ސަރުކާރުން ސިޔާސީ ޕާޓީތަކާ އެކު ކުރާ މަޝްވަރާތަކުގައި އެންމެ ފަހުން ކުރީގެ ރައީސް މުހައްމަދު ނަޝީދާއި އަދާލަތު ޕާޓީގެ ރައީސް އިމްރާމް އަބްދުﷲ ބައިވެރި ކުރައްވަން ނިންމެވިޔަސް ރައީސް އަބްދުﷲ ޔާމީނަށް ހިތް ހަލާސް ކުރުމެއް ނެތް ކަމަށާއި ވެއްޓެންދެން ވިއްދާނެ ކަމަށް އެމްޑީޕީގެ ޗެއާޕާސަން އަލީ ވަހީދު ވިދާޅުވެއްޖެ އެވެ.
އިނގިރޭސިވިލާތުގައި މިހާރު ހުންނަވާ އަލީ ވަހީދު ކުރެއްވި ޓްވީޓްތަކެއްގައި ވިދާޅުވީ ސަރުކާރުން މިހާރު ފަހަތަށް ޖެހެނީ ސަލާމަތީ ބާރާއި ފަނޑިޔާރުގޭގެ ކޮންޓްރޯލް ގެއްލޭތީ ކަމަށެވެ.
އޭނާ އަދި ވިދާޅުވީ ސަރުކާރު "ވެއްޓޭނެ" ކަމަށާއި އިނބިލީހުގެ ނާޅިއަކީ އަނިޔާވެރިކަން ކަމަށެވެ.
"އިނބިލީހަކަށް ހެއްލޭކަށް ނުވާނެ އެވެ. ޔާމީނަށް އިތުބާރު ކުރާކަށް ނުވާނެ އެވެ. އޭނައަކީ އަނިޔާވެެރިއެކެވެ." އަލީ ވަހީދު ވިދާޅުވި އެވެ.
ބޭސް ފަރުވާ އަށް މިހާރު ލަންޑަނުގައި ހުންނެވި ކުރީގެ ރައީސް ނަޝީދާއި ގޭބަންދުގައި ހުންނެވި އިމްރާނަކީ ޖަލަށް ހުކުމްކޮށްފައިވާ ދެ ބޭފުޅުންނެވެ.
އެހެންވެ ސަރުކާރުން ކުރިން ބުނެފައި ވަނީ މަޝްވަރާތަކުގައި ގައިދީންތަކެއް ބައިވެރި ކުރަން ނުޖެހޭ ކަމަށާއި ގައިދީންތަކަކާ އެކު ކުރަން ޖެހޭ މަޝްވަރާއެއް ނޯންނާނެ ކަމަށް ބުނެފަ އެވެ.
އެ ދެ ބޭފުޅުން މަޝްވަރާތަކުގައި ބައިވެރި ކުރަން ނިންމައި ސަރުކާރުން މިހާރު ވަނީ ނަޝީދު ރާއްޖެ ވަޑައިގަތުމަށް ވެސް ދައުވަތު އަރުވައިފަ އެވެ.