މިދިޔަ ބުރާސްފަތި ދުވަހު އިސްތިއުފާ ދެއްވި ހައިކޯޓު ދެކުނު ގޮފީގެ ފަނޑިޔާރު އަލްއުސްތާޒާ އަޒްމިރަލްދާ ޒާހިރު މަގާމުން އިސްތިއުފާ ދެއްވުމަކީ ދިވެހި ޖުޑިޝަރީއަށް ލިބުނު ބޮޑު ގެއްލުމެއް ކަމަށް ކުރީގެ އުއްތަމަ ފަނޑިޔާރު އަހްމަދު ފާއިޒު ހުސެއިން ވިދާޅުވެއްޖެއެވެ.
ފާއިޒުގެ އަމިއްލަފުޅު ފޭސްބުކްގައި މިއަދު ވިދާޅުވެފައިވަނީ އަޒްމިރަލްދާއަކީ ރާއްޖޭގެ ޝަރުއީ ދާއިރާގައި މިހާރު ތިއްބެވި ފަނޑިޔާރުންގެ ތެރޭގައި ހުންނެވި އެންމެ ގާބިލު އެއް ބޭފުޅާ ކަމަށެވެ.
ހުޅުމީދޫގައި ހުންނަ ދެކުނު ހައިކޯޓު ގޮފީގެ ފަނޑިޔާރަކަށް ހުންނެވުމަށް ފަހު އަޒްމިރަލްދާ އިސްތިއުފާ ދެއްވާފައިވަނީ ހައިކޯޓުގެ ދެކުނު ބްރާންޗަށް ބަދަލު ކުރައްވާފައިވާތީ އެކަމުގެ ސަބަބުން ހުރި ދަތިތައް ބަޔާންކޮށް އެތައް ފަހަރަކު ސްޕްރީމް ކޯޓަށާއި ޖުޑިޝަލް ސާވިސް ކޮމިޝަނަށް ލިޔުއްވާފައެވެ. ސްޕްރީމް ކޯޓާއި ޖޭއެސްސީން އެ މައްސަލަތަކަށް ހައްލު ނުލިބުމުން އަޒްމިރަލްދާވަނީ މަޖިލީހުގެ މިނިވަން މުއައްސަސާތަކާއި ބެހޭ ކޮމިޓީއަށާއި، ރައީސް އަބުދުﷲ ޔާމީނަށް ވެސް އެ ޝަކުވާތައް ހުށަހަޅުއްވާފައެވެ.
ނަމަވެސް އެއިން އެއްވެސް ޝަކުވާއެއް ބަލާފައި ނުވެއެވެ.
މަގާމުން އިސްތިއުފާ ދެއްވުމަށްފަހު އަޒްމިރަލްދާ ވަނީ ހުޅުމީދޫގެ ރައްޔިތުން އެކަމަނާއަށް ދެއްވި މެހްމާންދާރީއަށް ޝުކުރު އަދާކޮށް ދިގު ބަޔާނެއް ފޭސްބުކްގެ ޒަރީއާއިން އެރަށުގެ ރައްޔިތުންނަށް ފޮނުވާފައެވެ.