ލައިޗީއަކީ ދިވެހިންނާ އެހާ ރައްޓެހި މޭވާއަކަށް ނުވެދާނެ އެވެ. އެެކަމަކު މިއީ މިހާރު ބާޒާރު ފަސޭހަކަމާ އެކު ގަންނަން ލިބޭ މޭވާއެކެވެ.
ތާޒާކޮށް ގަންނަން ލިބުމުގެ އިތުރަށް، ދަޅުގައި ބަންދުކޮށްފައި ހުންނަ ލައިޗީ ވެސް މިހާރު ހޯދުމަކި ދަތި ކަމެެއް ނޫނެވެ.
މިއީ ފައިދާތައް ގިނަ މޭވާއެކެވެ. ކުރު ގޮތަކަށް ލައިޗީގެ ފައިދާތަކަށް ބަަލައިލުން ކިހިނެއް ވާނެ ބާވަ އެވެ؟
ތަޖުރިބާކާރުން ވިދާޅު ވަނީ ލައިޗީއަކީ ހަޖަމު ކުރުމުގެ ނިޒާމު ރަނގަޅުކޮށްދޭ މޭވާއެއް ކަމަށެވެ. އޭގައި ގިނަ އަދަދަކަށް ފެނާއި ފައިބަރު އެކުލެވޭތީ ބަނޑުގެ މަސައްކަތްތަކަށް ލުއިކަން ގެނެސްދީ ހަޖަމް ކުރުމުގެ ނިޒާމް ބަރާބާރުކޮށްފަ އެވެ.
ހަމަ މިއާ އެކު ބަރުދަން ލުއި ކުރުމަށް ވެސް ލައިޗީ އެހީތެރިވެދެ އެވެ. އެހެންވެ ވީހާ ވެސް ގިނައިން މި މޭވާ ކެވޭތޯ ބަލަން ވާނެ އެވެ.
ލޮލުގެ މައްސަލަތައް ހުންނަ މީހުންނަށް ވެސް ލައިޗީއަކީ ހަމަ އެހީތެރިއެކެވެ.
އޭގައި އެކުލެވޭ މާއްދާތަކުން ލޮލުގެ ފެނުން ރަނގަޅުކޮށްދީ، ލޮލުގެ ދުޅަހެޔޮކަން ހެޔޮވަރުކޮށްދެ އެވެ.
ލައިޗީގެ އިތުރު މުހިއްމު ފައިދާއަކަށް ބަލާ އިރު، މިއީ ކެންސަރާ ދެކޮޅަށް ވެސް ހަނގުރާމަކޮށް ދޭ މޭވާއެކެވެ.
އެގޮތުން މީގައި އެކުލެވޭ މާއްދާތަކުގެ ސަބަބުން އުރަމަތީގެ ކެންސަރު ފަދަ ނުރައްކާތަކުން ރައްކާތެރިކޮށް ދިނުމަށް ބާރު އަަޅައިދެ އެވެ.