ޝަރުއީ ދާއިރާގެ މުވާސަލާތީ ވިއުގަ އިތުރަށް ތަރައްގީ ކުރުމުގެ ގޮތުން ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އާއި ދިރާގާ ދެމެދު އެއްބަސްވުމުގައި ސޮއިކޮށްފި އެވެ.
"ޖުޑީޝަރީ ނެޓްވޯކް ތަރައްގީ ކުރުމުގެ މަޝްރޫއު" ގެ ނަމުގައި ކުރިއަށް ގެންދާ މި މަޝްރޫއުގެ އެއްބަސްވުމުގައި ޑީޖޭއޭގެ ފަރާތުން އެއްބަސްވުމުގައި ސޮއި ކުރެއްވީ ޖުޑީޝަލް އެޑްމިނިސްޓްރޭޓަރު ހަސަން ސައީދެވެ.
ދިރާގުގެ ފަރާތުން އެއްބަސްވުމުގައި ސޮއި ކުރެއްވީ އެ ކުންފުނީގެ ދިރާގުގެ ސީއީއޯ އަދި އެމްޑީ އިސްމާއިލް ރަޝީދެވެ.
ދިރާގުން ބުނީ ޑީޖޭއޭގެ ވިއުގައަކީ ރާއްޖޭގައި ގާއިމް ކުރެވޭ މިފަދަ އެންމެ ފުރަތަމަ އަދި އެންމެ ބޮޑު ވައިޑް އޭރިއާ ނެޓްވޯކް (ޑަބްލިއުއޭއެން) ކަމަށެވެ.
ސައީދު ވިދާޅުވީ ޝަރުއީ ދާއިރާގެ ކޯޓުތަކާއި އިދާރާތައް އެއް ވިއުގައަކުން ގުޅާލުމަށް 2011 ވަނަ އަހަރުން ފެށިގެން މަސައްކަތް ކުރެވިފައިވާ ކަމަށެވެ.
އެހެން ނަމަވެސް މިކަން ފަހިވެފައި މިވަނީ ފާއިތުވި ފަސް ވަރަކަށް މަސް ދުވަހުގެ ތެރޭގައި ދިރާގުގެ ބޭފުޅުންނާ އެކު ކުރެވުނު މަޝްވަރާތަކަށް ފަހު ކަމަށް ވިދާޅުވި އެވެ.
އޭނާ ވިދާޅުވީ މި މަޝްރޫއު މުޅިން ފުރިހަމަވުމުން ޝަރުއީ ދާއިރާ ކަރުދާހަށް ބަރޯސާ ވާން ޖެހޭ މިންވަރު ވަރަށް ބޮޑުތަން ދަށް ކުރެވިގެން ދާނެ ކަމަށެވެ.
މި މަޝްރޫއުގެ ދަށުން ޑީޖޭއޭ އާއި 101 މެޖިސްޓްރޭޓް ކޯޓް، އިންޓަގްރޭޓެޑް ކޮމިއުނިކޭޝަން ނެޓްވޯކަކުން ގުޅާލެވި މި 101 މެޖިސްޓްރޭޓް ކޯޓްގައި ޔުނިފައިޑް ކޮމިއުނިކޭޝަން އެންހޭންސްމަންޓް ސޮލިއުޝަނެއް ގާއިމު ކުރެވިގެން ދާނެ އެވެ.
ޑީޖޭއޭ އާ ގުޅާލެވޭ 101 މެޖިސްޓްރޭޓް ކޯޓަކީ އާބާދީ 1،000 އަށް ވުރެ ބޮޑު ރަށްރަށުގެ މެޖިސްޓްރޭޓް ކޯޓުތަކާއި، ވެރިކަން ކުރާ ރަށްރަށުގެ މެޖިސްޓްރޭޓް ކޯޓުތައް ކަމަށް ވެސް ޑީޖޭއޭ އިން ބުންޏެވެ.
އެގޮތުން މި މަޝްރޫއަށް ތިން ހިދުމަތެއް ދިރާގުން ފޯރުކޮށްދޭ ގޮތަށް ވަނީ ހަމަޖެހިފަ އެވެ.
އެއީ ކްލައުޑް ވޮއިސް/އޯޑިއޯ-ވީޑިއޯ ކޮންފަރެންސިން ހިދުމަތާއި، ހައި އިންޓްރާނެޓް ލިންކް އަދި އިންޓަނެޓް ހިދުމަތެވެ.
މި މަޝްރޫއުގެ ދަށުން 101 ރަށުގައި ޔުނިފައިޑް ކޮމިއުނިކޭޝަން އެންހޭންސްމަންޓް ސޮލިއުޝަން 26 ހަފުތާގެ ތެރޭގައި ގާއިމް ކުރަން ހަމަޖެހިފައިވެ އެވެ.