ފެނަކަ ކޯޕަރޭޝަން އާއި ސްޓެލްކޯއިން ކަރަންޓް ފޯރުކޮށްދިނުމަށް އެސްޓީއޯ އިން ގަންނަ ތެލުން މެޑަމް ފާތުން އަދި ޕީޕީއެމްގެ މަޖިލީސް މެމްބަރުންނަށް މަހަކު 35 މިލިއަން ރުފިޔާ އާ ގާތްކުރާ އަދަދެއް ލިބޭގޮތަށް ސަރުކާރުން އެސްޓީއޯ މެދުވެރިކޮށް ހަމަޖައްސާފައިވާކަން މީގެ ކުރިންވެސް "އައްޑޫލައިވް" އަށް ލިބިފައިވާ މައުލޫމާތުގެ އަލީގައި ވާނީ ހާމަކޮށްފައެވެ.
މިގޮތަށް މިކަން ހަމަޖައްސާފައިވަނީ ފެނަކަ ކޯޕަރޭޝަނާއި ސްޓެލްކޯ އަށް ވިއްކާ ތެލުގެ އަގަށް ވަރަށްބޮޑު ބަދަލުތަކެއް ކުއްލިގޮތަކަށް ގެނެސް ގެންކަން ފެނަކައިގެ އެކައުންޓުސް ޑިޕާރޓްމަންޓުގައި މަސައްކަތްކުރާ އިސް އޮފިޝަލަކު ވެސް ވަނީ "އައްޑޫލައިވް" ޔަގީން ކޮށްދީފައެވެ.
ފެނަކަ ކޯޕަރޭޝަން އަދި ސްޓެލްކޯ އާއި، ސަރުކާރުގެ މައި ވިޔަފާރި ކުންފުންޏާ ދެމެދު ކުރެވޭ ތެލުގެ ވިޔަފާރިން ނާޖާއިޒް ގޮތުގައި ފާއިދާ ނެގުމަށް ސަރުކާރަށް ނިސްބަތްވާ މެމްބަރުންނަށް އެ އިންތިޒާމް ހަމަޖައްސަދީފައިވަނީ ތެޔޮވިއްކާ އޭޖެންޓުންގެ ގޮތުގައި މެމްބަރުން ފަރުދާގެ ފުރަގަހުގައި ތިބެގެން ހިންގާ ކުންފުނިތައް ހަމަޖައްސައިގެންނެވެ.
އެހެންކަމުން މިދެކުންފުނިން ކުރިން އެސްޓީއޯއިން ގަންނަމުން އައި ޑީސަލް މެމްބަރުންގެ މަސްލަހަތު ހިމެނޭ ކުންފުނިތައް މެދުވެރިކޮށް ރަށްރަށުގައި ހިންގަމުންދާ އިންޖީނުގެތަކަށް ވަނީ ގަންނަން ފަށާފައެވެ.
"އައްޑޫ ލައިވް" އަށް އެނގިފައިވާގޮތުން ރަށްރަށުގެ އިންޖީނުގެތަކަށް މިގޮތަށް ތެޔޮ ގަންނަން ފެށުމުގެކުރިން އެސްޓީއޯއިން ފެނަކަ އަދި ސްޓެލްކޯއަށް ޑީސަލް ލީޓަރެއް ވިއްކަމުން އައީ 11.96 ލާރިއަށެވެ. ނަމަވެސް ފަހުން ރައީސް އޮފީހުން އަންގަވައިގެން ރައްޔިތުންނަށް އަގުހެޔޮކޮށް ކަރަންޓް ދިނުމަށްޓަކައި ފެނަކަ އަދި ސްޓެލްކޯ އަށް ތެޔޮ ސަޕްލައި ކުރުމަށް ހާއްސައަގެއްގެ ގޮތުގައި ލިޓަރެއް 6.96 ރުފިޔާއަށް އެސްޓީއޯގެ ބޯޑުންވަނީ ފަހުން ހަމަޖައްސާފައެވެ.
އެނގިފައިވާގޮތުން އެސްޓީއޯ ބޯޑުން ހަމަޖެއްސި ކުޑައަގު ކަމުގައިވާ 6.96 ގެ ރޭޓްގައި ޑީސަލް ވިއްކަމުންދަނީ ސީދާ ސްޓެލްކޯ އަދި ފެނަކަ ކޯޕަރޭޝަނަކަށް ނޫނެވެ. މި ހާއްސަ އަގުގައި ޑީސަލް ވިއްކަނީ ކުރިން ނަންގަނެވުނު މަޖިލިސް މެމްބަރުންގެ މަސްލަހަތު އޮންނަ ކުންފުނިތަކަށެވެ. ނުވަތަ ފެނަކަ އާއި ސްޓެލްކޯއަށް ޑީސަލް ސަޕްލައިކުރާ ޕީޕީއެމްގެ މަޖިލީސް މެމްބަރުން ހިމެނޭ 37 އެޖެންޓުންނަށެވެ.
މިދެންނެވި އެޖެންޓުން ފެނަކަ އަދި ސްޓެލްކޯއިން ހިންގާ ރަށްރަށުގެ އިންޖީނުގެތަކަށް ޑީސަލް ލީޓަރެއް ވިއްކަމުންދަނީ އެކުންފުނިތަކަށް 5 ރުފިޔާގެ ފައިދާއެއްލުމަށްފަހު 11.96 ގެ ރޭޓުންކަން "އައްޑޫލައިވް" އަށް ލިބިފައިވާ ލިޔުންތަކުންވެސް އެނގެއެވެ. އެހެންކަމުން އެސްޓީއޯ އިން ކަރަންޓުގެ އަގުހެޔޮ ކުރުމުގެ ނަމުގައި ތެލުގެ އަގަށް ގެނައި ބަދަލަކީ ވަކި ބަޔަކަށް އަގަށް ބަދަލުގެނެސްގެން ފާއިދާ ހޯދަދިނުމަށް ގެންގުޅުނު ހީލަތްތެރި އުކުޅެއްކަން އެނގެއެވެ. އެއީ ކަރަންޓު ފޯރުކޮށްދިނުމުގެ ހިދުމަތްދޭ ކުންފުނިތަކަށް ލިބޭ ޑީސަލްގެ އަގަށް އެއްވެސް ބަދަލެއް މި ނިންމެވުމުގެ ސަބަބުން އައިސްފައި ނެތުމުންނެވެ. އަދި ކުރިން އެސްޓީއޯ އަށް ލިބެމުން އައި ފާއިދާ މިހާރު މަޖިލީހުގެ މެމްބަރުންގެ މެދުގައި ބަހާލެވޭގޮތަށް އިންތިޒާމްކުރެވުނީމައެވެ.
މި ވިޔަފާރިތަކުން ޕީޕީއެމްގެ ހަރަކާތްތަކަށް ޚަރަދުކުރުމަށް ރައީސްގެ އަނބިކަނބަލުން ފާތިމަތު އިބްރާހިމް އަށްވެސް ފާއިސާ ލިބޭނެ އިންތިޒާމް އޮންނަނީ ހަމަޖެހިފައެވެ. މިގޮތުން މެޑަމް ފާތުން އަށް މައުލޫމާތު ފޯރުކޮށް އެކަންކަން ބެލެހެއްޓުމަށް ކަނޑައަޅާފައިވަނީ މެޑަމްގެ ތިމާގެ ބޭފުޅެއް ކަމުގައިވާ މޯލްޑިވް ގޭސް ގެ މެނޭޖިންގް ޑައިރެކްޓަރ އަބްދުﷲ މައުމޫން(މާނު) އެވެ.
މެމްބަރުންގެ މެދުވެރިކޮށް ކަނޑައެޅޭ ހުރިހާ އޭޖެންޓުންގެ އަތުން ލިބޭ ފައިސާގެ މުއާމަލާތް ތައް ބަލަހައްޓަނީ މާނު ކަން ޕީޕީއެމް އަށް ނިސްބްތްވާ މަޖިލިސް މެމްބަރަކު އައްޑޫލައިވް އަށް މައުލޫމާތު ދީފައިވެއެވެ. މިކަންކަން ރާވައި ހިންގުމާއި، އަދި މަޖިލިސް މެމްބަރުންނާއި މުއާމަލާތް ކޮށް އޭޖެންޓުންގެ ގޮތުގައި މަޖިލިސް މެމްބަރުން ބޭނުންވާ ބަޔަކު ކަނޑައެޅުމާއި، މެޑަމް އަށް ލިބެންޖެހޭ މިންވަރު ކަނޑައެޅުމާއި، މިކަންކަން ހަމަޖެއްސުމުގެ އެންމެހައި ކަމެއް ހަވާލު ކޮށްފައިވަނީ މެޑަމް އެންމެ އިތުބާރުކުރައްވާ އަދި އެންމެ އަރިސް މެމްބަރު ކަމުގައިވާ މައްޗަންގޮޅު ދެކުނު ދާއިރާގެ މެމްބަރު އަބްދުﷲ ސިނާންއާއެވެ.
އައްޑޫލައިވް އަށް މައުލޫމާތު ލިބިފައިވާގޮތުން މިހާރު މިވިޔަފާރިން ލިބެމުން އަންނަ ނާޖާއިޒް ފާއިދާ އިތުރަށް ބޮޑުކުރުމަށް އޭޖެންޓުންގެ ގޮތުގައި އިތުރު ކުންފުނިތައް ހަމަޖައްސައި ، މަހަކު 62 މިލިއަން ރުފިޔާ ލިބޭނެ އިންތިޒާމް ހަމަހެއްސުމަށް ސީދާ މެޑަމް ފާތުން އަދި ރައީސް ޔާމީންގެ އިރުޝާދުގެ ދަށުން ދަނީ ކުރިއަށެވެ.
މިގޮތަށް ފެނަކަ އާއި ސްޓެލްކޯ މެދުވެރިކޮށް މިފަދަ ބޮޑު ޚިޔާނާތެއް ވަމުންދާއިރު އެންމެ ބޮޑު ގެއްލުމެއް ލިބެމުންދަނީ އަތޮޅުތަކުގައި ތިބި ނިކަމެތި ރައްޔިތުންނަށެވެ. ކަރަންޓުން ކުދި ވިޔަފާރިތަކަށް ދެމުން ދިޔަ ސަބްސިޑީ ކަނޑާލުމަށްފަހު ތެލުގެ އަގަށް ގެނެސްފައިވާ ބަދަލުން މިހާރު ރަށްރަށުގެ ކަރަންޓް ބިލްތައް މިވަނީ އަތްނުފޯރާފަށައް އަރާފައެވެ.
ރައީސް ޔާމީން ވެރިކަމާއި ހަވާލުވުމާއިއެކު ތެލުން ދޭ އިންސައްތައިގެ ޑިއުޓީއެއްވެސް ވަނީ ނަގަންފަށާފައެވެ. މިކަމުގެ ސަބަބުން މުދަލާއި ޚިދުމަތުގެ އަގު ވަނީ ވަރަށްބޮޑަށް މައްޗަށް ގޮސްފައެވެ. އެގޮތުން މާލޭގައި މިހާރު 1.5ރ އާއި 3ރ އާއި ދެމެދުގައި ލިބޭ ކަރަންޓް ޔުނިޓް އަތޮޅުތަކުގެ ރައްޔިތުންނަށް ލިބެނީ 5ރ އާއި 7ރ އާއި ދެމެދު އަގެއްގައެވެ. މީގެ ކުރިން އެއްވެސް ސަރުކަރަކުން ތެލުން ޑިއުޓީ ނަގާފައިނުވަނީ ، ތެލުން ނަގާ ޑިއުޓީއަކީ ރައްޔިތުންނަށް ލިބެންޖެހޭ އާއްމު ޚިދްމަތުގެ އަގު ބޮޑުވުމަށް ސިދާ ކޮންޓްރިބިއުޓް ކުރާ ފެކްޓާރ އެއްކަމުގައި ވާތީ ކަމަށް އިގްތިޞާދީ މާހިރުން ދެކިލައްވައެވެ.
ކަރަންޓް އަގުބޮޑު ވުމުން ރައްޔިތުން ނުކުމެ މުޒާހަރާ ކޮށް ހެދުމުން ރައީސް ޔާމީން އިންޑިއާއިން އެނބުރި ވަޑައިގެން ވިދާޅުވީ އެމަނިކްފާނަށް ކަރަންޓުގެ އަގުބޮޑުކަން އެނގިވަޑައިގަތީވެސް ރައްޔިތުން ހަޅުތާލުކުރުމުން ކަމަށާއި، އެހެން ކަމުން ކަރަންޓުގެ އަގު ހެޔޮކުރަން އަނެއްކާވެސް ނިންމާފައިވާކަމަށެވެ.ނަމަވެސް މިއަދާ ހަމައަށްވެސް ކަރަންޓުގެ އަގަށް އެއްވެސް ބަދަލެއް ގެނެސްފައިނުވެއެވެ.ސަރުކާރުން ކަރަންޓުގެ އަގުހެޔޮކުރާނެކަމަށް ދެފަހަރެއްގެމަތިން މިހާތަނަށް އިއުލާންކޮށްފައިވެއެވެ.