"ހަވީރު" ނޫސް މިހާތަނަށް ހިންގެވި ޑރ. މުހައްމަދު ޒާހިރު ހުސައިނާއި އޭނާގެ ބޭފުޅުންގެ އިތުރުން "ހަވީރު" ގެ އެއްވެސް މުވައްޒަފަކަށް، އެހެން ނޫހެއް ނުއުފެއްދޭ ގޮތަށް ކޯޓު އަމުރެއް ނެރެ ދިނުމަށް ސިވިލް ކޯޓަށް ހުށަހަޅައިފި އެވެ.
މި އަމުރު ނެރެ ދިނުމަށް އެދި ކޯޓަށް ހުށަަހެޅީ ހަވީރު ނިއުސް އެޖެންސީގެ ދެ ހިއްސާދާރުން ކަމަށްވާ ފާރޫގު ހަސަނާއި އިބްރާހިމް ރަޝީދު މޫސާ އެވެ.
އެ ދެ މީހުން ހުށަހެޅި މައްސަލައިގެ އަަޑު އެހުމެއް މާދަމާ އަށް މިހާރު ވަނީ ތާވަލް ވެސް ކޮށްފަ އެވެ.
މިފަދަ އަމުރެއް ނެރެ ދިނުމަށް ހުށަހަޅާފައިވާ އިރު، ހަވީރު ނޫހުގެ މައްސަލައިގައި މިދިޔަ ހޯމަ ދުވަހު އޮތް އަޑު އެހުމުގެ ތެރޭގައި ފާރޫގާއި އިބްރާހިމް ރަޝީދުގެ ފަރާތުން ވަނީ އެހެން އަމުރެއް ވެސް ނެރެ ދިނުމަށް ހުށަހަަޅައިފަ އެވެ.
އެއީ ހަވީރު ނޫހުގައި މިހާރު ތިބި އެއްވެސް މުވައްޒަފަކަށް އެހެން މީޑިއާއަކަށް ބަދަލު ނުވެވޭނެ ކަމަށާއި އެއީ ހަވީރު ނޫހުގައި ދެމިތިބި މުވައްޒަފުންގެ ގޮތުގައި ކަނޑައަޅައި ދިނުމަށެވެ.
ނަމަވެސް އެ ހުށަހެޅުމާ މެދު ހޯމަ ދުވަހުގެ އަޑު އެހުމުގައި ގޮތެއް ނުނިންމައި، ފަނޑިޔާރު މުހައްމަދު ހަލީމް ވިދާޅުވީ ވަކި މައްސަލައެއްގެ ގޮތުގައި އެކަންކަން ހުށަހަޅުމަށެވެ.
ރާއްޖޭގެ އެންމެ ދުވަސްވީ ނޫހުގެ މިލްކުވެރިކަމާ މެދު އުފެދުނު މައްސަލަތާ ގުޅިގެން އެ ނޫސް މިހާރު ވަނީ ހުއްޓުމަކަށް އައިސްފަ އެވެެ.