ދުއިސައްތަ ސައްބީސް ވަނަ މީރެސައިޑް ޑާބީ ލިވަޕޫލްގެ މައްޗަށް ކުރި ހޯދައިގެން ނިމިއްޖެ އެވެ.
އިނގިރޭސި ޕްރިމިއާ ލީގު ތާރީޚުގައި އޮތް އެންމެ ދުވަސްވީ ވާދަވެރިކަން، ލިވަޕޫލް އަދި އެވަޓަން ބައްދަލު ކުރާ މެޗަށް މީރެސައިޑް ޑާބީ ގެ ނަމުން ނަންދެވިގެން ކުޅޭއިރު މިއީ ލިވަޕޫލްގެ ރައްޔިތުންނަށް އެންމެ މުހިއްމު މެޗެވެ.
ރޭ ލިވަޕޫލްގެ ދަނޑު، އެންފީލްޑް ގައި ކުޅުނު މިމެޗުގައި ލިވަޕޫލް ވަނީ 10 ކުޅުންތެރިންނާ އެކު މެޗުގެ ދެވަނަ ހާފު ކުޅެން ޖެހުނު އެވަޓަންގެ މައްޗަށް ފަސޭހަކަމާ އެކު 0-4 ގެ ނަތީޖާއަކުން ކުރި ހޯދައިފަ އެެވެ.
މެޗުގެ ފުރަތަމަ ހާފު 0-2 ގެ ނަތީޖާއަކުން ލިވަޕޫލް ކުރީގައި އޮވެ ނިމިފައިވާ އިރު ގޯލުތައް ފެނިގެން ގޮސްފައި ވަނީ ޑިވޮކް އޮރީގީ އަދި ޑެފެންޑަރު ސަކޯގެ ފަރާތުންނެވެ.
ދެވަނަ ހާފު ފެށިގެން މާ ގިނަ އިރުތަކެއް ނުވެ އެވަޓަންގެ ރަމިރޯ ލިވަޕޫލްގެ އޮރިގީ އަށް ކުރި ފައުލަކާއި ގުޅިގެން ރެފްރީ ވަނީ އޭނާ އަށް ރަތް ކާޑު ދައްކައި ދަނޑުން ބާލައިފަ އެވެ.
ދިހަ ކުޅުންތެރިންނާ އެކު ކުޅުނު އެވަޓަންގެ ފަރާތުން މާ ބޮޑު ކުޅުމެއް އޭގެ ފަހުން ފެނިފައެއް ނުވެ އެވެ.
ޑެނިއަލް ސްޓަރިޖް އަދި ފިލިޕް ކުޓީނިއޯގެ ގޯލްތަކާ އެކު ލިވަޕޫލް ވަނީ ފޯރިއެއް ނެތް ޑާބީ ފަސޭހާކަމާ އެކު ކާމިޔާބުކޮށްފަ އެވެ.
މެޗު ނިމެން ކައިރިވަމުން ދިޔަ އިރު ގިނަ އަދަދެއްގެ އެވަޓަން ސަޕޯޓަރުން ސްޓޭޑިއަމް ދޫކޮށްގޮސްފައިވާ އިރު ބައެއް ސަޕޯޓަރުންގެ ލޮލުން ކަރުނަ ފައިބައިގެން ގޮސްފައިވާ ތަން ވެސް ރޭގައި ފެނިގެން ދިޔަ އެވެ.
ރޭ ކުޅުނު މެޗަކީ ކައިރި މާޒީގައި ފެނިގެންގޮސްފައިވާ އެންމެ ވާދަވެރިކަން ކުޑަ މީރްސައިޑް ޑާބީކަން ފާހަގަކޮށްލެވެ އެވެ.