ދިވެހި ސަރުކާރަށް ލޯނު އެހީގެ ގޮތުގައި އޯޕެކް ފަންޑް ފޯ އިންޓަނޭޝަނަލް ޑިވެލޮޕްމެންޓް އިން ދީފައިވާ ފައިސާއިން އައްޑޫގެ ތިން ރަށް ކަމަށްވާ މަރަދޫ، މަރަދޫފޭދޫ އަދި ފޭދޫގައި ނަރުދަމާގެ ނިޒާމް ގާއިމްކުރުމަށް ޝަރުތު ހަމަވާ ފަރާތެއް ހޯދުމަށް މިނިސްޓްރީ އޮފް ފިނޭންސް އެންޑް ޓްރެޝަރީ އިން އިއުލާންކޮށްފިއެވެ.
ފިނޭންސް އިން މިއަދު ކޮށްފައިވާ އިއުލާނެއްގައި ވާގޮތުން އެންވަޔަރޮމެންޓް މިނިސްޓްރީގެ ބޭނުމަށް މިމަސައްކަތަށް ބީލަން ހުށައެޅުމުގެ ފުރުސަތު ޝަރުތު ހަމަވާ ރާއްޖޭގެ އަދި ރާއްޖެއިން ބޭރުގެ ކުންފުނިތަކަށްވެސް ވަނީ ހުޅުވާލެވިފައެވެ.
މަސައްކަތަށް ހޮވޭ ފަރާތްތަކުން ނަރުދަމާގެ ވިޔުގަ ގާއިމުކުރުމުގެ އިތުރުން ކުރަން ޖެހޭނެ މަސައްކަތްތަކުގެ ތެރޭގައި ލިފްޓިން ސްޓޭޝަނާއި ޕަމްޕް ސްޓޭޝަންސް އަދި ސީ އައުޓް ފޯލް ގާއިމުކުރުމާއި، ސްވޭޖް ޓްރީޓްމަންޓް ޕްލާންޓް ގާއިމުކުރުމުގެ މަސައްކަތައް ހިމެނިގެންދާނެއެވެ.
މިމަސައްކަތް ކޮށްދޭނެ ފަރާތްތައް ހޯދުމުގެ މަސައްކަތް ކުރިއަށް ދާނީ އިންޓަނޭޝަނަލް ކޮމްޕެޓިޓިވް ބިޑިން ގެ އުސޫލުތަކުގެ މަތިން ކަމަށްވެސް ފިނޭންސުގެ އިއުލާނުގައި ފާހަގަކޮށްފައިވެއެވެ.
މީގެ އިތުރުން ބިޑްގައި ބައިވެރިވުމަށް 1500 ރުފިޔާގެ އިތުރުން ބިޑް ސެކިއުރިޓީގެ ގޮތުގައި 75،000 ޑޮލަރު ނުވަތަ އެއާ އެއްވަރަށް ދިވެހި ރުފިޔާ ހުށައަޅަން ޖެހޭނެއެވެ. ބިޑް ސެކިޔުރިޓީގެ މުއްދަތަކީ ބިޑް ހުޅުވާ ތާރީހުން ފެށިގެން 148 ދުވަހެވެ. އަދި ރެޖިސްޓްރޭޝަން ފީގެ ފައިސާ ބަލައިގަންނާނީ މިއަދުން ފެށިގެން އަންނަ މަހުގެ 23 ވަނަ ދުވަހާ ހަމައަށެވެ. ފީ ބަލައިގަންނާނީ މިމުއްދަތުގެ ތެރޭގައި ބަންދު ނޫން ކޮންމެ ދުވަހެއްގެ ހެނދުނު 8:30 އިން މެންދުރު 1:30 އަށެވެ.
ފިނޭންސުން މީގެ ކުރިންވެސް ވަނީ ހުޅުދު އާއި މީދޫގައި ނަރުދަމާގެ މަސައްކަތް ކޮށްދޭނެ ބަޔަކު ހޯދުމަށް އިއުލާނުކޮށްފަ އެވެ. އަދި ގުޅިފައިވާ ރަށްތަގުގައި ފެނާއި ނަރުދަމާ ގާއިމު ކުރުމަށް މީގެ ކުރިންވަނީ ބައޯ ވޯޓާ ކިޔާ ކުންފުންޏަކާވެސް ހަވާލު ކޮށްފައެވެ.