ހަވީރު ނޫހަކީ ޑރ. މުހައްމަދު ޒާހިރު ހުސައިންގެ އެކަނި ތަނެއް ނޫން ކަމަށާއި އެހެން ތިން ބޭފުޅެއްގެ ހިއްސާ ވެސް އޮތް ތަނެއް ކަމަށް ހައި ކޯޓުން ކޮށްފައިވާ ހުކުމަކީ ކަނޑައެޅިގެން ބާތިލް، އިންސާފުގެ ކަންފުޅެއް ވެސް ނެތް ނިންމުމެއްކަން ހަވީރުގެ މައްސަލަ ސިވިލް ކޯޓުގައި ކުރިއަށް ގެންދަވާ ގާޒީ މުހައްމަދު ހަލީމަށް އެނގިވަޑައިގެން މަތީ ކޯޓުތަކަށް ފާޑު ވިދާޅުވެއްޖެ އެވެ.
ހަވީރަކީ "ހަވީރު ނިއުސް އެޖެންސީ" ކިޔާ ތަނެއްގެ ދަށުން ހިންގާ ނޫހެއް ކަމަށާއި އެ އެޖެންސީ އަކީ ޑރ. މުހައްމަދު ޒާހިރު ހުސައިން އާއި ފާރޫގު ހަސަން އާއި އިބްރާހިމް ރަޝީދު މޫސާ އާއި މުހައްމަދު ނައީމުގެ ނަމުގައި ރަޖިސްޓްރީކޮށްފައިވާ ތަނެއް ކަމަށް ހައި ކޯޓުން ވަނީ ހުކުމްކޮށްފަ އެވެ.
އެކަމަކު މި ހަތަރު މީހުންގެ މެދުގައި ހަވީރުގެ މުދާ ބެހުމަށް ހައި ކޯޓުން ކޮށްފައިވާ ހުކުމް ތަންފީޒު ކުރުމަށް ސިވިލް ކޯޓުގައި ކުރިއަށް ގެންދާ ޝަރީއަތަށް ޒާހިރުގެ ވަކީލުން އިއްޔެ ހުށަހެޅި "ހަވީރު ނިއުސް އެޖެންސީ" ގެ ރަޖިސްޓްރީގައި ޒާހިރުގެ ނަމެއް ނެތެވެ.
އޮތީ އަނެއް ތިން ބޭފުޅުންގެ ނަމެވެ. އެހެންވެ ހައި ކޯޓުން ޒާހިރުގެ މައްޗަށް ހުކުމް ކޮށްފައި ވަނީ ޒާހިރާ އެއްވެސް ގުޅުމެއް ވެސް ނެތް ތަނެއްގެ މައްސަލާގައިކަން ގާޒީ އަށް އެނގިވަޑައިގެން މި މައްސަލަ ހައި ކޯޓުން ނިންމި ފަނޑިޔާރުންނަށް ހަލީމް ގާޒީ ފާޑު ވިދާޅުވެ ވާހަކަ ދެއްކެވިކަން ވަނީ އެނގިފައެވެ.
ހަވީރު ނޫހަކީ 1979 އިން ފެށީގެން ޒާހިރުގެ ނަމުގައި ރަޖިސްޓްރީކޮށްގެން ހިންގަމުން އަންނަ ތަނެކެވެ. ފާރޫގު ހަސަން އާއި އިބްރާހިމް ރަޝީދު މޫސާ އާއި މުހައްމަދު ނައީމުގެ ނަމުގައި "ހަވީރު ނިއުސް އެޖެންސީ" ކިޔާ ތަނެއް ރަޖިސްޓްރީކޮށްފައި ވަނީ 1983 ގަ އެވެ.
މި ނިއުސް އެޖެންސީގެ ނަމުގައި ހަވީރު ނޫސް އެއްވެސް އިރެއްގައި ރަޖިސްޓްރީކޮށްފައެއް ނުވެ އެވެ. ފެށުނީންސުރެ އޮތީ ޒާހިރުގެ ނަމުގަ އެވެ.
އެކަމަކު ހައި ކޯޓުން ހުކުމްކޮށްފައި ވަނީ ޒާހިރު މާކުރިން ސުރެ ހިންގަމުން އައި ނޫހަކީ ފާރޫގު ހަސަން އާއި އިބްރާހިމް ރަޝީދު މޫސާ އާއި މުހައްމަދު ނައީމުގެ ވެސް ހިއްސާ އޮތް ތަނެއް ކަމަށެވެ.
ނޫސް އެޖެންސީގެ ރަޖިސްޓްރީ ޝަރީއަތަށް ހުށަހެޅުމުން ގާޒީ ހަލީމަށް ހުއްޓުން އަރައި "މިކަން ސުޕްރީމް ކޯޓަށް ހުށަހަޅުއްވަން ވީނުންތޯ" އޭ ވިދާޅުވި އެވެ.
އެއީ ހައި ކޯޓުން ކޮށްފައިވާ ހުކުމް ރަނގަޅު ކަމަށް، ޝަރީއަތަކާ ނުލައި ސުޕްރީމް ކޯޓުން ނިންމާފައި އޮތުމުންނެވެ.
ބުނެވޭ ގޮތުގައި ސުޕްރީމް ކޯޓުން މައްސަލަ ނުބަލަން ނިންމަވާފައި ވަނީ ހަވީރު ފޭރިގަތުމަށް ދައުވާކުރާ ފާރޫގަށް ބޮޑުބޭބެ ވިދާޅުވާ، ސުޕްރީމް ކޯޓުގެ އިސް ބޭފުޅެއް ކަމަށްވާ އަހްމަދު މާޖިދެވެ.
ގާޒީ ހަލީމްގެ ގާތް ބޭފުޅަކު ވިދާޅުވީ ރާއްޖޭގެ އެންމެ ގިނަ ބަޔަކު އިތުބާރުކުރާ ނޫސް މަރާލުމަށް ހިންގާ ޖަރީމާގައި ބައިވެރިވާން ޖެހުނީތީ ހަލީމް ހިތާމަކުރައްވާ ކަމަށާއި މިހާ ނާއިންސާފުން ނިންމާފައިވާ މައްސަލައެއް މިއިން ޒަމާނަކު ވެސް ދެކެވަޑައިނުގަންނަވާ ކަމަށް ހަލީމް ވިދާޅުވި ކަމަށެވެ.
އެކަމަކު މަގާމު ދިފާއުކުރުމަށް “މަތިން އަންގާ ގޮތް ހެދުން ނޫން ގޮތެއް ނެތް” ކަމަށް ހަލީމް ވިދާޅުވާ ކަމަށްވެ އެވެ.
ހަވީރު ނޫސް ފުނޑާލަނީ ސީދާ ރައީސް އަބްދުﷲ ޔާމީން އާއި ޖުޑީޝަރީގެ އިސް ބައެއް ބޭފުޅުން ބައިވެރިވެގެންކަން ކުރިން ވަނީ "އައްޑޫ ލައިވް" ގައި ލިޔެފަ އެވެ.