ދިވެހި އަސްކަރިއްޔާގައި ގިނަ އަދަދެއްގެ ޤައުމީ ބަޠޮލުން ތިއްެބެވި ފަދައިން މަދުން ނަމަވެސް ޚާއިނުން ތިބިކަން އަބަދުވެސް ހަނދާން ކުރަންޖެހޭނެ ކަމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ.
ރައީސް މިގޮތަށް ވިދާޅުވެފައި ވަނީ ސިފައިންގެ 124 ވަނަ އަހަރީ ދުވަސް ފާހަގަކުރުމަށް ރޭ ކަޅުތުއްކަލާކޮށީގައި ބޭއްވި ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުންނެވެ.
ރޭގެ ޖަލްސާގައި ސިފައިންގެ ތެރޭގައި ޚާއިނުން ތިބިކަމަށް ވިދާޅުވި ނަމަވެސް އޭގެ މާބޮޑު ތަފްސީލެއް ރައީސް ޔާމީން ދެއްވާފައެއް ނުވެއެވެ.
އެހެން ނަމަވެސް 1988 ގެ އުދުވާނީ ހަމަލާގައާއި މިދިއަ އަހަރު ރައީސުލްޖުމްހޫރިއްޔާ އަވަހާރަކޮށްލަން ދޭން މަސައްކަތްކުރި ޓެރަރިސްޓް ހަމަލާއަށް ދިވެހި ސިފައިންގެ ބަޔަކު އެހީތެރިވެދިން ކަމަށް ބުނެ ވަނީ ވާހަކަ ދައްކަވާފައެވެ.
ރައީސް މިފަދަ ގޮތަކަށް ވާހަކަ ދައްކާފައިވާ އިރު ޑިފެންސް މިނިސްޓަރ ވެސް ރޭ ވިދާޅުވީ ރައީސް ލޯންޗް ކޮޅުގައި އެއްޗެއް ގޮވި ހާދިސާ އަކީ އަސްކަރިއްޔާ ލަދުގަންނަން ޖެހޭ ފަދަ ހާދިސާއެއް ކަމަށެވެ.