މޯލްޑްވިސް ކަރެކްޝަނަލް ސާވިސްގެ ކޮމިޝަނަރު އޮފް ޕްރިޒަންސްގެ މަގާމުގައި ހުންނެވި މުހައްމަދު ހުޝާމް މަގާމުން ދުރުކޮށްފައިވަނީ ރައީސް ޔާމީން އަރިހުގައި ދެންނެވުނު ކުޑަކުޑަ "ކުށްބަހެއް" ގެ ސަބަބުން އެކަމާ ރައީސް ކޯފާވެވެގެން ކަމަށް އައްޑޫ ލައިވް އަށް މައުލޫމާތު ލިބިއްޖެއެވެ.
ހޯމް މިނިސްޓަރު އުމަރު ނަސީރު އާ ހަވާލާދީ "އައްޑޫ ލައިވް" އަށް މައުލޫމާތުދިން ހޯމް މިނިސްޓްރީގެ ޑެޕިއުޓީ މިނިސްޓަރަކު ވިދާޅުވީ ހުޝާމް އަށް "ކުށްބަހެއް" ގެ ގޮތުގައި ރައީސް އަރިހުގައި ދެންނެވުނީ ކުރީގެ ރައީސް މުޙައްމަދު ނަޝީދު ފަރުވާގެ ކަންތަކުގައި ހޮސްޕިޓަލުގައި އެޑްމިޓްކޮށްގެން "ޕްރޮސީޖާރ" ކުރިއަށްގެންދާ ވާހާކަ ދެންނެވުމުގެ ތެރޭގައެވެ.
" ނަޝީދު ފަރުވާގެ ކަންތަކުގަ އެޑްމިޓްކޮށްގެން "ޕްރޮސީޖާރ" އެއް ކުރިއަށްގެންދާވާހަކަ ހުށަހެޅިފައިވާ ލިޔުންތަކުގައި އޮތުމުން ހުޝާމް އަށް އޮޅިވަޑައިގެން ރައީސް އަށް ދެންނެވީ އޮޕަރޭޝަނެއް ކުރާ ވާހަކަ. އެވާހަކަ އާ ގުޅިގެން ރައީސް ނަޝީދުގެ އޮޕަރޭޝަން ކުރައްވަންޖެހޭ ކަމަށް ވިދާޅުވެ ރައީސް ޔާމީން އެތައް ވާހަކައެއް ދައްކަވައިފި. މާ ފަހުން އެނގިވަޑައިގަތީ އަސްލު އޮޕަރޭޝަނެއްގެ ވާހަކަ ލިޔުންތަކުގަ ނެތްކަން " އެފަރާތުން އިތުރަށް މައުލޫމާތު ދެމުން ވިދާޅުވިއެވެ.
ރައީސް ޔާމީން ގއ އަތޮޅަށް ކުރެއްވި ދަތުރުފުޅުގައި ބޭސްފަރުވާއަށް އިނގިރޭސިވިލާތަށް ވަޑައިގެންނެވި ކުރީގެ ރައީސް މުހައްމަދު ނަޝީދު، އޮޕަރޭޝަން ކުރައްވަން އަންގާރަ ދުވަހު އެޑްމިޓްވާނެ ކަމުގެ ލިޔުމެއް ދީފައިވާ ކަމަށް ވިދާޅުވެ ވަނީ ވާހަކަފުޅު ދައްކަވާފައެވެ.
ނަމަވެސް ނަޝީދުގެ ވަކީލުންވަނީ ފަހުން އެކަން ދޮގުކުރައްވާފައެެވެ. އަދި ރައީސް ނަޝީދު ވަކީލުންނަށާއި ނަޝީދުގެ އާއިލާއަށް ވެސް އެމަނިކުފާނުގެ ސިއްޙީ ހާލަތާއި ބެހޭގޮތުން އެނގިވަޑައިނުގަންނަވާ އެތައް ކަމެއް ރައީސް އަބްދުﷲ ޔާމީން އަށް އެނގިވަޑައިގެންފި ކަމަށް ބުނެ ގިނަބައެއްގެ ފާޑުކިއުންތައް ރައީސް ޔާމީން އަށް އަމާޒުވިއެވެ.
އެނގިފައިވާގޮތުން ރައީސް ގއ އަތޮޅުގައި ދެއްކެވި ވާހަކަފުޅަކީ މޯލްޑްވިސް ކަރެކްޝަނަލް ސާވިސްގެ ކޮމިޝަނަރު އޮފް ޕްރިޒަންސްގެ މަގާމުގައި ކުރިން ހުންނެވި މުހައްމަދު ހުޝާމްގެ ފަރާތުން އެ މައުލޫމާތު ލިބުނުގޮތުގެ މައްޗަށް ދެއްކެވި ވާހަކަފުޅެކެވެ. އަދި އެކަމާ ކޯފާވެ ވަޑައިގެން ހުޝާމް ވަގުތުން ސަސްޕެންޑް ކުރުމަށްވެސް ރައީސް އެންވިކަމަށް އިތުބާރުހުރި ގޮތަކަށް އައްޑޫލައިވް އަށް މައުލޫމާތު ލިބިފައިވެއެވެ.
މިކަމާ ގުޅިގެން ރައީސް ޔާމީން އަކީ ކަންކަމުގައި ވަރަށް ބޮޑަށް ކޯފާ އިސްކުރައްވާ ބޭފުޅެއް ކަމަށް ވިދާޅުވެ އުމަރު ނަސީރު ވަނީ ވާހަކަ ދައްކަވާފައެވެ. އަދި ހުޝާމް މަގާމުން ވަކިކުރުމުގެ ކުރިން ރިޓަޔާރ ކުރެވޭނެ އިންތިޒާމް ހަމަޖެއްސެވީވެސް ސީދާ އުމަރު ނަސީރު އިސްނަންގަވައިގެން ކަމަށް ހުޝާމް ގެ އަރިސް ފަރާތްތަކުން މައުލޫމާތު ދީފައިވެއެވެ.
ރައީސް ޔާމީން ކޮމިޝަނަރު އޮފް ޕްރިޒަންގެ މަގާމަށް އަހުމަދު ޝިހާން މިއަދު ވަނީ އައްޔަންކުރައްވާފައެވެ.ޝިހާންއަކީ ކުރިން ޑީޕީއާރުއެސްގެ ނަމުގައި އެ މުއައްސަސާ ހިންގި އިރު، ކޮމިޝަނާ އޮފް ޕްރިޒަންސްގެ މަގާމުގައި ކުރިން ވެސް ހުންނެވި ބޭފުޅާއެވެ.
.