ޓެކްނޮލޮޖީގެ ޒަމާނުގައި ދުނިޔެ ކުޑަވެފައިވާއިރު އަޅުގަނޑުމެންގެ ތެރެއިން ވަރަށް ގިނަ މީހުންނަކީ ތަފާތު ބަސްތައް ދަނެގަނެ ފަރިތަކުރަން ބޭނުންވެފައި ތިބޭ ބައެކެވެ. ދިވެހި ބަހުގެ އިތުރުން އިނގިރޭސި ގިނަ މީހުން ދަންނަ އިރު ހިންދީ ބަހާ އުރުދޫ ބަހަކީވެސް ބައެއް މީހުންނަށް ފަރިތަ ބަހެކެވެ. ނަމަވެސް މީގެ އިތުރުން ދުނިޔޭގެ އެކި ކަންކޮޅުތަކުގައި ދިރިއުޅޭ މީހުން ވާހަކަ ދައްކާ ބަހުން ވާހަކަ ދައްކަން ނުވަތަ ދައްކާ ވާހަކައެއް މޭރުންވާ މީހުންވެސް އަޅުގަނޑުމެންގެ ތެރޭގައި ވަރަށްވެސްް މަދެވެ.
އުމުރުން އެންމެ 35 އަހަރުގައި 11 ބަސް ދަސްކޮށްފައިވާ ލޫކާ ލަމްޕެރިއޯލޭ ވަނީ ބަސް ދަސް ކުރުން މިއީ އަޅުގަނޑުމެން ހީކުރާހާ އުނދަގޫ ކަމެއް ނޫން ކަން ސާބިތުކޮށްފައެވެ. މިލިޔުމުގައި އަޅުގަނޑުމެން ބަލާލާނީ ލޫކާ ލެމްޕެރިއޯލޭގެ ކޮންމެ ބަހެއް ދަސްކުރުމަށް ބޭނުންވާ 11 ގޮތްތަކަށެވެ.
ކޮންމެ ކަމަކީވެސް ވަރުގަދަ އަޒުމަކާއެކު ކުރަން ފަށައިފިނަމަ ކާމިޔާބުކުރެވޭނެ ކަމެކެވެ. ނަމަވެސް އާ ބަހެއް ދަސް ކުރަން ފަށާއިރު ފަސޭހައިން އެބަހެއް ދަނެގަނެވޭނެ ގޮތްތަކެއް ވެއެވެ. ފޮތް ތަކުގައި ލިޔެވިފައިއޮތް އަކުރު ތަކެއް ކިއުމުގެ ބަދަލުގައި ދުނިޔޭގެ އެކި ތަންތަނަށް ދަތުރުކޮށް އެކި މިޒާޖު ތަކުގެ މީހުންނާ ބައްދަލުކޮށް އެމީހުން މީރު ކާނާ ކައި، މަޖާ ކޮށް ހެދުމުން ފޮތް ތަކުގައި އޮންނަ އަކުރުތައް ނަކަލު ކުރުމަށްވުރެ ފަސޭހައިން ބަސް ދަސްވެއެވެ.
"އަޅުގަނޑަށް އެނގޭ އާ ބަހެއް ދަސް ކުރުމަކީ އުނދަގޫ ކަމެއް ކަން. އެކަމަކު އުނދަގޫ ރާސްތާތައް ކަޑައްތު ކުރުމަކީ އަޅުގަނޑު ކުރާހިތްވާ ކަމެއް." ލޫކާ ލަމްޕެރިއޯލޭ ލިޔުނު އާޓިކަލްގައި އޭނާ ދަސްކުރި 11 ބަހުން ކޮންމެ ބަހަކުން އޭނާ ހާސިލު ކުރި ފިލާވަޅު ބުނެދީފައިވެއެވެ.
1. އިނގިރޭސި
ބަހަކީ އުނގެނޭ އެއްޗެއް. ދަސްކުރެވޭނެ އެއްޗެއް ނޫން. ދަސްކުރުމުގައި އެހީވާނެ ފަރާތެއް ނުވަތަ އެއްޗެއް ހޯދުން މުހިއްމު. ޓޗަރެއްގެ ބަދަލުގައި ގައިޑެއް!
2. ފަރަންސޭސި
ބަހަކީ ދުނިޔެ ބަލާ ދިރާސާ ކުރުމަށް ހުޅުވާ ލެވޭ ދޮރެއް! ބަސް ދެކެ ލޯބި ވާންވީ. ނުވަތަ ބަސް ނިސްބަތްވާ ގައުމު. ނުވަތަ އެތަނުގެ ކެއުން. މިއަށްވުރެ ބޮޑު ހިތްވަރެއް ބަސް ދަސްކުރުމުގައި ނުވޭ!
3. ޖަރުމަނު
ބަސް ދަސްކުރާއިރު އަމިއްލައަށް ގޮތެއް ހޯދިއްޖެނަމަ އެއިން މަންފާ ކުރާނަމަ އެ ގޮތުގައި ކުރިއަށް ދިއުމުން މާ ފަސޭހައިން ބަސް ދަނެގަނެވޭ!
4. ސްޕެނިޝް
ބަސް ދަސްކުރުމަކީ އަމިއްލަ ބަހަށް އިތުރު މުއްސަނދި ކަމެއް ގެނެސްދޭ ކަމެއް. އަމިއްލަ ބަހާ ވައްތަރު ބަހެއް ދަސް ކުރާނަމަ މާ ފަސޭހައިން ބަސް އެނގިގެންދޭ
5. ޑަޗް
އެއްވެސް ބަހަކީ ބޭކާރު ބަހެއް ނޫން! ބަހެއް ދަސްކޮށްފިނަމަ ހަޔާތުގެ ކޮންމެވެސް ދަނޑިވަޅަކުން ތިމާ އަށް އޭގެ ސަބަބުން މަންފާއެއް ކުރާނެ!
6. ސްވިޑިޝް
ޕްރޮނައުންސް ކުރުމަށް އެންމެ ފުރަތަމަ ދުވަހުން ފެށިގެން ފެށުމަކީ ބަސް ދަސްކުރުމަށް ލިބިގެންދާ ވަރަށް ބޮޑު އެހީއެއް.
7. ރަޝިއަން
މެދުތެރެއިން ބަސް އުނދަގޫ ވެގެން ހުއްޓާލަން ބޭނުންވެއްޖެނަމަ އެންމެ ފުރަތަމަ ބަސް ދަސް ކުރަން އުޅުނު މަގުސަދު ހަނދާންކޮށް އެއިން ބޭނުންތެރިކަމެއް ހޯދުން މުހިއްމު. އެގައުމަކަށް ގޮސް މީހުންނާ ބައްދަލުކުރުން، ފިލްމެއް ބަލާލުން ނުވަތަ ލަވައެއް އަޑުއަހާލުން ވެސް ފުދޭ.
8. ޕޯޗުގީސް
އެއްވަގުތެއްގައި ދެ ގައުމުގެ ބަސް ވެސް ދަސްކުރެވިދާނެ. މުހިއްމީ ވަގުތު ބަހާލުން
9. ޕޮލިޝް
ގައުމު ތަކަށް ދަތުރު ކުރުމަކީ ލިބިދޭ ވަރަށް ބޮޑު ހިތްވަރެއް. ތިމާ އަށް ކުޅަދާނަކަން ލިބިގެންވާ މިންވަރަކުން ދަތުރު ކުރުމަކީ އާބަސްތައް ދަސްކުރުމަށްވެސް ލިބިދޭ ހިތްވަރެއް.
10. ޗައިނީސް
ބަހެއް ދަސްކުރުން އުނދަގޫ ކަމަށް ނަން މަޝްހޫރުވެފައިވުމަކީ ބަސް ދަސް ކުރުމަށް އެޅޭ ހުރަހެއް ކަމުގައި ނުބަލާށެވެ.
11. ޖަޕަނީސް
ބައެއް ބަސްތަކަކީ މުޅީން އާ ގޮތް ތަކެއް އެކުލެވިގެންވާ ބަސްތަކެވެ. ތިމާ ދަސްކުރުމަށް ބޭނުން ކުރާ ގޮތް ނާކާމިޔާބުވެއްޖެނަމަ އެހެން ގޮތެއް ހޯދާށެވެ. ހުއްޓާނުލާށެވެ!
ބޭރު ބަހެއް ދަސްކުރާނެ ގޮތެއް ހޯދުމަކީ އޭނާ އަށް ކުރެވުނު އެންމެ ފަޚުރުވެރިވާ ކަން ކަމަށް ލޫކާ ވަނީ ބުނެފައެވެ. އެއީ ބުރަ މަސައްކަތެއް ކަމަށާއި އޭނާ އެކަން ކޮށްފައިވަނީ ގޭގައި ހުރެގެން ނޫންކަމަށް ލޫކާ ވަނީ ތަކުރާރުކޮށްފައެވެ.
"އަހަރެން ދިރިއުޅެނީ ބަސް ދަސްކުރާކަށެއް ނޫން. އަހަރެން ބަސް ދަސްކުރަނީ މިހާރަށް ވުރެ ރަނގަޅު ދިރިއުޅުމެއް ހޯދަން."