާމަތް ކުރުމަށް ބޭނުންވާ ވަސީލަތްތައް ހޯދައި ދިނުމަށް ހާއްސަ ބަޖެޓެއް ހުށަހަހެޅުއްވައިގެން އެކަމަށް ބޭނުންވާ ކަންތައް ކޮށްދެއްވުމަށް،" 32 އަހަރު ސިފައިންގެ ހިދުމަތުގައު އުޅުއްވި އިބްރާހީމްދީ ވިދާޅުވި އެވެ.