ދައުލަތުން ހިންގާ ކަންކަން ނޫސްތަކުގައި ކިތަންމެ ވަރަކަށް ޖެހި ނަމަވެސް އެކަން ކަމަށް އަބަދުވެސް މަރުހަބާ ކިޔާނެ ކަމަށް ރައީސް އަބްދުﷲ ޔާމީން މިރޭ ވިދާޅުވެއްޖެ އެވެ.
"ގެދޮރުވެތިކަން" ގެ ނަމުގައި މިރޭ މާލޭގައި ބޭއްވި ރަސްޔާތެއްގައި ރައީސް ވިދާޅުވީ، މީހެއްގެ ދިފާއެއް ނެތް މަރުހަލާއެއްގައި އަބުރު ކަތިލުމަށް ޖާގައެއް ނޫސްވެރިންނަށް ވެސް ނޯންނާނެ ކަމަށެވެ.
"މިއަދު ވެސް އަޅުގަނޑު ދުށިން ސިލޯންނަށް އަޅުގަނޑުމެން ނޫސްވެރިން ކުރި ޒިޔާރަތަކީ ކޮބައިތޯ؟ ނޫސްވެރިކަމުގެ މިނިވަންކަން ނެތް ވާހަކަ، ކޮން މިނިވަން ކަމެއްތޯ މިތާ ނެތީ؟ ކޮން މިނިވަން ކަމެއް ނެތިގެންތޯ މި އުޅެނީ؟" ރައީސް ވިދާޅުވި އެވެ. "އެ މިނިވަން ކަމަކީ މީހުންގެ އަބުރު ނަގާލުމަށް ކުރާ މަސައްކަތްތައް ހުއްޓުވުމަށްކުރާ މަސައްކަތެއްތޯ؟ އެއީ ތޯ މިނިވަންކަން ނެތުމަކީ؟"
ރައީސް ޔާމީން އަދި ވިދާޅުވީ ދައުލަތުން ކުރާ ކަންކަން ނޫހެއްގައި ޖަހާނެ މިންވަރަކަށް ޖަހަންވީ ކަމަށެވެ. އެހެން ނަމަވެސް ދައުލަތުގެ މުއައްސަސާއެއްގެ އަބުރެއް ނަގައެއް ނުލެވޭނެ ކަމަށެވެ.
"ނޫހެއްގައި ޖަހާނެ ވަރަކަށް ދައުލަތުން ކުރާ ކަންކަން ޖަހަންވީ ދައުލަތުގެ މުއައްސަސާއެއްގެ އަބުރެއް ނަގައެއް ނުލެވޭނެ،" ޔާމީން ވިދާޅުވީ އެވެ. "އެހެން ނަމަވެސް ދައުލަތުން ހިންގާ ކަންކަމާ ގުޅޭ ގޮތުން އަރިހުރަހަށް ޖަހާނެ އެއްޗެއް ޖެހުން އެއީ އޭފޯ ސައިޒް ވިޔަސް އޭ ތޫރީ ސައިޒް ވިޔަސް ޖަހަން ކެރުނު ވަރަކަށް ޖަހަންވީ. އެއީ އަޅުގަނޑުމެން މަރުހަބާ ކިޔާނެ ކަންކަން."
ރައީސް އަދި ވިދާޅުވީ ނޫސްވެރިކަމުގެ މިނިވަންކަން ނެތް ކަމަށް ބުނެ ނެތޭ ބުނެ ވާހަކަ ދެއްކުމަކީ ބަލައި ގަނެވޭނެ ކަމެއް ނޫން ކަމަށެވެ.