ފެނަކަ އިން 265 މިލިއަން ރުފިޔާ ވިލިފުށީ ދާއިރާގެ މަޖިލިސް މެމްބަރު ރިޔާޒް ރަޝީދު އަށް ދީފައިވާ މައްސަލައެއް ފެންމަތިވެެއްޖެއެވެ. މައުލޫމާތު ލިބިފައިވާގޮތުން ރިޔާޒު ރަޝީދުގެ މަސްލަހަތު އޮންނަ މެރީޑިއަމް ސާވިސަސް އަށް ނަހަމަގޮތުގައި މިފާއިސާ ދީފައިވާ ކަން އެންޓި ކޮރަޕްޝަން ކޮމިޝަންގެ ތަހުޤީގަކުންވެސް މިހާރުވަނީ އެނގިފައެވެ. " އައްޑު ލައިވް" އަށް އެނގިފައިވާ ގޮތުގައި މިކަން ރައީސުލް ޖުމުހޫރިއްޔާގެ ސަމާލުކަމަށް ގެނައުމަށް އޭސީސީ އިން ވަނީ މިހާރު ނިއްމާފައެވެ.
އޭސީސީ އިން ކޮށްފައިވާ ތަހުގީގުން އެނގިފައިވާ ގޮތުގައި މެރީޑިއަމް ސާވިސަސް އަށް ޑީސަލް ތެޔޮ ސަޕްލައި ކުރުމަށް ފެނަކައިން ވަނީ އޯޑަރު ތައް ދީފައެވެ. މިގޮތުން އެފް.އެސް.އެމް އިން 8ރ ލީޓަރެއް ވިއްކާ ތެޔޮ ފެނަކަޔަށް މެރީޑިއަމް އިން ސަޕްލައި ކޮށްދީފައިވަނީ 16ރ އާއި 23ރ އާއި ދެމެދުގެ އަގުތަކުގައެވެ. އެހެންކަމުން ވިޔާފާރީގެ މި މުޢާމަލާތުން އެތައް މިލިއަން ރުފިޔާގެ ފައިދާ މެރީޑިއަމް ސާވިސަސް އަށް ލިބެމުން ދެއެވެ.
މީގެ އިތުރުން ގަލްފް ބްރޭންޑްގެ އަޑީތެޔޮ ފެނެކަޔަށް ސަޕްލައިކުރަނީ ވެސް މެރީޑިއަމް ސާރވިސަސް އިންނެވެ. އެމްޓީސީސީ ގެ ފަރާތުން ކާސްޓްރޯލް ވިއްކިނަމަވެސް ފެނަކައިން އެމްޓީސީސީ އިން ކާސްޓްރޯލް ނުގަނެ ގަލްފް ބްރޭންޑްގެ އަޑީތެޔޮ ގަންނަމުން ދަނީ މެރީޑިއަމްގެ އިސްވެރިންނާއި ފެނަކަ ކޯޕަރޭޝަނުގެ ވެރިން ގުޅިގެން ނާޖާއިޒް ފާއިދާ ހޯދުމަށްކަމަށް ބެލެވެއެވެ.
މެރީޑީއަމް ސާވިސަސް އަކީ ވިލުފުށީ ދާއިރާގެ މަޖީލީސް މެމްބަރު ރިޔާޒް ރަޝީދު އުފެއްދި ކުންފުންޏެކެވެ. ނަމަވެސް ފަހުން ރިޔާޒް ރަޝީދުގެ އާއިލީ ދެ ފަރާތެއް ޑިރެކްޓަރުންގެ ގޮތުގައި ހަމަޖައްސުމަށްފަހު ރިޔާޒް ރަޝީދު އޮޕަރޭޓް ކުރަމުންދަނީ ފަރުދާގެ ފުރަގަހުންނެވެ.
ވިލިފުށީ ދާއިރާގެ މެމްބަރު ރިޔާޒް ރަޝީދުގެ މުއްސަންދި ދިރިއުޅުމަކީ މެރީޑިއަމް އިން ސަރުކާރުގެ ކުންފުނިތައް މެދުވެރިކޮށް ހޯދަމުންދާ ނާޖާއިޒް ފާއިދާ ކަމަށް ގިނަބަޔަކު ތުހުމަތުކުރެއެވެ.
ރިޔާޒް ރަޝީދު ވަނީ އެމްއެމްޕީއާރްސީ އަށް 600،000 އެމެރިކާ ޑޮލަރު ދައްކައިގެން ރިޔާޒް ރަޝީދުގެ އުފަން ދަރިންގެ ނަމުގައި ރިސޯޓެއް ތަރައްގީ ކުރުމަށް ރަށެއް ގަނެފައެވެ.އަދި 4 މިލިއަން ރުފިޔާގެ އަގުހުރި ރެހެންދި 1 ކުން ލަގްޒަރީ ފްލެޓެއްވެސް އެއްފަހަރާ ފާއިސާ ދެއްކުމަށްފަހު ވަނީ ގަނެފައެވެ.
ފެނަކަ ކޯޕަރޭޝަނުން ނަހަމަ ގޮތުގައި ރިޔާޒް ރަޝީދުގެ މަސްލަހަތު އޮންނަ ކުންފުންޏަކަށް ބޮޑެތި ފާއިދާތައް ނަގަމުންދާއިރު، އިއްތިފާޤަކުން ނަމަވެސް ފެނަކައިގެ އެމްޑީ މުހައްމަދް ނިމާލް ވެސް ވަނީ ރެހެންދި ފްލެޓް އެއް 4 މިލިއަން ރުފިޔާ އެކީ އެއްފަހަރާ ދެއްކުމަށްފަހު ގަނެފައެވެ. އަދި މީގެއިތުރުން ދުނިޔޭގެ ބާޒާރަށް ނެރޭ މަޝްހޫރު އަގުބޮޑު ކާރުތަކަށް ނިމާލް އޯޑަރު ދެއްވާފައި ވާކަމުގެ މައުލޫމާތު ވަނީ ލިބިފައެވެ.
އެމެއެމް ޕީއާރްސީގެ 5 މިލިއަން ޑޮލަރުގެ އޯޑިޓް ރިޕޯޓު އޯޑިޓާ ޖެނެރަލް ނެރުމުން އެމައްސަލަ އޭސީސީ އަށް ބެލުނީ 18 މަސްދުވަހުންނެވެ. އަދި އެ 18 މަސްދުވަހުގެ ތެރޭގައި އިތުރު 70 މިލިއަން ޑޮލަރު އެމްއެމްޕީއާރްސީ އިން ހިޔާނާތްވެފައިވާކަން ހުދްސަރުކާރުންވެސް މިވަނީ އެއްބަސްވެފައެވެ. އެހެންކަމުން 205 މިލިއަން ރުފިޔާގެ ވިޔަފާރި ނާޖާއިޒް ގޮތުން މެރީޑިއަމް ސާވިސަސް އިން ހޯދާފައިވާކަން އެނގި ތިބެ މިކަން އޭސީސީ އިން ނުހުއްޓުުވުމަކީ ދައުލަތަށް އެތައް ބިލިއަން ރުފިޔާގެ ގެއްލުން ލިބިދާނެކަމެކެވެ.